Мэзаем и 23-м ипэгъокIэу фондэу «Хэгъэгум иухъумакIохэр» зыфиIорэм икъутамэу Адыгеим щыIэмрэ Мыекъопэ художественнэ еджапIэмрэ Iофтхьабзэу «Нарисуй Героя» зыцIэр рагъэкIокIы. ЛIыхъужъым сурэт тешIыкIыгъэныр ары Iофтхьабзэм ипшъэрылъыр.

— А мурадыр зыдаIыгъэу сурэтышI ныбжьыкIэхэр хэушъхьафыкIыгъэ дзэ операцием иветеранхэу Евгений Абатуровым, Олег Спиряковым ыкIи Евгений Праздниковым аIукIагъэх. Ахэм атешIыкIыгъэ сурэтхэмкIэ ныбжьыкIэхэм къагъэ­лъэгъуагъ цIыфым ишэн зыфэдэр, гукIуачIэу иIэр, ыгу ихъыкIырэр. АщкIэ IэпыIэгъушIу къафэхъугъэх ежь ветеранхэм афэгъэхьыгъэ къэбарэу къаIотагъэхэр, ягукъэкIыжьхэр, дзэ зэкъошныгъэм ыкIи Хэгъэгум шъыпкъэныгъэу афыряIэр. КIэлэцIыкIухэм ашIогъэшIэгъонэу зэхахыгъэр тхьапэм рагъэкIугъ, — къытыгъ фондэу «Хэгъэгум иухъумакIохэр» зыфиIорэм икъутамэ.
Анахь IофшIэгъэ дэгъухэр Хэгъэгум иухъумакIохэм янэпэеплъэу фондым икъу­тамэ икъэгъэлъэгъуапIэ чIэлъыщтых. Мы мэфэ благъэхэм Iофтхьабзэр Тэхъутэмыкъое районым щылъагъэкIотэщт. «Единэ Россием» ишIушIэ Iофтхьабзэхэм яшIуагъэкIэ къыткIэхъухьэрэ лIэужхэм лIыхъужъныгъэм ыкIи лIыблэнагъэм уасэу афашIырэм зыкъеIэты.