Адыгеим икIи, цэхэм яIазэхэрэ кIэлэцIыкIу врач ятIонэрэ купыр Херсон хэкум кIуагъэ.

Апэрэ купыр тхьамафэрэ ащ къэтыгъ — мэзаем и 2-м къыщыублагъэу и 9-м нэс. Врач-цэIазэу Дмитрий Ветютневыр Нижние Серогозы и Гупчэ рай­он сымэджэщ мафэ къэс кIэлэцIыкIу нэбгыри 10 фэдизмэ ащяIазэщтыгъ.
Зичэзыу IофшIэгъу уахътэм Iухьагъэх Адыгэ республикэ клиническэ цэ IэзапIэм иврачэу Екатерина Перепелкинамрэ МКъТУ-м иеджакIоу Гулэз Аветисянрэ. Джащ фэдэу Нижне­серогозскэ Гупчэ сымэджэщым кIуагъэ Адыгэ республикэ клиническэ цэ IэзапIэм иврач шъхьа­Iэу Шэуджэн Вячеслави.
Къыхэгъэщыгъэн фае, ясэнэхьат имафэу якIогъу тефагъ ыкIи зыфэкIуагъэхэм мэфэкI шъыпкъэ афашIыгъ. Медицинэм иIофышIэхэм къызэраIуагъэмкIэ, Нижнесерогозскэ районыр кIэлэцIыкIу цэIазэхэм лъэшэу ащэкIэ — тиврачхэм ятакъикъ пэпчъ лъытагъэ, чэзыум къа­кIохэу хэсыхэри щыIэх. Ащ ыпэ­кIи тиреспубликэ икIыгъэ медицинэ IофышIэхэр тишъо­лъыр ынаIэ зытет чIыналъэхэм ащыIагъэх: лъэныкъо зэфэшъхьафхэмкIэ Iазэхэрэм уплъэ­кIунхэр зэхащэщтыгъэх, Iэзэгъу афэхъущтхэр къафыратхыкIыщтыгъэх, нахь IэпыIэгъу куу зи­щыкIагъэхэу узхэр къызы­хагъэщыхэрэр сымэджэщхэм ачIагъэгъолъхьанхэу тхьапэхэр къафыратхыкIыщтыгъэх.

Джащ фэдэу Херсон хэкум псауныгъэм икъэухъумэнкIэ иуч­реждениехэм медицинэ
Iэмэ-псымэу ачIэтхэм язэте­гъэуцонкIэ медицинэм иIофы­шIэхэу Адыгеим икIыгъэхэр адэIэпыIагъэх, яIофшIэгъухэм ренэу упчIэжьэгъу афэхъух телелъэмыджхэр къызфагъэфе­дэ­хэзэ.
«ГуфакIохэу мы IофшIэным хэлажьэхэрэм зэкIэми сызэрафэразэр ясIо сшIоигъу. Гушхоу шъуиIэхэмрэ сэнэхьатым шъу­зэрэфэшъыпкъэмрэ яшIуагъэкIэ цIыф нэбгыришъэ, мин пчъагъэмэ япсауныгъэ къызэтырагъэнэнымкIэ ­IэпыIэгъу шъуафэхъу! Ана­хьэу мэхьанэшхо зиIэр ахэм кIэлэцIыкIубэ зэрахэтыр ары ыкIи ащыщхэм шъоры мыхъугъэемэ, IэпыIэгъу тэ­рэз агъотыщтыгъэп.
Херсон хэкум, тынаIэ зытет муниципальнэ псэу­пIэхэм япащэхэм тадэла­жьэзэ тапэкIи медицинэм иучреждениехэм яIофшIэн изэхэщэнкIэ ыкIи чIыпIа­кIэхэм ащыпсэухэрэм Iэпы­Iэгъу афэхъугъэнымкIэ ­тфэлъэкIырэр зэшIотхыщт. «Единэ Россием» ынаIэ те­тэу, волонтерхэри, цIыф жъугъэхэри, сатыушIхэри къыхэлажьэхэзэ шIушIэ IэпыIэгъум иугъоини лъыдгъэ­кIотэщт», — къащитхыгъ исоциальнэ нэкIубгъохэм Адыгеим и ЛIышъхьэу, политическэ партиеу «Еди­нэ Россием» и Адыгэ шъо­лъыр къутамэ и Секрета­рэу КъумпIыл Мурат.