Общественнэ движениеу «Адыгэ Хасэм» изичэзыу хэдзын-зэфэхьысыжь зэфэс тхьаумафэм Мыекъуапэ щыкIуагъ. Лъэхъанэу къызэтынэкIыгъэм Хэсашъхьэм иIофшIэн зыфэдагъэр ащ щызэфахьысыжьыгъ ыкIи СоветыкIэм хэтыщтхэм амакъэхэр афатыгъэх, нэужым ахэм общественнэ движением итхьамэтакIэ хадзыжьыгъ.

Республикэм ирайонхэм ялIыкIо 400 фэдиз ащ къекIолIагъэх.
Адыгэ Республикэм и ЛIышъхьэу Къум­пIыл Мурат зэфэсым хэлэжьагъ. Джащ фэдэу къырагъэблэгъагъэхэм ащыщых Урысыем IофшIэнымкIэ и ЛIыхъужъэу, тхакIоу МэщбэшIэ Исхьакъ, Дунэе Адыгэ Хасэм итхьаматэу Сэхъурэкъо Хьаути, АР-м и Къэралыгъо Совет — Хасэм и Тхьаматэ игуадзэу Iэщэ Мухьамэд, Адыгеим инахьыжъхэм я Совет итхьаматэу ГъукIэлI Нурбый, АР-м иминистрэхэм я Кабинет хэтхэр, муниципальнэ псэупIэхэм япащэхэр, диндэлэжьапIэхэм, лъэпкъ-культурнэ зэхахьэхэм ялIыкIохэр, шIэныгъэлэжьхэр, общественнэ IофышIэхэр.
Зэфэсым хэлажьэхэрэм закъыфигъа­зэзэ КъумпIыл Мурат рэзэныгъэ гущыIэхэр апигъохыгъэх Адыгэ Хасэм хэтхэм республикэмкIи, къэралыгъомкIи мэхьэнэ ин зиIэ Iофыгъо зэфэшъхьафхэмкIэ IэпыIэгъу зэрэхъухэрэм пае.
— Адыгэ Хасэр тишъолъыркIэ анахь мэхьанэ зиIэ общественнэ организациеу щыт. Тиреспублики, зэрэкъэралыгъуи лъэпкъхэмрэ динхэмрэ азыфагу зэзэгъы­ныгъэу арылъыр ылъапсэу хэхъоныгъэ ашIы, ар тикъэралыгъо ыкIочIэ шъхьаI. Адыгеим ис лъэпкъхэм языкIыныгъэ Хасэм къеухъумэ, адыгабзэмрэ адыгэ культурэмрэ якъызэтегъэнэн епхыгъэ Iофыгъохэр шIуагъэ хэлъэу зэшIуехых, IэкIыбым ис тилъэпкъэгъухэм зэпхыныгъэ адыриI, къэзыгъэзэжьыгъэхэм яIэпыIэгъу. Президентэу Владимир Путиным Урысыем ис лъэпкъхэм языкIыныгъэ и Илъэсэу ыгъэнэфагъэм ипшъэрылъхэм ягъэцэкIэнкIэ иIахьышIу къыхелъхьэ. Сафэраз мэхьанэшхо зиIэ Iофэу зэра­хьэрэмкIэ, — къы­щиIуагъ зэфэсым КъумпIыл Мурат.
ТекIоныгъэшхор къы­зыдахыгъэр илъэс 80 зэрэхъугъэм ихэгъэ­у­нэфыкIын яIа­хьышIу зэрэхашIыхьагъэм, джащ фэдэу хэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу зэрафэхъухэ­рэм афэшI общественнэ движением хэтхэм зэрафэразэр КъумпIыл Мурат ариIуагъ.
Общественнэ движениеу «Адыгэ Хасэм» иIофышIэ чанхэу Къуижъ Къэплъанрэ Хьа­джый Адамрэ АР-м и ЛIышъхьэ ищытхъу тхылъхэр, джащ фэдэу Жанэ Бюлент ТIахьир ыкIи Тыкъэ Заур рес­пуб­ликэм ипащэ ирэзэныгъэ тхылъхэр аратыжьыгъэх.
Нэужым аужырэ илъэсищым Адыгэ Хасэм зэшIуихыгъэ IофшIэныр къызэфихьысыжьыгъ ащ итхьаматэу ЛIымыщэкъо Рэмэзан. Сыд фэдэрэ уахъти зэрэщытыгъэу, ар зытегъэпсыхьэгъагъэр адыгабзэм, адыгэ культурэм якъызэтегъэнэн, яхэхъоныгъ, тилъэпкъэгъухэм IэпыIэгъу ягъэгъотыгъэныр, лъэпкъхэм языкIыныгъ, шъолъыр ыкIи федеральнэ Iофтхьабзэхэм ахэлэжьэгъэныр.
Адыгеим ипрезидентыгъэу, шIушIакIоу Шъэумэн Хьазрэт 2023-рэ илъэсым Тыр­куемрэ Шамрэ чIыгур защэсысым мыщ щыпсэурэ тилъэпкъэгъухэм ахъщэкIэ IэпыIэгъу зэрафэхъугъэр ЛIымыщэкъо Рэмэзан къыхигъэщыгъ. Мы илъэсым республикэм осышхоу къы­щесыгъэм къыздихьыгъэ гумэкIыгъохэм ыкIи АдыгеякIэм зэрарэу пыим къафихьыгъэм ядэгъэзыжьын афэгъэхьыгъэ Iофтхьабзэхэм Адыгэ Хасэм хэтхэр чанэу ахэлэжьагъэх. Тхьаматэм ынаIэ зытыригъэ­тыгъэр лъэпкъ ыкIи дин зэфыщытыкIэхэр гъэпытэгъэнхэмкIэ шъолъырым ит лъэпкъ- культурнэ зэхахьэхэм зэпхыныгъэ адыряIэу Iоф зэрэзэдашIэрэр ары.
ХэушъхьафыкIыгъэ дзэ операцием хэлажьэхэрэм яунагъохэм IэпыIэгъу афэхъух. Ахэм ащыщ Джэджэ районым щыпсэурэ унэгъо Iужъоу Голдовхэр. Зэшъхьэгъусэхэм ялъфыгъэ 14-м щыщэу нэбгыриплIыр хэушъхьафыкIыгъэ дзэ операцием щыIэх.
Зэфэсым къыщыгущыIагъэх ДАХ-м итхьаматэу Сэхъурэкъо Хьаути, АР-м ибзылъфыгъэхэм я Союз итхьаматэу Вэрэкъо Хьалимэт, АР-м ыкIи Пшызэ шъолъыр ащыпсэурэ быслъымэн­хэм я ДиндэлэжьапIэ имуфтиеу Къэр­дэнэ Аскэрбый, гуманитар ушэтынхэмкIэ Адыгэ республикэ институтым ипащэу ЛIыIужъу Адам, хэсашъхьэм хэтэу Мэщ­фэшIу Нэдждэт, нэмыкIхэри.
Адыгэ Хасэм Iофэу ышIагъэмкIэ яеп­лъыкIэхэр зэфэсым шъхьэихыгъэ къыщашIыгъэх, ащ иIофшIэн уигъэрэзэнэу зэрэщытыгъэр хагъэунэфыкIыгъ. ГумэкIыгъоу щыIэхэмкIэ хэкIыпIэу алъэгъухэ­рэр къэгущыIагъэхэм къыраIотыкIыгъэх. Адыгабзэм изэгъэшIэнкIэ, тилъэпкъэгъу­хэм сабыеу къафэхъурэм ипчъагъэ хэ­гъэ­хъогъэнымкIэ джыри Iофыгъуабэ къызэрэуцурэм елъытыгъэу унашъохэри зэфэсым щаштагъэх.
Нэужым Советым хэхьащтхэм ацIэ къараIуагъ, ахэр хадзыгъэх, Адыгэ Хасэм итхьаматэу ЛIымыщэкъо Рэмэзан илъэсищ пIалъэкIэ хадзыжьыгъ.
— СыфэгушIо Рэмэзан цыхьэу къыфашIыгъэмкIэ ыкIи тапэкIэ Iофэу ышIэщтым гъэхъагъэхэр щишIынхэу сыфэлъа­Iо! Сицыхьэ телъ Адыгэ Хасэм ипащэхэмрэ ащ хэтхэмрэ унашъоу ашIыхэрэр, ыпэкIэ зэрэщытыгъэм фэдэу, шъолъырым хэхъоныгъэ ышIыным, щыIэкIэшIу илъыным зэрэфэIорышIэщтхэр, — къыIуагъ КъумпIыл Мурат.
КIАРЭ Фатим.