ЦIыф зэрымыс быбырэ пкъыгъохэр щыIэныгъэм пытэу къыхэуцуагъэх. Джы мы лъэныкъомкIэ зэзэгъыныгъэ шIыкIэм тетэу ныбжьыкIэхэм къулыкъу ахьын амал щыIэ хъугъэ. Ащ фэгъэхьыгъэ зэдэгущыIэгъухэр мы мафэхэм Адыгеим щыкIуагъэх, республикэм икъэлэ шъхьаIэ идзэ комиссариат илIыкIохэр, Мыекъопэ къэралыгъо технологическэ университетым и Дзэ егъэджэн Гупчэ ипащэу Нурлан Самадьяновыр гурыт сэнэхьат зэзыгъэгъотырэ студентхэм гущыIэгъу афэхъугъэх.

Адыгэ къэралыгъо университетым и Мыекъопэ къэралыгъо гуманитар-техническэ колледж щеджэрэ Андрей Лебедевым зэхахьэр шIогъэшIэгъоныгъ, бэмэ аригъэгупшысагъ. КIэлэ ныбжьыкIэм IT-технологиемкIэ сэнэхьат зэрегъэгъоты, яплIэнэрэ курсым щеджэ.
— Зэзэгъыныгъэ шIыкIэм тетэу къулыкъу зыхьын мурад зиIэхэм джы цIыф зэрымыс быбырэ авиацием епхыгъэу япшъэрылъхэр агъэцэкIэнхэ зэралъэкIыщтыр сшIогъэшIэгъоныгъ. Дзэ егъэджэн Гупчэм ипащэ быбырэ пкъыгъохэр зэрэзэтекIыхэрэр, ахэр зэрагъэфедэ­хэрэр къытфиIотагъ. БПЛА-м иоператор ухъуным шэпхъэ гъэнэфагъэу пылъхэр зэзгъэшIагъэх. УФ-м зыкъэухъумэжьынымкIэ и Министерствэ мэзитIурэ хэушъхьафыкIыгъэ дзэ частым зыщыригъаджэхэкIэ, зэзэгъыныгъэм зы илъэс пIалъэкIэ укIэтхэн зэрэфаер къытаIуагъ, ащ хэхьэ мэзитIу егъэджэнхэри, — еIо Андрей.

Хэгъэгур къызэриухъумэщтым дакIоу, зэтыгъо ахъщэ тынэу сомэ миллиони 2,4-рэ зэзэгъыныгъэм кIатхэхэрэм къа­ратыщт, мазэ къэс сомэ мин 230-рэ къафатIупщыщт. Джащ фэдэу япшъэрылъхэр зэрагъэцакIэхэрэм, гъэхъагъэу ашIы­хэрэм ялъытыгъэу ахъщэ тедзэ къаIэкIэхьащт. Къулыкъур ахьэу къызагъэзэжьыкIэ, фэгъэкIотэнхэри яIэщтых. Зэзэгъыныгъэ шIыкIэм тетэу къулыкъу зыхьыхэрэм ялъытыгъэмэ, илъэс пIа­лъэр заухыкIэ, БПЛА-м иоператорэу кIуагъэ­хэр къэкIожьынхэ алъэкIыщт, шIоигъоныгъэ зиIэхэм ар лъагъэкIотэн амал яI.
— Уихэгъэгу къэуухъумэным пае амалышIоу мыр сэлъытэ. ЗэопIэ дэдэм уIумытэу, компьютеркIэ пыим уебэныщт. ЦIыф зэрымыс быбырэ пкъыгъохэр тищыIэныгъэ щыщ зэрэхъугъэр къыдэплъытэмэ, ащ уфеджэмэ, къыпфэфе­дэжьынэу сэлъытэ. Сэнэхьат зэфэ­шъхьафхэмкIэ ар агъэфедэ хъущт, хэ­ушъхьафыкIыгъэ дзэ операцием илъэсрэ укъэтыгъэми, укъызыкIожьыкIэ Iоф зыщыпшIэн плъэкIыщт чIыпIэ пае укъэмынэнэу сэлъытэ, — къыIуагъ тигущыIэгъу.

ДЕЛЭКЪО Анет.