Амыгъэкощырэ мылъкум хэхьэрэ псэуалъэхэм кадастрэ уасэхэр зэрафагъэуцурэм епхыгъэ упчIабэ щыIэ зэрэхъугъэм фэшI «Адыгэ макъэр» гущыIэгъу фэхъугъ къэралыгъо кадастрэ осэ гъэуцунымкIэ Адыгэ республикэ Гупчэм ипащэу Джэндэрэ Мурат.

— Къихьэгъэ илъэсым амыгъэкощырэ мылъкум хахьэу сыд фэдэ псэуа­лъэхэр ара къэралыгъо кадастрэ уасэхэр зыфагъэуцущтхэр?
— 2026-рэ илъэсым ищылэ мазэ и 1-м ыпэкIэ амыгъэкощырэ мылъкум и ЗыкI къэралыгъо реестрэ хагъэхьэгъэ чIыгу Iахьхэр ары мыгъэ кадастрэ уасэхэр зыфагъэуцущтхэр.
— Сыда кадастрэ уасэхэм ямэхьанэр?
— Псэуалъэм хэбзэIахьэу тефэрэр къэлъытэгъэным, къэралыгъо ыкIи муниципальнэ мылъкум хэхьэрэ чIыгу Iахьыр бэджэндэу зыштэрэм ытыщтыр зыфэдизыр гъэнэфэгъэным, нэмыкIэу хэбзэгъэуцугъэхэм къадэлъытагъэхэм апае кадастрэ уасэр агъэуцу.
— Кадастрэ уасэр зэрэ­гъэуцугъэн фэе шапхъэхэр сыда къэзыгъэнафэрэр.
— 2016-рэ илъэсым, бэдзэогъум и 3-м къыдэкIыгъэ Федеральнэ хэбзэгъэуцугъэу кадастрэ уасэхэм афэгъэхьыгъэм, къэралыгъо регистрациемкIэ, кадастрэхэмкIэ ыкIи картографиемкIэ Федеральнэ къулыкъум иунашъо­кIэ 2021-рэ илъэсым аштэгъэ методическэ тхылъым ахэр ащыгъэнэфагъэх.
— ЧIыгу Iахьым икадастрэ уасэ игъэуцункIэ сыд фэдэ нэшанэхэр ара къыдалъытэхэрэр?
— Амыгъэкощырэ мылъкум и ЗыкI къэралыгъо реестрэ щытхыгъэ нэшанэхэр, гущыIэм пае, чIыгу Iахьыр зэрагъэпсэолъэщт лъэныкъоу фитыныгъэ зэряIэр, ащ къызэлъиубытырэр зыфэдизыр, иадрес, нэмыкIхэр къыдалъытэх. КъыхэкIы чIыгум пылъ къэбарыр икъоу мы реестрэм щымыгъэнэфагъэу. Кадастрэ уасэм игъэуцункIэ ащ иягъэ къэкIо.
— Ащ фэдэ хъумэ, чIыгур зыщэфыхэрэм ащ пылъ къэбарым щыкIэрэр къызIэкIагъэхьажьы­шъущта?
— Пстэумэ апэу амыгъэкощырэ мылъкум и ЗыкI къэралыгъо реестрэ щытхыгъэ нэшанэхэр екъухэмэ зэрагъэшIэн фае. ЕтIа­нэ, ахэм щыкIагъэ яIэмэ е мы­тэрэзэу зыгорэ тхыгъэмэ, Росреестрэм зыфагъэзэн фае. Джащыгъум хэзыгъэ имыIэу чIыгум пылъ къэбарыр къаIэкIэхьащт.
— Псэуалъэр зиунаер кадастрэ уасэм игъэуцун епхыгъэ Iофтхьабзэхэм ахэлэжьэн фита?
— Псэуалъэм инэшанэхэр ар зием нахь дэгъоу зыпарэми ышIэрэп. Ащ къыпкъырыкIхэзэ, чIыгур зием къэбарэу пылъыр ытын фитэу хэбзэгъэуцугъэр зэхэзгъэуцуагъэхэм къыдалъы­тагъ. Ащ пае амыгъэкощырэ псэуалъэм нэшанэу пылъхэм афэгъэхьыгъэ декларацие къытын фае. Ахэр кадастрэ уасэм игъэ­уцункIэ агъэфедэщтых.
Декларациер зэрэптыщтыр, тхылъэу ищыкIагъэхэр, зэрэгъэ­псыгъэн фаер кадастрэ уасэхэм ягъэуцун фэгъэзэгъэ учреждением иинтернет нэкIубгъо (https://gko-adyg.ru) иедзыгъоу «Обращения» зыфиIорэм иIахьэу «Рассмотрение декларации о характеристиках объектов недвижимости» къызэIупхымэ ибгъотэщтых.
— Кадастрэ уасэхэр зэрагъэуцугъэхэм тыдэ ущяплъын плъэкIыщта?
— Кадастрэ уасэхэр зэрагъэ­уцугъэхэм фэгъэхьыгъэ отчетым ипэшIорыгъэшъ проектэу агъэхьазырырэм зэкIэ къыратхэ. Ар къэ­ралыгъо кадастрэ уасэхэмкIэ Росреестрэм ифонд е ащ иинтернет нэкIубгъо къырагъахьэ. Мэфэ 30 пIалъэу ащ пылъ. ЧIыгу Iахьэу уасэ зыфагъэуцугъэхэр зиехэр джа уахътэм тхылъым хэплъэнхэшъ, мытэрэз горэ халъэгъуагъэ­мэ, учреждением фагъэхьын фае. Специалистхэм къагъэхьыгъэр ауплъэкIужьынышъ, ищыкIагъэу алъэгъумэ, хагъэуцожьыщт.
Проектыр къызэрыхьагъэр, ар зищыкIагъэхэр хэплъэжьынхэшъ, гъэтэрэзыжьынхэр къыфашIынхэм пIалъэу пылъыр зыфэдизыр официальнэ интернет нэкIубгъом, учреждением исоциальнэ хъытыухэм къарыхьащт, къэбар жъу­гъэм иамалхэм къыхаутыщт, къэралыгъо хэбзэ ыкIи чIыпIэ зыгъэIорышIэжьыпIэ къулыкъухэм янэ­кIуб­гъохэм къащатхыщт.
Къыхэзгъэщымэ сшIоигъу, къэ­ралыгъо кадастрэ уасэхэм ягъэ­уцун шапхъэу пылъхэм уахаплъэ­мэ, ащ зыпари шъэф зэрэхэмы­лъыр, зэрэшъхьэихыгъэр къэлъа­гъо. Псэуалъэхэр зиехэр е нэмыкIэу уасэхэм ягъэуцун зищыкIагъэхэр Iофтхьабзэм хэлажьэх, ащ IофшIэнхэм щыкIагъэ ямыIэу зэшIохыгъэнхэмкIэ ишIуагъэ къэкIо.
— ЧIыгу Iахьхэм къэралыгъо кадастрэ уасэу афагъэуцугъэхэр сыдигъуа зыбгъэфедэн плъэкIыщтхэр?
— Мыгъэ уасэу агъэуцухэрэр 2027-рэ илъэсым ищылэ мазэ и 1-м къыщыублагъэу бгъэфедэнхэ плъэкIыщт.
— Мыщ епхыгъэ упчIэ зиIэм тыдэ зигъэзэн ылъэ­кIыщта?
— Къэралыгъо кадастрэ уасэхэм ягъэуцун епхыгъэу упчIэ зи­Iэм мы адресымкIэ екIуалIэмэ джэуап ыгъотыщт: 385020, Адыгэ Республикэр, къалэу Мые­къуапэ, урамэу Пролетарскэр, 269-рэ (я 6-рэ этаж), мы электроннэ адресымкIэ къатхэми хъущт: adyg.gko@adygheua.gov.ru, мы телефонымкIэ къытеонхи алъэкIыщт: 8(8772) 57-97-27.