Тэхъутэмыкъое районым икъуаджэу АдыгеякIэм ошIэ-дэмышIэ Iоф зыхэлъ тхьамыкIагъоу къыщыхъугъэм ыпкъ къикIэу зэщыкъогъэ унэхэм ачIэсхэм зыдагъэкощыщт чIыпIэу гъэпсэ­фыпIэу «Шапсыгъ» зыфиIорэм щагъэпсыгъэм джыри нэбгырэ 13 къычIэнагъ.

Ахэм ащыщэу тIур кIэлэцIыкIух. Пстэуми апэ нэбгырэ 56-рэ чIагъэтIысхьэгъагъ, ахэм янахьыбэр унэу анахь зэщыкъуагъэм къычIащыгъэхэр арыгъэ. ЦIыфхэм псэукIэ амалэу ящыкIагъэр арагъэгъоты, социальнэ IофышIэхэр мыщ щыIэ зэпытых. Гупчэм ипащэу Талъэкъо Руслъан, ащ игуадзэу Мэт Саидэ, нэмыкIэу щылажьэхэрэм пыим зэрар къызфихьыгъэхэм яIоф Iэпэдэлэл мыхъуным фэшI зы-­
зэблахъузэ цIыфхэм адеIэх. ПсэукIэ амалэу яIэм, зэрагъашхэхэрэм, транспортым Iоф зэришIэрэм ыкIи медицинэ къулыкъухэм зэпхыныгъэу пунктым дыряIэм ежьхэм ашъхьэкIэ анаIэ атет.
«Гъомылапхъэхэр, псыр, нэмыкIэу анахьэу цIыфым ищыкIагъэхэр аIэкIэгъэхьэгъэнхэм къыщегъэ­жьагъэу санитар фэIо-фашIэхэм ыкIи къызкIэлъэIухэрэм ягъэцэкIэн нэсыжьэу япшъэрылъых. Зыпари Iэпэдэлэл пшIы хъущтэп. ЯIофыгъоу зэшIохыгъэ хъурэ пэпчъ IэпыIэгъу зэрэщымыкIэщтхэр, ящынэгъончъагъэ къызэрэухъумагъэр къеушыхьаты», — къыхи­гъэщыгъ АР-м IофшIэнымкIэ ыкIи социальннэ хэхъоныгъэмкIэ иминистрэу Мырзэ Джанбэч.
Ащ дакIоу пыим иягъэ зэригъэкIыгъэ унэхэм язэтегъэуцожьын лъагъэкIуатэ. Анахьыбэу ыгъэфыкъуагъэм ыгупэ игъэ­цэкIэжьын псэолъэшIхэр ыуж ихьагъэх. Экспертхэм къызэрараIуагъэм тетэу, ящэнэрэ къатым нэс гъучIхэмкIэ агъэпытэ. Ащ дакIоу электричествэм ирыкIуапIэхэр ашIыжьых. Ом изытет на­хьышIу хъумэ чырбыщым изэтелъхьан ыуж ихьащтых.
АР-м и ЛIышъхьэ пшъэрылъ къафи­шIыгъэу цIыфхэм ягумэкIыгъохэр игъом дэгъэзыжьыгъэнхэм ыкIи ялъэIухэр афэгъэцэкIэгъэнхэм фэшI чIыпIэм оперативнэ штаб щызэхащагъэу, район ­ ыкIи псэупIэ кой администрациехэм ачIэсхэр, «Единэ Россием» хэтхэр, гуфакIохэр чэзыу-чэзыоу ащ щэIэх.