УФ-м зыкъэухъумэжьынымкIэ и Министерствэ цIыф зэрымыс быбырэ пкъыгъохэм (БПЛА) ­яоператор сэнэхьатым фырагъэджэщтхэм ­яугъоин ригъэжьагъ.

Хэгъэгур къэухъумэгъэнымкIэ амалыкIэу щыIэм ишапхъэхэр, пшъэрылъхэр, Iофтхьабзэу рагъэкIокIыхэрэр «Адыгэ макъэм» къыфиIотагъ Мыекъопэ районым идзэ комиссариат ипащэу Григорий Капуста.
Шъугу къэдгъэкIыжьын, цIыф зэрымыс быбырэ пкъыгъохэр зыгъэIорышIэщтхэм ядзэ кIэу агъэпсы. ХэушъхьафыкIыгъэ дзэ операциер зыщыкIорэ лъэхъаным къыщынэфагъэхэм ащыщ зэонымкIэ шIыкIэ-амалэу щыIэ­хэр ыпэрэхэм афэмыдэу зэрэзэ­хъо­кIыгъэхэр. Пыим нахьыбэу ыгъэ­федэрэр авиациер ары, жьым хэт зэпэуцужь ригъэкIокIырэр. Ащ епхыгъэу джы подразделениякIэм игъэпсын фежьагъэх. Джырэ дзэм мыр анахь ищыкIэ­гъэ сэнэхьатхэм ащыщ, ахэр ары дронхэр зыгъэIоры­шIэхэрэр, дзэ IофымкIэ пшъэ­рылъ шъхьа­Iэхэр зэшIозыхы­хэрэр.
— ЦIыф зэрымыс быбырэ авиацием зэзэгъыныгъэ шIыкIэм тетэу къулыкъу щызыхьыщтхэм яугъоин мы уахътэм зыуж титыр. Мыекъопэ районым къыхиубы­тэрэ псэупIэхэр къэтэкIухьэх. Анахьэу зэIукIэгъухэр зыдытиIэ­хэр илъэс 18 — 35-рэ зыныбжь­хэр ары. БэмышIэу Каменномост­скэм дэт техникумым тыщыIагъ. КъытэдэIугъэхэм ащыщ еджэныр къызиухыкIэ а сэнэхьатыр къыхихынэу шIоигъоныгъэ зэриIэр къытиIуагъ. Джащ фэдэу Тимиря­зевым щыпсэухэрэми таIукIагъ. План гъэнэфагъэ тиIэу мэзаер екIыфэ мы дзэхэм ахэхьащтхэм яугъоин ыуж титыщт, — хигъэу­нэфыкIыгъ Григорий Капуста.
Мыекъопэ районым идзэ комиссар къызэриIуагъэмкIэ, муниципалитетхэм япащэхэм, хэгъэгу кIоцI IофхэмкIэ къулыкъу­хэм, общественнэ организацие­хэм ялIыкIохэм зэпхыныгъэ пытэ зэдыряIэу а Iофтхьабзэр зэра­хьэ. Мы охътэ кIэкIым мыбэми, мы районым щыщ нэбгыритIу зэзэгъыныгъэм кIэтхагъэх. Ахэр Мыекъуапэ идзэ частьхэм ащыщ кIогъахэх.
— ГъэрекIопагъи, икIыгъэ илъэс­ми зэзэгъыныгъэ шIыкIэм тетэу дзэ къулыкъу хьыгъэнымкIэ тидзэ комиссариат къыфагъэуцугъэ пшъэрылъыр щытхъу хэлъэу ыгъэцэкIагъ. 2026-рэ илъэсми амал зэриIэкIэ а шап­хъэхэм тадэхыщтэп, джы подразделениякIэу агъэпсырэми шIуагъэу пылъхэр тиныбжьыкIэ­хэм агурыдгъэIощт. ЫпэкIэ къе­жьэгъэ зэзэгъыныгъэм мыр зэ­рэтекIырэр къагурыIон фае. Зэзэгъыныгъэм зы илъэс пIалъэ­кIэ цIыфыр кIэтхэ, а пIалъэр зи­ухыкIэ къэкIожьын ылъэкIыщт, шIоигъоныгъэ зиIэм лъигъэкIотэн фит. ЦIыф зэрымыс быбырэ авиацием зэзэгъыныгъэ шIыкIэм тетэу къулыкъу щызыхьыщтхэм Iашэ амыIыгъэу, окопхэм адэмысхэу пыим ебэныщтых, ятIо­нэ­рэ, ящэнэрэ линиехэм атетхэу япшъэрылъхэр агъэцэкIэщтых. Аэроразведкэр зэрахьэ, пыим ипытIапIэхэм алъэплъэх, зыщызэощтхэ чIыпIэр агъэнафэ, нэмыкIхэри. Зэтыгъо ахъщэ тынэу сомэ миллиони 2,4-рэ къара­тыщт, дзэкъулыкъушIэхэм яIэ фэ­гъэкIотэнхэр зэкIэ мыхэм къа­фэнэщт, — къыхигъэщыгъ Григорий Капуста.
Ежь тигущыIэгъуи хэушъхьафыкIыгъэ дзэ операцием 2022-рэ илъэсым гуфакIоу щыIагъ. Суворовым ыцIэ зыхьырэ бгъэ­халъхьэр къыфагъэшъошагъ.
Джы зыIут IэнатIэр бэшIагъэп зигъэцакIэрэр, мы илъэсым ищылэ мазэ къыщегъэжьагъ. Ащ ыпэкIэ дзэ IофымкIэ чIыпIэ зэфэшъхьаф­хэм къулыкъу ащи­хьыгъ, аужырэр — зэзэгъыныгъэ шIыкIэм тетэу къулыкъу зыхьыщтхэм якъыхэхынкIэ пунк­тым ипэщагъ. Арышъ, Хэгъэгур къэухъумэгъэным имэхьанэ къызгурыIорэ цIыф.
Григорий Капуста ныбжьыкIэхэм зафегъазэ:
— Джырэ уахътэм цIыф зэрымыс быбырэ системэхэр зыщагъэфедэрэ лъэныкъохэм зарагъэушъомбгъу, дзэм нэмыкIэу тищыIэныгъи ахэр жъугъэу къы­хэхьагъэх. Лъэхъаным диштэрэ сэнэхьатыр тапэкIи граждан щыIэныгъэм щагъэфедэжьышъун алъэкIыщт. Арышъ, мы амалыкIэмкIэ зи Хэгъэгу къэзыухъумэ зышIоигъо пстэури ти­дзэ комиссариат къетэгъэблагъэх. Тыз­дэщыIэр: Мыекъопэ район, поселкэу Тульскэр, ур. Октябрьскэр, 20, телефоныр — 8 (87777) 5-15-60.
Фэдэ шIоигъоныгъэ зиIэхэу Мыекъуапэ щыпсэухэрэм дзэ ко­миссариатым зыщарагъэтхы­шъущт. УпчIэ зиIэхэм зыздагъэ­зэшъущтыр: къ. Мыекъуапэ, ур. Комсомольскэр, 217-рэ, я 119, 102-рэ кабинетхэр, е теле­фонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр: 117#4 ыкIи 8 (8772) 52-11-28.
Джащ фэдэу шъхьадж шъузщыпсэурэ чIыпIэм щыIэ дзэ комиссариатым зыфэжъугъа­зэмэ, шъуищыкIэгъэ къэбарыр яжъугъотылIэщт.
Iэшъынэ Сусан.