Хъулъфыгъэ сурэтыр
Хэгъэгум иухъумакIо и Мафэ фэгъэхьыгъэ къэгъэлъэгъонэу «Адыгеим исурэтышIхэм хъулъфыгъэр къызэрагъэлъагъорэр» зыфиIорэр АР-м и Сурэт къэгъэлъэгъуапIэ къыщызэIуахыгъ. IофшIэгъэ 80 фэдиз Iофтхьабзэм хэхьагъ.
ЩыIэныгъэм ипчэгу ит цIыфэу зиIофшIэгъэ мыухыжькIэ дунаим лIыгъэшхо щызезыхьэхэрэм Iофтхьабзэр афэгъэхьыгъ. Портрет пшIы пчъагъэр Адыгеим исурэтышIхэм аIапэ къычIэкIыгъ. Ары пэпчъ къыпIоплъэ хьалэлэу, къыбдэгущыIэ. Ахэтых мыхэм лэжьэкIо Iэпшъэ емызэщыжьхэр, Iахъохэр, псэолъэшIхэр, врачхэр, кIэлэегъаджэхэр, Адыгеим щыцIэрыIо цIыфхэр.
— Къэгъэлъэгъоныр хъулъфыгъэмэ ямафэкIэ шIухьафтын дэгъу хъугъэ. Адыгэ Республикэм исурэтышI IэпэIасэхэу Урысыем исурэтышIхэм я Союз хэтхэм яIэшIэгъэ анахь дэгъухэр ары къэгъэлъэгъоным нахьыбэрэмкIэ хэхьагъэхэр. Лъэшэу гукъаоми, непэрэ сурэтышIхэм портретым нахь макIэу зыфагъазэ хъугъэ, — къыIуагъ Сурэт къэгъэлъэгъуапIэм ипащэу, Адыгэ Республикэмрэ Къэрэщэе-Черкесымрэ язаслуженнэ сурэтышIэу Бырсыр Абдулахь.
— Хъулъфыгъэмэ афэгъэхьыгъэ къэгъэлъэгъоным хэхьэгъэ IофшIагъэ пэпчъ купкI гъэнэфагъэ иI. IэпэIасэхэм яIофшIэн пэпчъ екIолIэкIэ зэфэшъхьаф къызэрэфагъотыгъэм къэгъэлъэгъоныр гъэшIэгъон къешIы. Хэгъэгу зэошхом илъэхъан тидзэкIолIхэу псэемыблэжьэу зэуагъэхэр сурэтыбэмэ ащытэлъэгъух. Джы непэ кIорэ хэушъхьафыкIыгъэ дзэ операцием щыIэ дзэкIолIхэми къалэжьыгъ ясурэтхэр пшIыныр. ТапэкIэ непэрэ лIыхъужъхэм ясурэтхэр тисурэтышIхэм ашIынхэм тыщэгугъы. Хэгъэгум ичIыгу, ишъхьафитыныгъэ къэзыухъумэгъэ дзэкIолIхэр, заом ыкIыб щыIэу Iоф зышIэхэрэр тарихъым къыхэнэнхэ, къыткIэхъухьэрэ лIэужхэм тихэгъэгу итарихъ, ихъишъэ ашIэн фае, — къыIуагъ АР-м исурэтышIхэм я Союз итхьаматэу Елена Абакумовам.
УФ-м исурэтышIхэм я Союз хэтэу, АР-м изаслуженнэ сурэтышIэу, заом хэлэжьагъэу Павел Амасьян иIэшIагъэу «Чабан Ганиев» зыфиIорэм Iахъом иобраз къыщигъэлъэгъуагъ. Бырсыр Абдулахь ятэжъэу Бырсыр Рыхъо лъэпкъ шъуашэр щыгъэу ипортрет зэгъэкIугъэ ышIыгъ.
Портрет зэфэшъхьафыбэм нэр зыфащэ, анахьэу лIыгъэ напэр зыIэтыгъэ лIыхъужъхэм яехэм, джащ фэдэу Адыгеим къэралыгъо гъэпсыкIэ иIэ хъуным дэлэжьэгъэ цIыфышхохэм ясурэтхэм. Искусствэр щыIэныгъэм иIотакIу. Къэгъэлъэгъоным хэлэжьэрэ сурэт пэпчъ тарихъым къыхэнэщт.
ЗэхэщакIохэм искусствэр зышIогъэшIэгъонхэр къэгъэлъэгъоным рагъэблагъэх, гъэтхапэм и 1-м ар зэфашIыжьыщт.
Лъэпшъыкъо Фатим.