Ацумыжъ Нурбый Мызэбэч ыкъор
Ыныбжь илъэс 74-м итэу идунай ыхъожьыгъ театрэмрэ киномрэ яактерэу, Адыгеим инароднэ артистэу Ацумыжъ Нурбый.
Нурбый Мызэбэч ыкъор мэзэе мазэм и 19-м 1952-рэ илъэсым къуаджэу Афыпсыпэ къыщыхъугъ. 1976-м ащ театрэм, музыкэм ыкIи кинематографием я Ленинград къэралыгъо институт драматическэ искусствэмкIэ и Адыгэ студие къыухыгъ. Джа илъэс дэдэм къыщыублагъэу ащ ищыIэныгъэ Адыгэ къэралыгъо драматическэ театрэм (джы Адыгэ Республикэм и Театральнэ зэхахьэ) епхыгъагъ.
Ацумыжъ Нурбый Iоф ешIэфэ роль 200-м ехъу къышIыгъ IэкIыб, урыс ыкIи лъэпкъ драматургием ялъэхъэнэ зэфэшъхьафхэм япхыгъэу. Къыхэгъэщыгъэн фае, сыд фэдэ роли ежь ышъхьэкIэ къехъулIэу къыпшIуигъэшIэу зэфэдэу дэгъоу къышIыщтыгъэ, еплъыхэрэм лъэшэу якIэсагъ.
2002 — 2008-рэ илъэсхэм Ацумыжъ Нурбый Мыекъуапэ культурэмкIэ игъэIорышIапIэ ипэщагъ, творческэ IофшIэнри ащ ыгъэтIылъыгъэп.
Илъэсыбэ IофшIагъэр щытхъуцIэхэмрэ къэралыгъо тынхэмрэкIэ къыхагъэщыгъ. Искусствэр, культурэр зикIэсэ пстэуми Ацумыжъ Нурбый агухэм лъэуж нэф къаригъэнагъ.