Москва дэт Лъэпкъ гупчэу «Урысыем» къэралыгъом щыпсэухэрэм языкIыныгъэ и Илъэс Президентэу Владимир Путиным къыщызэIуихыгъ. Ащ фэгъэхьыгъэ Iофтхьабзэм Адыгеим икIыгъэ лIыкIо куп хэлэжьагъ.

Президентым утыгум тиреспубликэ иныбжьыкIэ нэбгырипшI зэрэдытетыгъэм игугъу къышIыгъ АР-м и ЛIышъхьэ. Джырэ уахътэм иискусствэ хэхъоныгъэ ышIынымкIэ гупчэу «Шпаргалкэм» хэтхэм адыгэ шъуашэхэр ащыгъхэу сценэм тетыгъэх.
Владимир Путиным къыкIигъэтхъыгъ сыд фэдэрэ лъэхъани тикъэралыгъо щыпсэурэ лъэпкъхэр зэзыпхыщтыгъэхэр зы Iофыгъоу зэрэщытыгъэр — зэкIэ къэгъэнэжьыгъэныр ары: зэдытичIыгу, тиунагъохэр, тикультурэ, тишэн-хабзэхэр. ХэушъхьафыкIыгъэ дзэ операцием хэлэжьэрэ тидзэкIолIхэми зыкIыныгъэ зэрахэлъыр ащ къыIуагъ: «Ащ къыкIегъэтхъы узтекIон умылъэкIыщт тизыкIыныгъэ. Лъэныкъо зэфэшъхьафхэмкIэ гъэхъагъэу тиIэхэмрэ титекIоныгъэхэмрэ ар алъапс».

«Урысыем щыпсэурэ лъэпкъхэм языкIыныгъэ — къэралыгъом зэкъотныгъэу илъым ыкIуачIэ, зызэхэтхыжьын зэрэтлъэкIырэм, культурнэ кIэныр къэухъу­мэгъэным ыкIи уахътэм къыздихьырэ зекIуакIэхэм тызэготэу джэуап яттыжьынымкIэ лъэкI зэрэтиIэм къакIэдгъэтхъы­ным яамалэу сэлъытэ. ЗыкIыныгъэм и Илъэс зэредгъэжьагъэр зэкIэхэмкIи мэхьанэшхо зиIэ хъугъэ-шIагъэ тфэ­хъугъ, ащ шъолъырхэр, лъэпкъхэр ыкIи лIэужхэр анахь агъэлъэпIэрэ зекIуакIэхэм ащызэрепхых: лъытэныгъэ зэфэпшIыжьыным, зэзэгъыныгъэм ыкIи къэралыгъом къырыкIощтымкIэ пшъэдэкIыжь уиIэным.
Мы зэпстэури тиреспубликэ щыпсэухэрэм къапэблагъ. Адыгеим зыкIыныгъэр — щыджэпсалъэп, ар мафэ къэс тызэрыгъуазэу, тарихъым къыдакIоу щыт. Тиреспубликэ — лъэпкъыбэ зыщыпсэурэ, ахэр мамырэу зыщызэдыщыIэхэ, якультурэрэ яшIошъхъуныгъэ­хэмрэ зыщагъэлъапIэхэрэ шъолыр. Ар къагъэлъагъо тилIыкIо куп хэтхэу Урысыем илъэпкъхэм языкIыныгъэ и Илъэс икъызэIухын ыкIи Iофтхьабзэу «Урысыер — унагъохэм яунэгъожь» зыфиIорэм ахэлажьэхэрэми», — къащитхыгъ исо­ци­альнэ нэкIубгъохэм КъумпIыл Мурат.
Тиреспубликэ нэбгырэ 20-мэ Москва къыщагъэлъэгъуагъ — АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм зэпхыныгъэ адыряIэнымкIэ ыкIи къэбарлъыгъэIэс амалхэмкIэ и Комитет и Тхьаматэу Долэ Долэт, ныбжьыкIэ IофхэмкIэ Комитетым итхьаматэу Максим Галушкиным, УФ-м и Президент дэжь АР-р къыщызыгъэлъэгъорэ официальнэ лIыкIоу Мыгу Бис­лъан, «Урысыем илъэпкъхэм я Ассамблее» ишъолъыр къутамэ итхьаматэу, общественнэ движениеу «Адыгэ Хасэм» ипащэу ЛIымыщэкъо Рэмэзан, ныбжьыкIэхэм.
«ТиныбжьыкIэхэр къахэщыгъэх – ахэр республикэм щыпсэурэ лъэпкъхэм яшъуа­шэхэр ащыгъхэу Iофтхьабзэм къе­кIолIагъэх. Ар — Урысыем щыпсэурэ лъэпкъхэм языкIыныгъэрэ Адыгеим иэтнокультурэ изэмлIэужыгъуагъэрэ янэпэеплъ.
Урысыем илъэпкъхэм языкIыныгъэ и Илъэс къы­дыхэлъытэгъэ Iофтхьабзэхэр зэхэгущыIэжьыным, IофшIэкIэ амалэу аIэкIэ­лъымкIэ ыкIи гукъэкI дахэ­хэмкIэ зэдэгощэнхэм ячIыпIэу зэрэхъущтым, мы зэпстэури лъэпкъ зэгуры­Iоныгъэу ыкIи хэхъоныгъэу тишъолъырхэм арылъым игъэпытэн зэрэфэIорышIэщтым сицыхьэ телъ. Адыгеир сыдигъокIи зэкъошныгъэмрэ зэрэлъытэжьыныгъэмрэ ячIыналъэу щытыгъ ыкIи щытыщт, а Iоф­шIагъэмкIэ тадэгощэным тыфэхьазыр», — къыт­хыгъ Адыгеим и ЛIышъхьэ.