СамбэмкIэ я IX-рэ Урысые зэнэкъокъу­хэр къалэу Черкесскэ щыкIуагъэх. Къэрэщэе-Черкес Республикэм и Лъэпкъ зэIукIэ (и Парламент) идепутатэу, мы спорт лъэпкъымкIэ дунаим ичемпионэу М.А. Къуныжъым ишIэжь фэгъэхьыгъэ турнирым къэралыгъом ишъолъыр зэфэшъхьафхэм къарыкIыгъэ нэбгыри 100-м ехъу хэлэжьагъ.

Адыгэ Республикэм илIыкIохэм къэгъэлъэгъон дэгъухэр яIэх, текIоныгъэр ыкIи хагъэунэфыкIырэ чIыпIэхэр къыдахыгъэх. Бэгъушъэ Астемиррэ Нэныжъ Хьисэрэ чемпион хъугъэх. Уджыхъу Адам ятIонэрэ чIыпIэр къыфагъэшъошагъ. Максим Кураевым, Юрий Залознэм, Тимур Сархасиди джэрз медальхэр къахьыгъэх.
Тиспортсменхэм ыкIи ахэм ятренерхэу И. Нэгъоим, А. Хьабэхъум, А. Джарымэкъом, Хъ. ГуIэтыжьым, Р. Джарымэкъом тафэгушIо, тапэкIи мыщ фэдэ гъэхъэгъэшIухэр ашIынхэу, республикэм ыцIэ дахэкIэ рарагъэIонэу афэтэIо.