АР-м социальнэ ыкIи экономикэ хэхъоныгъэхэр егъэшIыгъэнхэм фытегъэпсыхьэгъэ унэе программэм къыщыдэлъытагъэу, езыгъэжьэгъэкIэ фермерэу мэткIо къэгъэкIыным ыуж итхэм апае 2025-рэ илъэсэу кIуагъэм сомэ миллиони 100 агъэнэфэгъагъ. Ар субсидиеу нэбгырэ 30-мэ атырагощагъ.

АР-м мэкъумэщ хъызмэтымкIэ и Министерствэ къызэритыгъэмкIэ, Адыгеим зыщязгъэтхыгъэ мэкъумэщ хъыз­мэтшIапIэхэр е унэе предпринимательхэр ары мы IэпыIэгъум къыхиубытэхэрэр. Сомэ миллиони 3-рэ мин 500-рэ анахьыбэу зы нэбгырэм ратынэу къыдэлъытагъэр.
Ахъщэр мэткIо гъэтIысыжьэу е куашэу агъэтIысхьащтхэм (сэнашъхьэр мыхэм къахиубытэрэп), зэфэшIыгъэ псэуалъэ­хэм, гущыIэм пае, фэбапIэхэм, къащагъэкIыщтмэ, ар зыхашIыкIыщтхэм, чIыгоу къызэлъаубытырэр къызэрашIыхьащтым, техникэм якъэщэфын тырагъэкIодагъэм пэIуагъэхьажьынэу къараты.

Зэнэкъокъу шIыкIэм тетэу къыхахых субсидиер зытефэщтхэр. Ащ хэлэжьэщтым ыпэрапшIэу план ыгъэхьазырын фае. Ащ щигъэнэфэгъэ ахъщэм ипроценти 10-м къыщымыкIэу IэкIэлъыныр шапхъэхэм зэу ащыщ.
Джащ фэдэу республикэ бюджетым ыпашъхьэкIэ чIыфэ телъы хъущтэп, хэбзэIахьхэр игъом ытыгъэнхэ, мазэм гъо­тэу иIэр, гурытымкIэ лъытагъэу, цIыфыр зэрыпсэун ылъэкIыщт ахъщэ анахь макIэу Адыгеим щагъэнэфагъэм ехъун фае.

Ащ нэмыкIэу чIыгоу маткIор къызщигъэкIыщтыр нэмыкI горэм ыгъэфедэнэу ритыгъэ хъущтэп, нахьыпэкIэ ахъщэ IэпыIэгъу, субсидие е грант къыратыгъэ­нэу щытэп.
Шапхъэу пылъыр зэкIэ ыгъэцакIи, зэнэкъокъум пхырыкIи субсидиер къызэратыгъэ фермерым ахъщэр мэзэ 18-м шIомыкIызэ планым зэрэщигъэнэфагъэм тетэу ыгъэфедэн, шIокI имыIэу зы Iоф­шIэпIэ чIыпIэ къытын, илъэси 5,5-рэ нахь мымакIэу ар ыIыгъын фае.
Зыгъэхьазырыгъэр
ХЪУТ Нэфсэт.