«Единэ Россием» илъэпкъ программэ пшъэрылъ шъхьаIэу иIэхэм зэу ащыщ унэхэм яшIын зегъэушъомбгъугъэныр. Ащ фэшI Адыгеим псэолъэшIыным къыщыщагъакIэрэп.

ГущыIэм пае, унэу ашIи атIупщыгъэр, цIыфэу ис пчъагъэм тегощагъэмэ, нэбгырэ пэпчъ квадрат метрэ 1,2-рэ тефэ. БлэкIыгъэ илъэсым квадрат метрэ 600, ащ хэхьэ фэтэрыбэу зэхэт унэ 30, аухи, атыгъ. Мы илъэсми ащ къыщагъэкIэщтэп.
Мы уахътэм инфраструктурэр, гъогухэр, кIэлэцIыкIу джэгупIэхэр, спортым зыщыпылъыщтхэ ыкIи къызщакIухьащт чIыпIэхэр, тучанхэр, шхапIэхэр къызщыдэлъытэгъэ район цIыкIухэр шIыгъэнхэм фытегъэпсыхьэгъэ проект 13 респуб­ликэм щыпхыращы. Ахэм ащыщэу 6-р Мыекъуапэ щырагъэжьагъ, ащ фэдиз поселкэу Яблоновскэмрэ къуаджэу АдыгеякIэмрэ ащашIы, зыр Адыгэкъалэ щагъэпсыщт.
«Унэхэм лъэхъаным диштэу гъэ­псыгъэ еджапIэхэр, кIэлэцIыкIу IыгъыпIэхэр, IэзапIэхэр, культурэм, спортым япхыгъэ псэуа­лъэхэр апэблагъэу тшIынхэм тыпылъ. Ахэр зэкIэ республикэм хэ­хъоныгъэ егъэшIыгъэным фытегъэпсыхьэгъэ IофшIэным хэхьэх. Ащ тетэу, лъэбэкъу зырызэу, УФ-м и Президентэу Владимир Путиныр, Правительствэр къыддеIэхэзэ, социальнэ лъэныкъом, къыдэгъэкIыным, мэкъумэщ хъыз­мэтым, зекIоным зятэгъэушъомбгъу, IофшIэпIэ чIыпIэхэр къэтэтых. Гухэлъ шъхьаIэр муниципалитет пэпчъ щыпсэухэрэм ясабыйхэр апIунхэ, гъэсэныгъэ тэрэз арагъэгъотын, ежьхэм сэнэхьа­тэу яIэр агъэфедэжьышъун амал ятыгъэныр ары», — къыхигъэ­щыгъ АР-м и ЛIышъхьэу КъумпIыл Мурат.