Росгвардиер зызэхащагъэр илъэси 10 ыкIи хэбзэ рэхьатныгъэр къэу­хъумэгъэнымкIэ дзэхэр загъэпсыгъэхэр илъэс 215-рэ зэрэхъухэрэм япэгъокIэу илъэс къэс зэхащэрэ Урысые Iофтхьабзэу «Росгвардием имафэхэр» зыфиIорэр Адыгеим щырагъэжьагъ.

Iофтхьабзэм апэу къыхэлэ­жьэнхэу закъыфэзыгъэзагъэхэм ащыщых Росгвардием хэт­хэу хэушъхьафыкIыгъэ дзэ операцием хэлажьэхэрэм адырагъаштэу письмэ афэзытхы­гъэхэу Свято-Троицкэ кафед­ральнэ соборым иеджапIэ икIэ­лэеджакIохэр ыкIи «Мые­къуапэ» зыфиIорэ дружинэм иразведчик ныбжьыкIэхэр.
ЗэIукIэгъур соборыр зычIэт унэм щыкIуагъ. Динлэжьэу Виталий Козловымрэ Росгвардием и ГъэIорышIапIэу АР-м щыIэм иофицеррэ кIэлэцIыкIу­хэм къафаIотагъ Хэгъэгум осэ­шхоу иIэр, къэралыгъом итарихъ шъхьэкIафэ фашIын, лIыблэнагъэм рыгушхонхэ зэрэфаер, лIэужхэм зэпхыныгъэ зэдыря­Iэныр, Хэгъэгур пытэным ыкIи дэхэным афэшI нэбгырэ пэпчъ имэхьанэ зыфэдэр.
Хэгъэгум иухъумакIохэм псын­кIэу къагъэзэжьынэу кIэлэ­цIыкIухэм яписьмэхэм ратхагъ.
«Росгвардием икъулыкъушIэ­хэмкIэ гуфэбэныгъэ зыхэлъ сурэтхэр ыкIи письмэхэр лъэшэу гуапэх ыкIи ящыкIагъэх. КIэлэцIыкIухэм дэгъоу къагурэIо дзэ­кIолIхэр къинэу зыхэтхэр ыкIи Хэгъэгум иухъумакIохэм агу афэузэу ягуфэбэныгъэ апагъохы», — къыIуагъ Росгвардием и ГъэIорышIапIэу АР-м щыIэм идзэ къулыкъушIэу майорэу Алексей Ткаченкэм.
Мы охътэ благъэм кIэлэ­цIыкIухэм ясурэтшIыгъэхэр ыкIи яписьмэхэр дзэкIолIхэм аIэкIагъэхьащтых.