Советскэ дзэхэр Афганистан къызыращыжьыгъэхэр илъэс 37-рэ зэрэхъугъэм фэгъэхьыгъэ шIэжь зэхахьэ саугъэтэу «ДзэкIолIым ипсынэкIэчъ» зыфиIорэм щыкIуагъ. Хэгъэгум игъунапкъэ шIокIэу щыкIогъэ зэо зэфэшъхьафхэм ахэлэжьэгъэ дзэкIолIхэм яшIэжь мафэу мыр хагъэунэфыкIы.

Iофтхьабзэм хэлэжьагъэх Адыгэ Рес­публикэм ихэбзэ къулыкъушIэхэр, дзэкIолI-интернационалистхэр, Мыекъопэ гарнизоным къулыкъур щызыхьыхэрэр, общественнэ движениехэм ялIыкIохэр, ны-тыхэр, фэхыгъэхэм яIахьылхэр, яныбджэгъухэр, ныбжьыкIэхэр.
Адыгеим и ЛIышъхьэу КъумпIыл Мурат ыкIи АР-м и Парламент идепутатхэм ацIэкIэ къэзэрэугъоигъэхэм закъыфигъэ­загъ Урысыем и ЛIыхъужъэу Цэй Эдуард. Советскэ Союзым инэбгырэ мин 15 зыхэкIодэгъэ Афган заор тикъэралыгъо итарихъ инэкIубгъо чIыпIэ гъэнэфагъэ зэрэщиубытыгъэр ащ хигъэунэфыкIыгъ.
— Хэгъэгум игъунапкъэ шIокIэу щыкIогъэ зэо зэфэшъхьафхэм ахэлэжьэгъэ дзэкIолIхэм, ахэкIодагъэу къэзымыгъэзэжьыгъэхэм яшIэжь шъхьащэ фэтэшIы, ягупсэхэм ялыуз адэтэгощы. ДзэкIолI- интернационалист шъыпкъэхэр сыдигъокIи Хэгъэгум икъэухъумэн зэрэIутхэм тырэгушхо, ащ шIулъэгъоу фыряIэр анахь лъапIэу алъытэ, — къыIуагъ Цэй Эдуард.
Нэужым Iофтхьабзэм къыщыгущыIагъэх Мыекъопэ къэлэ администрацием, ветеран организациехэм ялIыкIохэр. Гушъхьэ кIуачIэу яIэр, патриот шъыпкъэу зэрэщытхэр тидзэкIолIхэм Афганистан къызэрэщагъэлъэгъуагъэр, яинтернациональнэ пшъэрылъ зэрагъэцэкIагъэр къэгущыIэгъэ пстэуми къыхагъэщыгъ. Джащ фэдэу непи Урысыем и УIэшыгъэ КIуачIэхэм дзэкIолI-интернационалистхэр ахэтхэу неонацизмэм пэуцужьыгъэнымкIэ Президентэу Владимир Путиным къыгъэуцугъэ пшъэрылъхэр агъэцакIэх. ТекIоныгъэр тиеу, ахэр псаухэу къэкIожьынхэу афэлъэIуагъэх. Заом хэлэжьагъэхэм лIыгъэу зэрахьагъэр тщыгъупшэ зэрэмыхъущтыр хагъэу­нэфыкIыгъ.
Зэхахьэм хэлэжьагъэхэм Афганистан щыфэхыгъэ тидзэкIолIхэм шъхьащэ афашIыгъ, зы такъикъэ афэшъыгъуагъэх. Саугъэтэу пчэгум итым къэгъагъэхэр кIэлъыралъхьагъэх.
Iэшъынэ Сусан.