Росреестрэм АР-мкIэ и ГъэIорышIапIэ цIыф­хэм ямылъку, япсэупIэхэр гъэпцIакIохэм зэращаухъумэщтхэм фэгъэхьыгъэ пресс-кон­фе­ренцие щызэхащэгъагъ.

БзэджашIэхэм цIыфхэр зэ­рагъапцIэхэрэ шIыкIэхэм, ахэм дамыхьынхэм фэшI зэрэзекIонхэ фаем ащ щатегущыIагъэх.
Iофтхьабзэм хэлэжьагъэх Рос­реестрэм АР-мкIэ и ГъэIорышIапIэ ипащэу Къуижъ Эдуард, амыгъэкощырэ мылъкум и ЗыкI къэралыгъо реестрэ фэгъэзэгъэ отделым ипащэ игуа­дзэу Оксана Шевцовар, амыгъэкощырэ мылъкур къэралыгъо регистрацие шIыгъэнымкIэ отделым ипащэ игуадзэу Нэгъэрэкъо Заремэ.
Ахэм къызэраIотагъэмкIэ, нахьыбэрэмкIэ бзэджашIэхэр цIыфым телефонымкIэ фытеохэзэ агъэщынэ, унэм, чIыгу Iахьым е фэтэрым къэбарэу пылъхэр ытыгъунэу зыгорэ къы­фежьагъэ фэдэу, къэралыгъо фэIо-фашIэхэм япортал щыриIэ «унэе кабинетым» къихьагъэхэу къыраIо, ащ щаухъумэщтхэ фэдэу къагъэгугъэшъ, ежьхэм ящыкIэгъэ къэбархэр къыра­гъаIох. Джащ фэдэу тхылъ нэпцIхэр агъэфедэх. ЦIыфым псэупIэр зимыунаеу, ар ыщэнэу фитыныгъэ зимыIэм къыщищэфыгъэу хъун ылъэкIыщт.
— О ущымытэу ащ еп­хыгъэ зэзэгъыныгъэ ашIын фимытхэу бгъэпсыныр зэ­пстэумэ анахь хэкIыпIэ тэрэз, — къыIуагъ Къуижъ Эдуард. — 2025-рэ илъэсым Адыгеим щыпсэурэ нэбгырэ 1600-мэ ар ашIыгъ.
Унэу, чIыгу Iахьэу, фэтэрэу къащэфи, ау арамыгъэтхы­гъэхэр, амыгъэкощырэ мылъкум и ЗыкI къэралыгъо реестрэ хэмытхэр гъэпцIакIохэмкIэ къыз­IэкIэгъэхьэгъошIу зэрэхъу­хэрэри къэгущыIагъэхэм къыхагъэщыгъ. КъызэраIуагъэмкIэ, Адыгеим ащ фэдэ псэолъэ мин 15-м ехъу ит.
Нэгъэрэкъо Заремэ журналистхэм яупчIэхэм джэуап къа­ритыжьзэ, къэралыгъо фэIо-фа­шIэ­хэм япорталкIэ унэ е нэ­мы­кIэу амыгъэкощырэ мылъкум хэхьэрэ псэуалъэ пщэн зэрэмылъэкIыщтыр къыIуагъ.
— Арышъ, «унэе кабинетэу» мы порталым щыуиIэр къызэ­Iуахыгъэу, уипсэупIэ ащэнэу тхылъхэр агъэ­хьазырхэу заIокIэ, пшIошъ бгъэхъу хъущтэп. Уагъэ­щынэнышъ, уагъэгуIэным пае арэущтэу къызкIаIорэр, — къы­кIигъэтхъыгъ ащ.
ЦIыфым ишIэ хэмылъэу, ежь къемызэгъыгъэу иунэ пщэнэу тхылъхэр электроннэ шIыкIэм тетэу птынхэ плъэкIынэуи щы­тэп. Амыгъэкощырэ мылъкур зиунаем ежь ышъхьэкIэ лъэIу тхылъ Росреестрэм ритын фае.
Унэр пщэфыным ыпэкIэ ар зыщэрэм икъэбар хьыкумхэм, приставхэм яиинтернет нэкIубгъохэм ащыууплъэкIун, истыхьагъэу ыгъэпсыгъэмэ е псэуалъэр ыщэн фимытэу тыралъхьагъэмэ, ежь бысымым ипсауныгъэ изытет, иакъыл пыч фэ­хъу­гъэмэ, фэмыхъугъэмэ, нэмыкI Iоф пылъмэ зэбгъэшIэн фае.
Джащ фэдэу унэр къызащэфым ны мылъкур агъэфедагъэ­мэ, псэупIэ-коммунальнэ фэIо-фашIэхэм апкIэ игъом ытыгъэ­мэ, шъхьэгъусэ иIэмэ, ащ ишIэ хэлъэу ещэмэ защыбгъэгъозэныр шIокI зимыIэ Iоф.
Ахэр къаIотагъэх ГъэIорышIапIэм ипащэхэм. Пстэумэ ауж амыгъэкощырэ мылъкур Рос­реестрэм щябгъэтхыным мэхьанэшхо зэриIэм, джащыгъум псэуалъэм къырыкIорэр игъом къызэрэплъыIэсыщтым, уифитныгъэхэр къызэрэухъумэ­гъэщтхэм джыри зэ къыкIа­гъэтхъыжьыгъ.
ХЪУТ Нэфсэт.