Гъэстыныпхъэ шхъуантIэр зимыIэхэм аIэкIэгъэхьэгъэным фытегъэпсыхьэгъэ программэу «Социальнэ газифика­ци­ем» къыдыхэлъытагъэу Адыгеим ичъыгхэтэ товарищест­вэхэм ар аращалIэ.

Гъэстыныпхъэ шхъуантIэр зыщызэ­бгырыщыгъэ псэупIэхэм апэблагъэхэр ары ащ къыхиубытэхэрэр. Ащ фэдэу республикэм итыр 33-рэ мэхъу, ахэм щагу 2627-рэ ахэхьэ.
2026-рэ илъэсым ищылэ мазэ и 1-м нэс пштэмэ, ахэм ащыщэу 138-мэ программэр агъэфедэнэу Iахьзэхэлъ об­ществэу «Газпром газораспределение Майкоп» зыфиIорэм лъэIу тылъхэр къы­ратыгъэх, 134-мэ зэзэгъыныгъэхэр адашIыгъ, 107-мэ ящагухэм аращэлIагъ, унэ 39-мэ ащатIупщыгъ.
Шъугу къэдгъэкIыжьын, социальнэ газификациер — къэралыгъом иIэ­пы­IэгъукIэ унэе псэупIэхэмрэ (чъыгхэтэ товариществэхэм ахэтхэри хэхьэх) социальнэ псэуалъэхэмрэ гъэстыныпхъэ шхъуантIэм икIуапIэхэм япхыгъэнхэр ары.
«Шъолъырым щыпсэухэрэм гъэстыныпхъэ шхъуантIэр нахь къызIэкIэгъэ­хьэгъошIу афэшIыгъэныр — унагъо пэпчъ щыIэкIэшIу иIэныр, псэупIэхэм зыпкъ итэу хэхъоныгъэхэр ашIынхэр зэпхыгъэ социальнэ пшъэрылъ. Арышъ, унэхэр зиехэм ахэр зэряунаехэр къэзыушы­хьатырэ тхылъхэр аIэкIэлъынхэр шIокI зимыIэ Iофэу зэрэщытыр агу къэзгъэ­кIыжьымэ сшIоигъу. Ар зимыIэм ыпэрапшIэу ыгъэпсын, етIанэ гъэстыныпхъэ шхъуантIэм пае лъэIу тхылъыр ытын фае», — къыхигъэщыгъ Росреестрэм ишъолъыр ГъэIорышIапIэ ипащэ иIэ­натIэ зыгъэцэкIэрэ ЕмыкI Марыет.
ЦIыфым унэе псэупIэр е ар зытыригъэуцощт чIыгу Iахьыр зэриунаер къэзыушыхьатырэ тхылъыр ыгъэпсыным пае «дачная амнистия» зыфиIорэ положениер къыздыригъэIэн ылъэкIыщт. ЧIыгур ыгъэфедэнэу фитыныгъэ къе­зытырэ тхылъымрэ техническэ пла­нымрэ (ар кадастрэ инженерым къегъэ­хьазыры) тхылъ шъхьаIэу мыщ дэжьым щырищыкIагъэхэр. Джащ фэдэу чъыгхэтэ унэр зэриунаер ыгъэпсыгъэмэ, УФ-м и Правительствэ иунашъоу 2006-рэ илъэсым ищылэ мазэ и 28-м къыдэкIыгъэм къызэрэщыдэлъытагъэу, ащ псэупIэ статус фишIыжьын фае.
«2023-рэ илъэсым Роскадастрэм иIофышIэхэм амыгъэкощырэ мылъкум хэхьэрэ псэуалъэхэм япхыгъэ кадастрэ IофшIэнхэр агъэцэкIэнхэу пшъэрылъ яIэ хъугъэ. Тиэкспертхэр тхылъэу ищыкIагъэхэм ягъэхьазырынкIэ зэкIэми IэпыIэгъу афэхъущтых. Кадастрэ IофшIэнхэр пэIудзыгъэ шIыкIэм тетэу ябгъэшIын, регистрацием пае лъэIу тхылъыр «Рос­кадастрэм» иинтернет нэкIубгъо щып­тын плъэкIыщт», — къыIуагъ «Роскадастрэм» ишъолъыр къутамэу АР-м щыIэм ипащэу ХъокIо Аюбэ.
Социальнэ газификацием фэгъэхьыгъэ программэр УФ-м и Президент ыкIи Правительствэм аштагъэу 2021-рэ илъэсым къыщыублагъэу шъолъырхэм ащыпхыращы. Ащ ишIуагъэкIэ къоджэ псэупIэхэм адэсхэу гъэстыныпхъэ шхъуантIэр зыIэкIэмыхьэхэрэм ыпкIэ хэмылъэу ар ящагухэм аращэлIэн амал яIэ хъугъэ. 2024-рэ илъэсым УФ-м и Правительствэ и Тхьаматэу Михаил Ми­шустиныр газыр зыIэкIэхьэрэ псэу­пIэхэм апэблэгъэ чъыгхэтэ товари­ществэхэр программэм хэгъэхьэгъэнхэм фэгъэхьыгъэ унашъом кIэтхагъ.