Адыгеим и ЛIышъхьэу, Урысые политическэ партиеу «Единэ Россием» ишъолъыр къутамэ и Секретарэу КъумпIыл Мурат АР-м и Правительствэ зычIэт унэм IофшIэгъу зэхэсыгъоу щыкIуагъэм республикэм хэхъоныгъэ езыгъэшIыщт амалхэр нахь шIуагъэ къытэу гъэфедэгъэнхэмкIэ министрэхэм я Кабинет хэтхэм пшъэрылъ заулэ къащыфишIыгъ.

Ахэм зэу ащыщ цIыфхэр къыхэлажьэхэзэ бюджетыр зэрагъэпсырэм нахь зегъэушъомбгъугъэныр. Ащ фэдэ шIыкIэм тетэу цIыфхэр бюджет Iофым къыхагъэ­лажьэх, зыщыпсэухэрэ чIыпIэмкIэ апшъэ­рэ мэхьанэ зиIэ проектхэр къыхахы, ахэм япхырыщын мылъкъоу пэIухьэрэр республикэ, чIыпIэ бюджетхэм къахагъэ­кIы, цIыфхэм яахъщи ащкIэ къызфагъэ­федэ.
АР-м иминистрэхэм я Кабинет и Тхьаматэ игуадзэу, финансхэмкIэ иминистрэу Виктор Орловым зэхэсыгъом къызэрэщиIуагъэмкIэ, 2018-рэ илъэсым къыщегъэжьагъэу цIыфхэм къыхахыгъэ проекти 163-рэ республикэм щагъэцэ­кIагъ. Кощхьэблэ районым проект 58-рэ, Джэджэ районым — 37-рэ, Теуцожьым — 29-рэ ащыпхыращыгъ. Ахэм сомэ миллион 325,5-у апэIухьагъэр респуб­ликэ, чIыпIэ бюджетхэм къахэ­кIыгъ, цIыфхэми, спонсорхэми яахъщэ къахалъхьагъ. ЧIыпIэ мэхьанэ зиIэ Iофыгъохэм язэшIохынкIэ лъэныкъо шъхьа­Iэу цIыфхэм алъытэхэрэр бэмэ зэдагъэфе­дэ­рэ чIыпIэхэм язэтегъэпсыхьан, гъогу­хэм ягъэцэкIэ­жьын, культурэ кIэнхэм якъэухъумэн ары.
2025-рэ илъэсым тхылъ 45-рэ къаIэ­кIэхьэгъагъ, 2018-м егъэпшагъэмэ, фэди 5,6-кIэ ар нахьыб. ГъэрекIо проектхэм пстэумкIи сомэ миллиони 116,6-рэ апэIухьагъ. Ащ щыщэу сомэ миллион 77,2-рэ хъурэ субсидиехэр республикэ бюджетым къыхагъэкIыгъэх.
А гухэлъхэм апае республикэ бюджетым нахьыбэу мылъкур къыхэгъэкIыгъэн фаеу АР-м финансхэмкIэ и Министерствэ зэрилъытагъэм Адыгеим и ЛIышъхьэ къыдыригъэштагъ. Ащ ишIуа­гъэкIэ игъоу алъэгъугъэ проектхэр зэкIэ гъэрекIо пхыращыгъэх. КIэлэеджакIохэр общественнэ зэхъокIыныгъэхэм ахэлэжьэнхэм фэгъэхьазырыгъэнхэмкIэ еджапIэхэм япхыгъэ бюджетированием зегъэушъомбгъугъэн зэрэфаеми Адыгеим и ЛIышъхьэ къыдыригъэштагъ.
АщкIэ апэрэ проектыр зыщагъэцэкIагъэр Кощхьэблэ районыр ары. Ащ шIуа­гъэ къызэритырэр нафэ къызэхъум, гъэрекIо щегъэжьагъэу республикэм иеджэпIэ пстэуми ащагъэфедэ хъугъэ. Проекти 10-у атекIуагъэхэм япхырыщын сомэ мин 350-рэ зырыз пэIуагъэхьагъ. ЧIыпIэхэм язигъо Iофыгъохэм язэшIохын ныбжьыкIэхэр нахьыбэу къыхэгъэлэжьэгъэнхэм тегъэпсыхьагъэу мы илъэсым щегъэжьагъэу а Iофым нахь зырагъэу­шъомбгъущт.
Виктор Орловым къызэриIуагъэмкIэ, ныбжьыкIэ сообществэхэр, зыныбжь илъэс 35-м нэмысыгъэхэр, студентхэр, зыныбжь илъэс 16 хъугъэ кIэлэеджакIо­хэр зыхэлэжьэщтхэ программэхэр мыгъэ агъэцэкIэщтых. Ащ ныбжьыкIэхэм ятворческэ амалхэм нахь заригъэушъом­бгъущт, пшъэдэкIыжь зэрахьырэр нахь зэхарагъэшIэщт.
ПстэумкIи цIыфхэм къыхахыгъэ проектхэм мыгъэ сомэ миллион 30 апэIуа­гъэхьащт, ныбжьыкIэхэм атегъэпсыхьагъэм — сомэ миллиони 3,5-рэ.
Адыгеим и ЛIышъхьэ цIыфхэр къыхэ­лажьэхэзэ агъэпсырэ бюджетым депутатхэр нахь чанэу къыхагъэлэжьэнхэу игъо ылъэгъугъ. КъумпIыл Мурат зэрэхигъэунэфыкIыгъэмкIэ, агъэцэкIэгъэ проектхэм дэгъоу къагъэлъэгъуагъ чIыпIэ зыгъэIорышIэжьыным икъулыкъухэм яIофышIэхэмкIи, ежь псэупIэхэм адэс­хэмкIи ащ фэдэ шIыкIэм шIогъэшхо къызэритырэр.
«ЦIыфхэр гъэпсын Iофхэм нахь къа­фэIэтыгъэнхэ, шIагъэу щыIэхэм афэсакъхэу ахэр гъэсэгъэнхэ фае. ЧIыпIэ мэхьанэ зиIэ Iофыгъохэм, «Единэ Россием» инароднэ программэхэм язэшIохынкIэ цIыфхэр къыхэлажьэхэзэ агъэпсырэ бюджетыр анахь шIогъэшхо къэзытыхэрэм ащыщ. Ары пакIошъ, ныбжьыкIэхэм проектхэр къызэрэхахырэм пэщэныгъэ зэрахьанымкIэ амалэу яIэхэм зыкъызэIуарегъэхы, республикэм инеущрэ мафэ зыфэдэщтымкIэ пшъэ­дэкIыжь зэрахьырэр къагурыIоу егъасэх», — къыIуагъ КъумпIыл Мурат.

АР-м и ЛIышъхьэ ипресс-къулыкъу къытырэ къэбархэмкIэ ЛIышэ Саныет.