ХэушъхьафыкIыгъэ дзэ операцием иветеран иунэе Iоф къызэIуихыным фэшI апэрэу Адыгеим социальнэ зэзэ­гъыныгъэмкIэ IэпыIэгъу щыратыгъ.

Партиеу «Единэ Россием» иIэпыIэ­гъукIэ социальнэ зэзэгъыныгъэм ипрограммэ республикэм зыщеушъомбгъу. 2026-рэ илъэсым щылэ мазэм и 1-м къыщегъэжьагъэу хэушъхьафыкIыгъэ дзэ операцием хэлэжьагъэхэм яунэе Iоф рагъэжьэнымкIэ социальнэ зэзэгъыныгъэм адыкIэтхэнхэ амал щыIэ хъугъэ ыкIи ащ къыдыхэлъытагъэу, ахэм яунагъо хахъоу иIэм емылъытыгъэу, сомэ мин 350-м нэсэу къаратыщт.
Зэо зэIуупIэныгъэхэм яветеранхэм ащыщэу апэу а IэпыIэгъур къызфэзыгъэфедагъэр Юрий Смирновыр ары. Фондэу «Хэгъэгум иухъумакIохэр» зыфиIорэр иIэпыIэгъоу предпринимательскэ Iофыр зэрихьанымкIэ IэкIэлъ шIэныгъэ­хэр, IэпэIэсэныгъэр ауплъэкIугъ, бизнес-планэу ыгъэхьазырыгъэр къыгъэ­шъыпкъэжьын ылъэкIыгъ ыкIи IэпыIэ­гъур ифэшъуашэу комиссием ылъытагъ.
Шъолъыр фондым къызэритыгъэмкIэ, социальнэ координаторым хэбзэгъэуцугъэу щыIэм зэхъокIыныгъэу фэхъугъэхэр ащ гуригъэIонхэ ыкIи тэрэзэу зэрэзекIощтыр къыфыхихынхэ ылъэкIыгъ. ЗэкIэ Iофым игъэпсын фэгъэзэгъэгъэ специа­листхэм акIуачIэ зэрэзэхэлъыгъэм ишIуа­гъэкIэ зэзэгъыныгъэм къыфыкIэтхагъэх. Джы ветераным шIэхэу иIоф ригъэжьэщт — проектэу «Смирновские колбасы» зыфиIорэр ытIупщыщт.
Шъугу къэдгъэкIыжьын, социальнэ зэзэгъыныгъэр цIыфыр чIыпIэ зэжъум икIынымкIэ амалхэм ащыщ. А IэпыIэ­гъумкIэ уиунэе Iоф къызэIупхын, уихъыз­мэтшIапIэ зебгъэушъомбгъун, IофшIэн улъыхъун, уеджэжьын плъэкIыщт.
2025-рэ илъэсым Адыгеим социальнэ зэзэгъыныгъэр унэгъо 1047-мэ къыз­фагъэфедагъ. Ахэм ащыщэу унэгъо 443-мэ яунэе Iоф къызэIуахыгъ, нэбгыри 159-р икIэрыкIэу зеджэжьхэ нэуж IофшIэн агъотыжьыгъ, унэгъо 298-мэ яунэе хъызмэтшIапIэ зырагъэушъомб­гъуи, бэдзэршIыпIэм ихьанхэ алъэкIыгъ, чIыпIэ зэжъу щыIэныгъэм ригъэуцогъэ унэгъуи 147-мэ IэпыIэгъур аIукIагъ.