Мыекъуапэ щыпсэурэ хъулъфыгъэу экстремизмэм цIыфхэр фэзыгъэблыщтыгъэхэм иIоф къэлэ хьыкумыр хэплъагъ.

АР-м и Мыекъопэ къэлэ хьыкум илъэс 50 зыныбжь Вячеслав Луговым иIоф хэплъагъ. Ар Урысыем и Уголовнэ кодекс ия 280-рэ статья иапэрэ Iахь къыщыдэлъытэгъэ бзэджэшIагъэр зэрихьагъэу агъэмысагъ.
ЗэрагъэунэфыгъэмкIэ, В.И. Луговыр пстэуми къахэщэу, шапхъэхэм адимыштэу, изакъоу псэущтыгъ, Адыгэ республикэ психоневрологическэ сымэджэщым иучет хэт, ышъхьэкуцI шъобжэу тещагъэ хъу­гъэм хихыгъэу уз гъэтIылъыгъэ иI. Ипсихикэ зэрэзэщыкъуагъэм, УФ-м ихэбзэ къулыкъухэм джэгъогъуныгъэу афыриIэм къахэкIэу цIыфхэр бэу зыщызэхэхьэрэ чIыпIэхэм полицием икъулыкъушIэхэр аукIынхэу, бырсыр къаIэтынэу Мыекъуапэ дэсхэм къащяджэщтыгъ.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ уголовнэ Iоф къызэIуихи, зэхифыгъ.
В.И. Луговым психиатрическэ уз зэриIэм къыхэкIэу мы лъэныкъом­кIэ IэпыIэгъу зыщаратырэ сымэджэщым щеIэзэнхэ фаеу Мыекъопэ къэлэ хьыкумым рихъухьагъ.

ЩынэгъончъэнымкIэ Федеральнэ къулыкъум АР-мкIэ
и ГъэIорышIапIэ ипресс-къулыкъу