Ханты-Мансийскэ автоном шъолъырым – Югра щыщхэу Теуцожь районым наркотикхэр зыщашIырэ лабораторие щызыгъэпсыгъагъэхэм яIоф Адыгеим ихьыкум зэхифыгъ.

Ханты-Мансийскэ автоном шъолъырым — Югра щыщхэу Теуцожь районым щыпсэущтыгъэ­хэ Семен Садовинымрэ Даниил Берсеневымрэ яIоф АР-м и Апшъэрэ хьыкум хэплъагъ. Ахэр Урысыем и Уголовнэ кодекс ия 228.1-рэ статья ия 5-рэ Iахь ыкIи ия 228.3-рэ статья ия 3-рэ Iахь къащыдэлъытэгъэ бзэджэшIагъэр зэрахьагъэу агъэмысагъэх.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм С.С. Садовинымрэ Д.П. Берсеневымрэ зыщыпсэухэрэм синтетикэм ха­шIыкIырэ наркотикхэр зыщашIырэ лабораторие щагъэпсыгъэу къы­чIагъэщыгъ.
Оперативнэ-лъыхъон Iофтхьабзэхэр зызэрахьэхэм, «мефед­рон» («4-метилметкатинон») зы­фаIорэ наркотикэу грамм 1276,16-рэ хъурэр, оборудованиеу, нэмыкIэу ащ ишIын ищыкIагъэхэр япсэупIэ къырагъотагъэх. АР-м хэгъэгу кIоцI IофхэмкIэ и Министерствэ иэкспертнэ-криминалистическэ Гупчэ зэригъэунэфыгъэмкIэ, реагентэу къагъотыгъэхэм наркотик килограмм 11-м ехъу ахэкIыщт.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ следствиехэмкIэ иотделение уголовнэ Iоф къызэIуи­хи, ар зэхифыгъ.
АР-м и Апшъэрэ хьыкум С.С Садовинымрэ Д.П. Берсеневымрэ, Урысыем и Уголовнэ кодекс ия 228.1-рэ статья ия 5-рэ Iахь ыкIи ия 228.3-рэ статья ия 3-рэ Iахь къызэращыдэлъытагъэм тетэу, нэбгырэ пэпчъ, илъэс 15-рэ мэзи 6-рэ хьапс атырилъхьагъ.
Хьыкумым рихъухьагъэм кIуа­чIэ иIэ хъугъэ.