Мэзаем и 24-м Адыгэ республикэ ныбжьыкIэ тхылъеджапIэм тхакIоу Теуцожь Хьабибэ къызыхъугъэр илъэс 95-рэ зэрэхъугъэм фэгъэхьыгъэ Iофтхьабзэ щыкIуагъ.

Ар зэдагъэхьазырыгъ тхылъеджапIэм иIофышIэхэмрэ гу­манитар ушэтынхэмкIэ Адыгэ рес­публикэ институтым литературэмкIэ иотдел ишIэныгъэлэжьхэмрэ.
Iофтхьабзэм хэлэжьагъэх тха­кIом ыпхъоу Мамый Мариет, Адыгэ Хасэм итхьаматэу ЛIымыщэкъо Рэмэзан, иIахьылхэм ащыщхэр, еджакIохэр. Тхылъ­еджапIэм иIофышIэу МэщлIэкъо Таисэ Iофтхьабзэр шIуфэс гущыIэ кIэкIыкIэ къызэIуихыгъ, ащ пыдзагъэу шIэныгъэлэжьхэу Агъыржьанэкъо Симхъан, Шъхьэ­лэхъо Дарико, ЖакIэмыкъо За­рим, Шэуджэн Тэмарэ, ШэкIо Мирэ, Къуекъо Асфар тхакIом итворчествэкIэ яшIошIхэр къыраIотыкIыгъэх. Теуцожь Хьабибэ цIыфыгъэ хъупкъэ дахэ иIэу зэ­рэщытыгъэр, илъэпкъ гукIэгъу зэрэиныгъэр, иадыгабзэ фэгу­мэкIэу, бзэмкIэ гъэзагъэу ­адыгэ гущыIэхэм ахигъахъоу, ахэр кIиу­гъуаеу зэрэщытыгъэр, тхакIом ытхыгъэ художественнэ произведениехэр агу къа­гъэкIыжьыгъэх. Хьабибэ бэмыIо башIэщтыгъэу алъытагъ.
Дзэукъожь Нуриет.