ЦIыф зэрымыс быбырэ пкъыгъохэм япхыгъэ дзэ­хэр тишъолъыр зэрэщы­зэхащэрэм фэгъэхьыгъэ Iофтхьабзэхэр респуб­ликэм щызэхэщэгъэнхэр лъагъэкIуатэ.

Мызыгъогум искусствэхэмкIэ Адыгэ республикэ колледжэу Тхьабысымэ Умарэ ыцIэ зыхьырэм щыIагъэх зэзэгъы­ныгъэ шIыкIэм тетэу дзэм къулыкъу щызыхьыщтхэр къыхэзыхыхэрэ ыкIи зыуплъэкIухэрэ офицерхэм ащыщэу, лейтенантэу Александр Чубаевыр, АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель.
Iофтхьабзэм ипэублэ быбырэ пкъыгъо­хэр зэрэзэтекIыхэрэр ыкIи ахэр зэрагъэ­федэхэрэр ныбжьыкIэхэм къафаIотагъ.
— ЗэкIэми ныбжьым елъытыгъэу къулыкъу шъухьынэу щыт, зэзэгъыныгъэм шъукIатхэмэ, лъэныкъуитIу зэдэжъугъэкIон шъулъэкIыщт, илъэ­сэ цIыф зэрымыс быбырэ пкъыгъом иоператорэу шъукъэтыщт, ащ хэкIыщт шъузэреджэщт мэзитIури. Илъэсым ыуж къэжъугъэзэ­жьыщт, шIоигъоныгъэ зиIэхэр джыри зэзэгъыныгъэм кIэтхэнхэ алъэкIыщт. БПЛА-р щыIэныгъэм пытэу къы­зэрэхэхьагъэм къыхэкIыкIэ, Iоф­шIэпIэ чIыпIэ пае шъукъэнэщтэп. Мы лъэныкъомкIэ специалист шъу­зэрэхъугъэр къэзыушыхьатырэ тхылъыр къышъуатыжьыщт, — къыIуагъ Александр Чубаевым.
Нэужым фэгъэкIотэнэу яIэхэм ягугъу къышIыгъ, зэзэгъыныгъэм кIатхэхэрэм АР-м и ЛIышъхьэ ыгъэнэфэгъэ сомэ миллион 1,5-рэ, муниципальнэ образованием къытырэ мин 500-р ыкIи федеральнэ ахъщэу сомэ мин 400 ара­тыщт, ащ нэмыкIэу мазэ къэс мин 210-м нахь мымакIэу лэжьапкIэ къафихьащт, илъэсым миллиони 5-м ехъу къалэжьын алъэкIыщт. Анахь шъхьаIэр зэуапIэм имытхэу ныбжьыкIэхэм япшъэрылъхэр зэрагъэцэкIэщтыр ары. КъызагъэзэжьыкIэ, ветеран хъущтых, фэгъэкIотэнхэр яIэщтых, пенсиеу мини 4-м ехъу мазэ къэс къаратыщт ыкIи ыпкIэ хэмылъэу зыгъэпсэфыпIэ чIыпIэ зэфэшъхьафхэм агъэкIощтых.

Артем Журавель ныбжьыкIэхэм нэ­ужым закъыфигъэзагъ, джырэкIэ мэхьанэ зиIэ сэнэхьатыр къызIэкIагъэхьанымкIэ амалышIоу мыр зэрэщытыр къыIуагъ.
— Пшъэрылъ шъхьаIэу тиIэр цIыф зэрымыс быбырэ пкъыгъохэм япхыгъэ лъэныкъом шъуищыIэныгъэ ешъупхын амал зэрэщыIэр шъод­гъэшIэныр ары. МыщкIэ специалистхэр джыри щыIэхэп, апэрэхэм ащыщ шъухъун шъулъэкIыщт. Мы лъэныкъор дзэми, щыIэныгъэми лъэ­шэу ящыкIагъ. Ар ишыхьат мыгъэ осышхоу къесыгъэм къыздихьыгъэ гумэкIыгъохэр дэгъэзыжьы­гъэн­хэмкIэ БПЛА-хэм яшIогъэшхо къызэрэкIуагъэр. Мы илъэсым цIыф зэрымыс быбырэ пкъыгъохэм яоператорхэр едгъэджэнхэу зы куп зэхэтщэнэу тэгъэнафэ. Ар шъо­лъыр пстэуми зэшIуахын алъэкIырэп, сыда пIомэ мылъкушхо ищыкIагъ, — къыIуагъ Артем Журавель.
ШIоигъоныгъэ зиIэхэм дзэ комиссариатэу зыщыпсэухэрэм щыIэм зыщарагъэтхышъущт. УпчIэ зиIэхэм зыздагъэзэшъущтыр: къ. Мыекъуапэ, ур. Комсомольскэр, 217-рэ, я 119, 102-рэ кабинетхэр е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае «линие плъырыр»: 117#4 ыкIи 8 (8772) 52-11-28.
ДЕЛЭКЪО Анет.