Мыекъопэ къэралыгъо технологическэ университетым и Дзэ егъэджэн гупчэ зызэха­щагъэм ехъулIэу апэрэ курсым щеджэхэрэр курсант зэрэхъугъэхэр къэзыушыхьатрэ тхылъхэр аратыжьыгъэх.

МэфэкI Iофтхьабзэм хэлэ­жьа­гъэх полковникэу, ракетыдзэхэм­рэ я 58-рэ дзэ артиллериемрэ
япэщагъэу, Адыгэ Республикэм иветеранхэм я Совет итхьама­тэу Къоджэ Аслъан, я 99-рэ бригадэм икомандир ипшъэрылъхэр зыгъэцакIэрэ, подполковни­кэу Анатолий Глазовыр, Краснодар апшъэрэ дзэ авиационнэ училищым ия 761-рэ штаб ипащэу, подполковникэу Сергей Тахарченкэр, апшъэрэ еджапIэм идеканхэр, икIэлэегъаджэхэр.
АР-м и ЛIышъхьэ ыкIи ветеранхэм ацIэкIэ ныбжьыкIэхэм Къоджэ Аслъан къафэгушIуагъ.
— ШъуищыIэныгъэкIэ непэрэ мафэм мэхьанэ ин иI. ДжырэкIэ цIыф зэрымыс ­быбырэ пкъыгъохэм япхыгъэ сэнэхьатхэр лъэшэу тищыкIагъэх. Пыим ебэныгъэным фэшI дзэхэр кIэу агъэпсых, а Iоф­шIэныр джыри лъагъэкIотэщт. Неу­щырэ мафэр шъоры зэлъытыгъэр, зэзэгъыныгъэм кIэтхэн­хэшъ, хэушъхьафыкIыгъэ дзэ операцием кIонхэр къышъухэ­кIынхэкIи мэхъу, пэIудзыгъэ шIы­кIэм тетэу хэгъэгур къэу­ухъумэнымкIэ мыр амалыкIэу щыт. ТызэкIэплъэжьымэ, дзэ кафедрэ къэзыухыгъэхэу гъэ­хъэгъэ инхэр зышIыгъэхэр, Уры­сыем и ЛIыхъужъ хъугъэхэр тиIэх, — къыIуагъ Къоджэ Аслъан.
Дзэ егъэджэн гупчэр непэрэ лъэхъаным ищыкIэгъэ шъып­къэу зэрэщытыр нэмыкIэу къэгущыIагъэхэми къыхагъэщыгъ.

Непэрэ мафэм мыщ нэбгыри 180-рэ фэдиз чIэс, апэрэ курсым щеджэхэрэ 90-мэ курсант зэрэхъугъэхэр къэзыушыхьатырэ тхылъхэр нэужым аратыжьыгъэх.
Дзэ егъэджэн гупчэм ипащэу Нурлан Самадьяновым къызэриIуагъэмкIэ, сэнэхьатэу зэрагъэгъотырэм елъытыгъэу илъэсрэ ныкъорэ е илъэситIум къыкIоцI егъэджэнхэр зэхащэх, а уахътэм зэрыгушхонхэу бэ къадэхъугъ. Егъэджэн-лабораторнэ лъэпсэ дэгъу яI, еджэпIэ классхэр, Iашэр зычIэлъыщт чIыпIэр зэтырагъэпсы­хьагъэх. Практическэ IофшIэнхэр агъэцэкIэнхэмкIэ Iэмэ-­псымэхэр зэкIэ яIэх. УФ-м и УIэшыгъэ КIуачIэхэм язапас ныбжьыкIэхэр зэрэхэтыщтхэм имызакъоу, шIэныгъэу зэра­гъэгъотырэм ишIогъэшхо къызэрэкIощтыр, непэрэ мафэм мэхьанэшхо зиIэ сэнэхьат яIэу гупчэр къызэраухыщтыр пащэм къыIуагъ.
Мыщ щеджэрэ студентхэм хэушъхьафыкIыгъэу компьютерхэм акIэрысхэу, виртуальнэ нэгъунджэхэр акIэлъхэу цIыф зэрымыс быбырэ пкъыгъохэр зэрэбгъэIорышIэщтхэр зэрагъа­шIэ, ахэр полигоным ащэх, дзэ къулыкъум епхыгъэ лъэныкъо­хэм афагъасэх. Джащ фэдэу цIыф зэрымыс быбырэ пкъы­гъохэр зэрэзэхэпхыщтхэр, зэрэ­зэхэплъхьащтхэр, зэрэбгъэфедэщтхэр зэрагъашIэ. Ащ нэмыкIэу, дрон зэфэшъхьафхэм язэхэ­лъыкIэ курсантхэм арагъэлъэгъущт, нэужым ахэр агъэфедэнхэ алъэкIыным фагъэсэщтых.
Мыекъопэ къэралыгъо технологическэ университетым еп­хыгъэ къутамэу Яблоновскэм дэ­тым щеджэрэ студентхэу Дзэ егъэджэн гупчэм чIэсхэм къызэрэтаIуагъэмкIэ, мыщ къызэ­рэчIэхьагъэхэм рэгушхох. Хъулъ­фыгъэ пэпчъ дзэм епхыгъэ пстэури ышIэн фаеу алъытэ. НэбгыритIумэ таможеннэ IофымкIэ сэнэхьатэу зэрагъэ­гъотырэм дакIоу дзэм ылъэныкъокIи ухьазырыныгъэ зэря­Iэщтым ишIуагъэ къэкIощтэу алъытэ.
Шъугу къэдгъэкIыжьын, джырэкIэ цIыф зэрымыс быбырэ пкъыгъохэм ядзэхэр Урысыем иIэхэ зэрэхъугъэр. УФ-м зы­къэухъумэжьынымкIэ и Ми­нистерствэ мы лъэныкъомкIэ операторхэм яугъоин ыублагъ. Фэдэ шIоигъоныгъэ зиIэхэм зыщыпсэухэрэм ащыIэ дзэ комиссариатхэм защарагъэтхы­шъущт. УпчIэ зиIэхэм зызда­гъэзэшъущтыр: къ. Мыекъуапэ, ур. Комсомольскэр, 217-рэ, я 119-рэ, 102-рэ кабинетхэр, е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр: 117#4 ыкIи 8 (8772) 52-11-28.
ДЕЛЭКЪО Анет.