Программэм ишIуагъэкIэ
Дэхъо псэупIэ коир зекIоным фытегъэпсыхьэгъэ гупчэу Адыгеим иIэхэм зэу ащыщ. Ащ изегъэушъомбгъун республикэ пащэхэр лъэшэу ыуж итых.
Партиеу «Единэ Россиер» кIэщакIо зыфэхъугъэу, УФ-м и Президентэу Владимир Путиным къыздыригъэштэгъэ программэу социальнэ газификацием фэгъэхьыгъэм къызэрэщыдэлъытагъэу, илъэс заулэкIэ узэкIэIэбэжьмэ зэлъашIэрэ зекIо чIыпIэхэу, псэупIэхэу Гъозэрыплъэрэ Усть-Сахрайрэ, станицэу Дахъом гъэстыныпхъэ шхъуантIэр аIэкIахьэ хъугъэ. Мы программэм ишIуагъэкIэ коим хэхьэрэ псэупIиблыми газым иещэлIэн ащаухыгъ.
— Мы уахътэм къэлэ шъхьаIэм нахь пэIудзыгъэ псэупIэхэм адэсхэр псы къабзэу зашъохэрэмрэ электричествэмрэ зэпыу фэмыхъоу аIэкIэгъэхьэгъэным ыуж тит. Шъолъыр программэхэм амалэу къатырэ пстэур дгъэфедэзэ тхылъэу ищыкIагъэхэр тэгъэхьазырых, къэралыгъо экспертизэхэр зэхэтэщэх. Джащ фэдэу социальнэ псэуалъэхэм якIолIэрэ гъогухэм язэтегъэпсыхьани Iэпэдэлэл тшIыщтэп, тапэкIи культурэм икъоджэ унэхэмрэ кIэлэцIыкIу IыгъыпIэхэмрэ ягъэцэкIэжьыни ыуж тихьащт, — къыIуагъ Мыекъопэ район администрацием ипащэу Михаил Марьиным.