Атлетикэ онтэгъумкIэ Урысыем и Кубок икъыдэхын фэгъэхьыгъэ зэнэкъокъухэр мэзаем и 3-м къыщегъэжьагъэу и 6-м нэс Московскэ хэкум икъалэу Люберцы щыкIуа­гъэх.

Iофтхьабзэм хъулъфыгъэхэм ыкIи бзылъфыгъэхэм зыщаушэтыгъ.
Къэралыгъом ишъолъыр 39-мэ къарыкIыгъэ спортсмен 250-м ехъумэ яухьазырыныгъэ къагъэлъэгъуагъ, текIоныгъэм фэбэнагъэх. Ахэм ащыщхэр Урысыем, дунаим ыкIи Европэм ащызэхащэгъэ зэнэкъокъухэм ячемпионых, хагъэунэфыкIырэ чIыпIэхэр къыдэзыхыгъэх, спортымкIэ мастерых ыкIи кандидатых.

Адыгэ Республикэм илIыкIохэм гъэхъэгъэшIухэр ашIыгъэх, нэбгыритIумэ хагъэунэфыкIырэ чIыпIэхэр къыдахыгъэх. Килограмм 67-рэ къэзыщэчыхэрэм якуп хэтыгъэ Бзэсэжъ Аслъан джэрз медаль къыфагъэшъошагъ, ащ итренерыр Сихъу Аслъан. Роман Казаковым ыгъэсэрэ Яна Сотиевам текIоныгъэр къыдихыгъ.
Олимпийскэ резервым испорт еджапIэу М. Н. Чыржьыным ыцIэ зыхьырэм къызэрэщаIуагъэмкIэ, Европэм ичемпионатэу 2026-рэ илъэсым зэхащэщтымрэ анахь лъэшхэм я Спартакиадэрэ ахэлэжьэщтхэм якъыхэхын мы Iоф­тхьабзэр фытегъэпсыхьэгъагъ.