Адыгеим и ЛIышъхьэу КъумпIыл Мурат Адыгэ кIэлэегъэджэ колледжэу Хъ. Андырхъуаем ыцIэ зыхьырэм щыIагъ. Республикэм ипащэ еджэпIэ унэхэр къыплъыхьагъэх, еджэн Iофыр ащ зэрэщызэхэщагъэм зыщигъэгъозагъ, кIэлэегъаджэхэмрэ студентхэмрэ гущыIэгъу афэхъугъ.

АР-м и ЛIышъхьэ зэдэгущыIэгъум илъэхъан къыхигъэщыгъ гъэсэныгъэ зыщарагъэгъотырэ учреждением хэбзэ шIагъохэр ыкIи лъэпсэ дэгъу зэриIэр. Ащ дакIоу колледжым бэмышIэу пащэ фашIыгъэ Марианна Михайловскаям IофшIэнымкIэ гъэхъагъэхэр ышIынхэу фэлъэIуагъ. КъумпIыл Мурат учреждением Iоф щызышIэхэрэм ыкIи щеджэхэрэм афэгушIуагъ бэмышIэу хагъэунэфыкIыгъэ юбилеим фэшI.
Шъугу къэтэгъэкIыжьы: илъэсэу икIыгъэм сэнэхьат гъэсэныгъэ зыщарагъэгъотырэ анахьыжъ учреждениеу рес­публикэм итыр илъэси 100 зэрэхъугъэр хагъэунэфыкIыгъ. А илъэсхэм къакIоцI кIэлэегъэджэ колледжым республикэм иеджапIэхэм апае ыкIи кIэлэцIыкIу Iыгъы­пIэхэм ащылэжьэщт кIэлэпIу мин пчъагъэ къыгъэхьазырыгъ. Ахэм ащыщыбэхэм ягъэсэныгъэ Адыгэ къэралыгъо университетымрэ Мыекъопэ къэралыгъо технологическэ университетымрэ щалъагъэкIотагъ, нэужым апшъэрэ еджа­пIэхэм ыкIи гурыт сэнэхьат еджапIэхэм япрофессорхэм ахэуцуагъэх.
Хэгъэгу зэошхом илъэхъан педучилищыр къэзыухыгъэхэм ащыщхэр заом Iухьэгъагъэх. Нэбгыри 4-р Советскэ Союзым и ЛIыхъужъ хъугъэх. Ахэр: Ан­дырхъое Хъусен, 1967-рэ илъэсым къы­щегъэжьагъэу еджапIэм ащ ыцIэ ехьы, Ацумыжъ Айдэмыр, Бжыхьэкъо Къымчэрый, Нэхэе Даут. Апэрэ адыгэ бзылъфыгъэу летчик хъугъэ Бэгъужъэкъо Лели, СССР-м ичIыдэгъэ промышленность инароднэ комиссарэу заом илъэхъан щытыгъэ Иван Сединми ар къаухыгъ, нэужым Социалистическэ IофшIакIэм и ЛIыхъужъ ар хъугъагъэ. Колледжыр къэ­зыухыгъэхэм ащыщ Урысыем IофшIэным­кIэ и ЛIыхъужъэу, адыгэ тхакIоу МэщбэшIэ Исхьакъ.

«Республикэ кIэлэегъэджэ колледжыр ифэшъошэ шъыпкъэу ­Адыгеим игъэсэныгъэ чIыпIэшхо щызыубытырэ учреж­дениеу щыт. Непэ ащ щеджэхэрэм Адыгеим икъалэхэм, икъуаджэхэм, икъу­тыр­хэм ыкIи инэмыкI псэупIэхэм адэт еджапIэхэмрэ кIэлэцIыкIу Iыгъы­пIэ­хэмрэ Iоф ащашIэщт. Гъэсэныгъэ-­шIэныгъэ ягъэгъотыгъэным ылъапсэ кIэлэ­егъаджэхэм яIэпэIэсэныгъэ, сэнэ­хьатэу хахыгъэм зэрэфэшъыпкъэхэм ыкIи кIэлэцIыкIухэм афыряIэ шIулъэгъум къащежьэ. Шъо Iофы­шIэхэр зэрэжъу­гъэхьазырыщтхэм бэкIэ ялъытыгъэщт тикIэлэ­еджакIохэм гъэхъагъэу ашIыщт­хэри, янеущрэ мафэ зыфэдэщтыри», — къыIуагъ республикэм и ЛIы­шъхьэ.
КIэлэегъэджэ колледжым иамалхэм зызащегъэгъозэ нэуж КъумпIыл Мурат зэIукIэу зэхищэгъагъэр зыфэгъэхьыгъагъэр еджэпIэ унэм изэтегъэпсыхьан ары. Ащ хэлэжьагъэх АР-м иминистрэ­хэм я Кабинет и Тхьаматэ игуадзэу, фи­нансхэмкIэ иминистрэу Виктор Орло­выр, гъэсэныгъэмрэ шIэныгъэмрэкIэ министрэу Евгений Лебедевыр, культур­нэ кIэныр къэухъумэгъэнымкIэ ыкIи ащ хэхьэрэ псэуалъэхэр гъэфедэгъэнхэмкIэ ГъэIорышIапIэм ипащэу ЦIыпIынэ Рустем, проект организациехэм ялIыкIохэр.

КъызэрэхагъэщыгъэмкIэ, еджэпIэ унэ шъхьаIэр архитектурэм исаугъэтхэм ахэ­хьэ. 1900-рэ илъэсым ашIыгъэгъэ псэуалъэр бзылъфыгъэ гимназиеу щытыгъ. Общежитиеми гъэкIэжьынхэр ищы­кIагъэх, щагури нахь зэтегъэпсыхьэгъэн, къызэрэшIахьыгъэри зэблэхъугъэн фае. Республикэм ипащэ къызэрэхигъэ­щыгъэмкIэ, унэ шъхьаIэм ыкIи общежитием ягъэкIэжьынкIэ амалэу щыIэхэр гъэунэфыгъэнхэ фае. Жъы хъугъэ унэхэм ачIыпIэкIэ кIэхэр, спортивнэ залыри ахэм ахэт, шIыгъэнхэм иамали еуса­гъэх.

«КIэлэегъэджэ колледжыр Мые­къуапэ игупчэ ит ыкIи къалэм итарихъ изы Iахьэу мэхъу. Псэуалъэхэр гъэкIэжьыгъэнхэ, ахэм ятеплъэ нахьышIу шIыгъэн, архитектурнэ зэхэт куп зыкI гъэпсы­гъэн фае. Рес­публикэм икъэлэ шъхьаIэ щы­псэу­хэрэри, хьакIэу ащ къакIохэрэри анахь зыщыгушIукIыхэрэ, зэрыгу­шхохэрэ псэуалъэхэм ащыщэу ар хъун фае. Арышъ, апшъэрэ пшъэ­рылъэу тиIэр гъэ­сэныгъэ зыщарагъэгъотырэ учреждением щезыгъа­джэхэрэми, ащ чIэс студентхэми джырэ уахътэм диштэрэ Iэры­фэгъу амалхэр ягъэгъотыгъэнхэр ары», — къыIуагъ АР-м и ЛIышъхьэ.
ЗэIукIэм икIэуххэм ялъытыгъэу Къум­пIыл Мурат вице-премьерэу а лъэны­къом фэгъэзагъэм пэщэныгъэ адызэрихьэзэ, гъэкIэжьын Iофхэм япроект къагъэхьазырынэу, IофшIэнэу къапыщылъхэр гъэ­нэфэгъэнхэу ыкIи ахэм атефэщтыр къидзэгъэнэу, ахъщэр къыздикIыщтыр гъэунэфыгъэнэу пшъэрылъ афишIыгъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.