Адыгеим ибэнакIохэм ягъэхъагъэхэмкIэ республикэм ыцIэ чыжьэу агъэIугъ. Зэлъа­шIэрэ тренерэу Кобл Якъубэ дзюдомкIэ спорт еджапIэу Мыекъуапэ щигъэпсыгъэм зэнэкъокъушхохэм текIоныгъэхэр къащы­дэзыхыгъэ спортсменыбэ къычIитIупщыгъ.

Ахэм ащыщых олимпийскэ чемпионхэу ыкIи ащ фэдэ джэгунхэм апэрэ чIыпIэхэр къащыдэзыхыгъэхэу Владимир Невзоровыр, Емыж Арамбый, Лъэ­цэр Хьазрэт, Арсен Галстян, Мудрэнэ Бислъан.
Республикэм щыпсэоу бэнэным ыкIи спортым пыщагъэ хъухэрэм япчъагъэ илъэс къэс зэрэхахъорэр нэрылъэгъу. Ары ащ епхыгъэ инфраструктурэм игъэ­псын, шъолъырым икъогъупэ пэпчъ кIэлэцIыкIухэми нахьыжъхэми амалы­шIухэр щятыгъэнхэм пащэхэр лъэшэу зыкIыпылъхэр. Ащ пае лъэпкъ проектхэм, къэралыгъо программэхэм, «Единэ Россием» ипартийнэ проектхэр агъэфедэх, бюджетым щымыщ къэкIуапIэхэр къыхагъэлажьэх.
Аужырэ илъэсхэм спорт псэолъи 150-м ехъу республикэм къыщызэIуа­хыгъ. Ахэм янахьыбэр къоджэ псэупIэхэр ары зыщашIыгъэхэр. Муниципальнэ образование анахь инхэм ащыщэу, бэу зыщыпсэурэ Тэхъутэмыкъое районым псэолъакIэхэр етIупщыгъэу щашIых.
ГущыIэм пае, мары шъолъыр ыкIи район бюджетхэм къахэхыгъэ мылъкумкIэ ащ икъуаджэу Пэнэхэс дзэюдомкIэ Гупчэ щашIи къызэIуахыгъ. Псэуа­лъэм пстэуми афытегъэпсыхьэгъэ спортзал, тренажерхэр зычIэтхэ зал, нэ­мыкIэу ищыкIагъэр зэкIэ хэт. Ащ фэшъхьа­фэу физкультурэм зыщыпылъхэ ыкIи псауныгъэр зыщызэтырагъэуцожьырэ комплекси 4 мы муниципальнэ обра­зованием ит, къуаджэу Афыпсыпэ бэ­нэнымкIэ зал щашIы. Джащ фэдэу «модульнэ» зыфаIорэ бассейн ыкIи спортым зыщыпылъыщтхэ площадкэ «Iуш» мыгъэ щагъэуцущтых. Джы Тэхъу­тэмыкъое районым спортым щыпы­лъынхэу амалышхо иIэ мэхъу.