Хабзэ зэрэхъугъэу, Урысые студент отрядхэм я Мафэ мэзаем и 17-м хагъэунэфыкIы. Тикъэралыгъо иныбжьыкIэ организацие анахь инхэм ар ащыщ. Охътэ гъэнэфагъэкIэ IофшIэпIэ чIыпIэхэр ныбжьыкIэхэм арагъэгъотынхэр, граждан ыкIи патриотическэ пIуныгъэм епхыгъэ Iофыгъохэр зэшIуахынхэр, творчествэм ыкIи спортым алъэныкъокIэ IэпэIэсэныгъэу аIэкIэлъым хагъэхъоныр ары пшъэрылъ шъхьаIэу зыфагъэуцужьырэр.

2004-рэ илъэсым къыщегъэжьагъэу общественнэ организациеу «Урысыем истудент отрядхэр» зыфиIорэм и Адыгэ шъолъыр къутамэ республикэм къыщызэIуахыгъэу Iоф ешIэ. Илъэс пчъагъэ хъугъэу зэшъхьэгъусэхэу Борсук Ярославрэ Ольгэрэ ащ ипащэх. Ярослав правлением итхьамат, Ольгэ 2017-рэ илъэсым къыщегъэжьагъэу шъо­лъыр штабым ипащ. Мыщ хэтхэм яшIэныгъэ­хэм зэрахагъэхъощтым, шIуагъэ къэзыхьыщт Iофтхьабзэхэр зэрэзэхащэщтхэм ыуж итых. Лъэныкъо зэфэ­шъхьаф­хэмкIэ грантхэр къахьых, яIоф­шIэнкIэ гъэхъагъэхэр ашIых. Патриотическэ пIуныгъэми отрядым мэхьанэшхо реты, «Къыблэ десант» зыфиIорэ Iоф­тхьабзэм чанэу хэлажьэ.
МэфэкIым ипэгъокIэу отрядым илъэ­ныкъохэм ащыщэу хэбзэухъумэным фэгъэзагъэм ипащэу, шъолъыр къутамэм итхьаматэ игуадзэу Олег Носиковым гущыIэгъу тыфэхъугъ.

— МэфэкIым зэрифэшъуашэу тыкъекIолIагъ. Мыекъопэ къэралыгъо технологическэ университетым икъутамэу Яблоновскэм дэтым мэфэкI шIыкIэм тетэу апэрэ муниципальнэ штаб къыщызэIутэхы. Студентхэр отрядым къыхэхьанхэу хьазырых, — къыIуагъ тигущыIэгъу.
Олег илъэси 8 хъугъэ чанэу ипшъэ­рылъхэр зигъэцакIэрэр. Ащ къызэри­IуагъэмкIэ, полицием иIофышIэхэм IэпыIэгъу афэхъух, зыщищыкIагъэм общественнэ щынэгъончъэныр къаухъумэ, джащ фэдэу дунэе хъытыум къихьэрэ къэбар нэпцIхэр игъом къыхэгъэщыгъэн­хэм ыуж итых. Ащ нэмыкIэу Iофтхьэбзэ зэфэшъхьафхэм ахэлажьэх, анахьэу патриотическэ мэхьанэ зиIэхэм анаIэ атырагъэты, «Снежный десант», «Пок­лонимся великим тем годам» зыфи­Iохэрэр зэхащэх. ШIушIэ Iофтхьабзэхэм ренэу ахэлажьэх, хэушъхьафыкIыгъэ дзэ операцием щыIэхэм апае остыгъэхэр ыкIи нэмыкI пкъыгъо зэфэшъхьафхэр ашIых, зэуапIэм Iутхэм ахэр афара­гъащэх.

Шъолъыр къутамэм лъэныкъуи 6-кIэ Iоф ешIэ: псэолъэшIынымкIэ, медицинэмкIэ, сервисымкIэ, хэбзэухъумэнымкIэ ыкIи бэмышIэу кIэу къыхэхьэгъэ «проводники РЖД» зыфиIорэмкIэ. Шъхьадж зыфэе лъэныкъом елъытыгъэу гъэсэныгъэ тедзэ зэригъэгъотын амал иI, ащ дакIоу зыгъэпсэфыгъо лъэхъаным Iоф­шIэпIэ чIыпIэхэр къафагъоты.
— Анахь мэхьанэ зиIэ IофшIэнэу дгъэцакIэрэр студентхэм Iоф­шIэпIэ чIыпIэхэр къафэдгъотыныр ары. Федеральнэ ахъщэу къатIупщырэмкIэ гурыт сэнэхьат языгъэгъотырэ еджапIэхэм зэзэгъыныгъэ адытиIэу студентхэр рагъаджэх. Анахьэу Iоф зыдатшIэрэр Мыекъопэ къэралыгъо гуманитар-техническэ колледжыр ары. Егъэджэнхэм ауж, шапхъэу пылъымкIэ, охътэ гъэнэфагъэм къыкIоцI студентхэм Iоф ашIэн фае. Анахьэу пщэрыхьакIохэр, хьакIэщхэм аIутыщтхэр ары ящыкIагъэхэр. НыбжьыкIэхэм Iоф зыщашIэщт чIыпIэхэр къыхэтхыхэ зыхъукIэ, ахэр гупсэфэу зыщыпсэунхэ алъэ­кIыщт ыкIи ыпкIэ зылъамытыщтхэр къафэдгъотынхэм тыпылъ, — еIо Олег.
Студентым сэнэхьат шъхьаIэу зэригъэгъотырэм имызакъоу, ыгукIэ зыфэщэгъэ лъэныкъом ыпкIэ хэмылъэу зыфигъэсэн амал иIэным мэхьанэшхо иI. ДжырэкIэ анахьэу къыхахырэр «сервис» зыфиIорэм щылэжьэнхэр ары, ахэм сомэ мини 100-м ехъу лэжьапкIэ къахьы. Мы лъэныкъом ипащэу Александр Деревенкэр 2017-рэ илъэсым къыщегъэ­жьагъэу студент отрядым хэт. «Хьалыжъожъыехэр» зыфиIорэ купэу зэхищагъэм гъэхъэгъэшIухэр ешIых, зэнэ­къокъу зэфэшъхьафхэм ахэлажьэ ыкIи текIоныгъэхэр къыдехых. Адыгеим имызакъоу, нэмыкI чIыпIэхэми студентхэм IофшIапIэ ащарагъэгъоты, анахьэу кIэлэцIыкIу лагерьхэм, хьакIэщхэм пщэрыхьакIохэу, барменхэу, официантхэу макIох.

Илъэс еджэгъум къыхэфэрэ зыгъэ­псэфыгъо уахътэм Iоф зышIэ зышIоигъо ныбжьыкIэхэр Урысые студент отрядым хэхьанхэ фае. Гъэмэфэ зыгъэпсэфыгъо уахътэр шIуагъэ хэлъэу зыгъэкIон, Iоф зышIэн мурад зиIэхэмкIэ ар амалышIу.
Мыщ фэдэ шIыкIэм ишIуагъэкIэ ныбжьыкIэхэм ахъщэ къазэраIэкIахьэрэм дакIоу, IофшIэнымкIэ IэпэIэсэныгъэ зэрагъэгъоты, нэужым, еджэныр заухыкIэ, зыщылэжьэщтхэ чIыпIэр къыхэхыгъошIу афэхъу.

ДЕЛЭКЪО Анет.