• 2018-рэ илъэсым къыщыублагъэу Адыгеим щыпхыращы.
• Къыблэ федеральнэ шъолъырымкIэ тиреспубликэ апэу Iофыгъом игъэцэкIэн фежьагъ.
• Илъэси 8-м къыкIоцI Адыгеимпроекти 163-рэщыпхыращыгъ, анахьыбэр — 2025-рэ илъэсым: къызкIэлъэIугъэхэр 45-рэ. Мы пчъагъэр 2018-рэ илъэсым егъэпшагъэмэ, фэди 5,6-кIэ нахьыб.
• Проекти 163-м сомэ миллион 325,5-рэ апэIухьагъ.
• Рахъухьагъэр проценти 100-у Адыгеим щагъэцэкIагъ.

УФ-м и Президент къыдыригъэ­штагъэу, партиеу «Единэ Россиер» икIэщакIоу зэкIэми зэдагъэфедэщт инфраструктурэм хэхъоныгъэ егъэшIыгъэным ыкIи ащкIэ унашъохэр шIыгъэнхэм цIыфхэр къызэрэхэлэжьэщтхэ шIыкIэм хэбзэ шэпхъэ зыкI халъхьагъ. ФинансхэмкIэ министерствэр про­ект­хэу чIыпIэхэм къагъэлъагъо­хэрэр зэнэкъокъу шIыкIэкIэ къыхахыным изэхэщакIу ыкIи илъэс къэс мы зэнэкъокъур регъэкIокIы.

Проектхэр загъэцакIэхэрэм къыщыубла­гъэу псэупIэхэм адэс цIыфхэм зэдагъэфедэрэ чIыпIэхэу анахьэу къыхахыхэрэр мыщ фэдэх:
— зэтегъэпсыхьаным епхы­гъэхэр;
— культурнэ кIэным хэхьэрэ чIыпIэхэр;
— гъогухэр.

2018 — 2022-рэ илъэсхэм зы проектым телъытагъэу республикэ бюджетым иIахьэу ащ пэIуагъа­хьэщтыгъэр 1 миллионмэ, 2023-м къыщыублагъэу сомэ миллиони 2 къыхагъэкIы хъугъэ.
ЧIыпIэ бюджетыр къызэрэхэлажьэрэр — субсидиеу къызкIэ­лъэ­Iухэрэм ипроценти 10-м нахь мымакIэу ары, цIыфэу чIыпIэм щыпсэухэрэм къыхалъхьэрэр — проценти 5-м нахь макIэп.

ЗэкIэмкIи сомэ миллион 325,5-рэ проектэу агъэцэкIагъэхэм апэIухьагъ, мыщ фэдэ къэкIуапIэхэм ар къагъэпсыгъ:
— республикэ бюджетыр – сомэ миллион 216,4-рэ,
— чIыпIэ бюджетхэр – сомэ миллион 61,1-рэ,
— цIыфхэр – сомэ миллион 27,4-рэ,
— спонсорхэр – сомэ миллион 20,6-рэ.

Анахьыбэ къызщыкIэлъэIугъэхэ 2025-рэ илъэсым зэкIэмкIи проект­хэм атефагъэр сомэ миллиони 116,6-рэ, мыщ щыщэу рес­публикэ бюджетым къикIыгъэр сомэ миллион 77,2-рэ.
Проектым къыхэлажьэхэрэм игъорыгъоу зарагъэушъомбгъунэу рагъэжьагъ ыкIи 2024-рэ илъэсым Кощхьэблэ районым игъэсэныгъэ учреждениехэр кIырыплъыгонхэу зэнэкъокъу шIыкIэкIэ къыхэхьа­гъэх. ТекIоныгъэ къыдэзыхыгъэр 3 ыкIи ахэм япроект пэпчъ рес­- пуб­ликэ бюджетым къыхэхыгъэ сомэ мин 350-рэ пэIуагъэ­хьагъ, зэкIэмкIи — 1 миллионрэ мин 50-рэ.

2025-рэ илъэсым республикэм иеджапIэхэр зэкIэ хагъэлэжьа­гъэх, текIоныгъэ къыдэзыхыгъэр еджэпIи 10-мэ япроетхэр арых. Проект пэпчъ республикэм ибюджет къыхэхыгъэу сомэ мин 350-рэ пэIухьагъ, зэкIэмкIи — сомэ миллиони 3,5-рэ.

Джы 2026-рэ илъэсым ныбжьыкIэхэри мы Iофыгъом къыхэлэжьэщтых мырэущтэу зэтефыгъэхэу:
ныбжьыкIэхэр (ныбжьыкIэ зэхахьэхэм ахэтхэу илъэс 35-м нэс зыныбжьхэр);
студентхэр (гурыт сэнэхьат гъэсэныгъэ ыкIи апшъэрэ гъэсэныгъэ зыщызэрагъэгъотырэ учреждениехэм ащеджэхэрэр);

еджакIохэр (гъэсэныгъэ зэзы­гъэгъотыхэу зыныбжь илъэс 16-м къыщежьэхэрэр).
2026-рэ илъэсым ыкIи агъэ­нэфэрэ 2027 — 2028-рэ илъэсхэм ателъытэгъэ республикэ бюджетым ехьылIэгъэ хэбзэгъэуцугъэм къызэрэдилъытэрэмкIэ, цIыфхэр къыхагъэлажьэхэзэ агъэпсыщт бюджетым 2026-рэ илъэсым сомэ миллион 30 илъэс къэс къыщыхалъытагъ, ныбжьыкIэхэм ягу­къэкIхэм ателъытагъэр — илъэс къэс сомэ миллиони 3,5-рэ.

Къыхэгъэщыгъэн фае, бюджет гъэнэфэным цIыфхэр, анахьэу ныбжьыкIэхэр, къыхэлажьэхэ зыхъукIэ, мылъкум ылъэныкъокIэ гъэзекIонхэр федэу зэрашIыщтхэм нахь фэкъулайхэ, нахь фэса­къыхэ мэхъух, ежьхэм зэрагъэфедэщтгъагъэхэм ехьыщырэу общественнэ мылъкуми фэсакъых.

— ЧIыпIэ мэхьанэ зиIэ Iофы­гъохэм, «Единэ Россием» инароднэ программэхэм язэшIохынкIэ цIыфхэр къыхэлажьэхэзэ агъэ­псырэ бюджетыр анахь шIогъэшхо къэзытыхэрэм ащыщ. Ащ ныбжьыкIэхэри хэщагъэхэ зы­хъукIэ, гъэIорышIэнымкIэ амалэу яIэхэр къызэIуихыщтых, къызщыхъу­гъэхэ чIыпIэхэм апашъхьэ пшъэдэкIыжьэу яIэр зэхашIэным къыфигъэущыщтых, — къыIуагъ Адыгеим и ЛIышъхьэу, партиеу «Единэ Россием» и Адыгэ шъолъыр къутамэ ипащэу КъумпIыл Мурат.