Адыгеим и ЛIышъхьэу КъумпIыл Мурат Сбербанкым и Къыблэ-КъохьэпIэ банк итхьаматэу Анатолий Песенниковым АР-м и Правительствэ зычIэт унэм щыIукIагъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэ игуа­дзэу, АР-м финансхэмкIэ иминистрэу Виктор Орловыр, экономикэ хэхъоныгъэмкIэ ыкIи сатыумкIэ министрэм ипшъэрылъхэр зыгъэцакIэу КIыкI Артур, Сбербанкым и Адыгэ къутамэ ипащэу ДышъэкI Асхьад.
ЦIыфхэмрэ бизнесымрэ къэралыгъо IэпыIэгъу ягъэгъотыгъэнымкIэ программэхэм адиштэу, социальнэ проектхэр республикэм щыгъэцэкIэгъэнхэм тегъэ­псыхьагъэу Адыгеимрэ банкымрэ язэдэ­лэжьэныгъэ илъэныкъохэм зэIукIэм щатегущыIагъэх. Ахэм зэу ащыщ цIыфхэм яахъщэ пIэлъэ кIыхьэкIэ банкым щыIыгъыгъэным тегъэпсыхьэгъэ программэр. Урысыем и Президент пшъэрылъ зэрафишIыгъэм тетэу 2024-рэ илъэсым ар пхыращэу рагъэжьагъ. Мы программэм ишIуагъэкIэ гухэлъ шъхьаIэхэм апае цIыфхэм мылъку аугъоин, хэхъо тедзэ яIэн алъэкIы.
Финанс фэIо-фашIэхэм язегъэушъомбгъункIэ, джырэ цифрэ шIыкIэхэм ягъэ­федэнкIэ, инновационнэ проектхэр пхырыщыгъэнхэмкIэ Урысые Федерацием и Президент къыгъэуцугъэ пшъэрылъхэр республикэм щыгъэцэкIэгъэнхэм мэхьанэшхо зэряIэр Адыгеим и ЛIышъхьэ къыхигъэщыгъ.
«Республикэм ихэбзэ къулыкъу­хэмрэ Сберымрэ зэдэлэжьэныгъэ зызэдыряIэр илъэсыбэ хъугъэ. Ар тапэкIи лъыдгъэкIотэнэу тыфай, лъэпкъ проектхэм нахьыбэу шIуагъэ къатынымкIэ, хэгъэгум технологическэ суверенитет иIэным тегъэпсыхьагъэу УФ-м и Президентэу Владимир Путиным къыгъэуцугъэ пшъэ­рылъхэм ягъэцэкIэнкIэ финанс амалэу Сберым игъо ылъэгъу­хэрэр дгъэфедэхэ тшIоигъу. ТиIофшIэн илъэныкъо шъхьа­Iэхэм ащыщэу къэнэжьы бизнесым ишIуагъэ арагъэкIыныр, фэгъэкIотэныгъэ зиIэ чIыфэхэр къаратынымкIэ IэпыIэгъу ягъэгъотыгъэныр. Инвестициехэр нахьыбэу республикэм къыхалъхьаным, экономикэм илъэныкъо шъхьаIэхэм зягъэушъомбгъугъэным а пстэури афэIорышIэ», — къыIуагъ КъумпIыл Мурат.
Республикэм ихэбзэ къулыкъухэмрэ Сберымрэ зэдэлэжьэныгъэ пытэ зэрэзэдыряIэм пае Сбербанкым и Къыб­лэ-КъохьэпIэ банк итхьаматэ АР-м и ЛIышъхьэ зэрэфэразэр риIуагъ.
Сберым 2025-рэ илъэсым сомэ миллиард 38,9-рэ хъурэ чIыфэхэр респуб­ликэм ибизнес къыфыхигъэкIыгъэх, ащ щыщэу сомэ миллиард 30,9-м ехъур бизнес-проектхэм язегъэушъомбгъун пэIуагъэхьагъ. 2024-рэ илъэсым егъэ­пшагъэмэ, фэди 2,5-кIэ ар нахьыб. Ипотекэ зыштэхэрэми къахэхъуагъ. Илъэсым къыкIоцI Сберым процент 24-кIэ нахьыбэу чIыфэхэр Адыгеим къыритыгъэх, сомэ миллиард 25,4-м ахэр нэсыгъэх. Сомэ миллиард 18 зытефэщт проектхэм апае чIыфэ къафыхэгъэкIыгъэным фэгъэхьыгъэ унэшъо 14 банкым ыштагъ, ахэм япроцент 97-мкIэ эскроу- счетхэр агъэфедэщтых. 2025-рэ илъэсым Адыгеим щыпсэухэрэм пстэумкIи сомэ миллиарди 7,2-рэ хъурэ ипотекэ чIы­фэхэр къаIахыгъэх, ащ щыщэу сомэ миллиарди 6,5-р къэралыгъо IэпыIэгъу зыпылъ чIыфэх. Эскроу-счетхэр къызфагъэфедэзэ, унэ республикэм къыщыщэфыгъэным цIыфхэм сомэ миллиарди 9 фэдиз халъхьагъ.
«Пшъэрылъэу тиIэр бизнесым изегъэушъомбгъункIэ, цIыфхэм ящыIэкIэ-псэукIэ зыкъегъэIэтыгъэнымкIэ, зекIохэм гупсэфэу Адыгеим зыщагъэпсэфынымкIэ IэпыIэгъу тафэхъуныр ары. Ипотекэхэм азыныкъо нахьыбэмкIэ зэзэгъыныгъэхэр тиIэпыIэгъу хэлъэу республикэм щызэхагъэуцох, лэжьапкIэр, социальнэ ахъщэр къаратынымкIэ, унэгъо мылъкум хэгъэхъогъэнымкIэ нэбгырабэмэ Сберыр къы­хахы. Илъэсым къыкIоцI Сберым чIыфэу бизнесым фитIупщыгъэм фэди 2-кIэ хэ­хъуагъ, 2026-м щылэ мазэм и 1-м ехъулIэу сомэ миллиард 33,6-рэ ар хъугъэ. Розничнэ чIыфэри проценти 7-кIэ нахьыбэ хъугъэ, сомэ миллиард 42,6-м ар нэсыгъ. Джащ фэдэу пассивхэми ахэхъо. 2026-рэ илъэсым иублэгъу ехъу­лIэу предпринимательхэм яахъщэу къызфагъэфедагъэр сомэ миллиарди 5,8-рэ хъущтыгъ. 2025-м процент 18-кIэ ащ хэ­хъуагъ. Розничнэ лъэныкъомкIи мылъкоу аугъоигъэм илъэсым къыкIоцI процент 15 хэхъуагъ, сомэ миллиард 50 фэдиз ар хъугъэ. 2026-рэ илъэсми джащ фэдэу тиIофхэр зэпыфэнхэу, пшъэрылъэу тиIэхэр зэкIэ дгъэцэкIэнхэу тэгугъэ», — къыIуагъ Анатолий Песенниковым.
ЗэдагъэцэкIэрэ Iофыр нахь зыщагъэ­лъэшын фэе лъэныкъо заулэ АР-м и ЛIышъхьэ къыхигъэщыгъ, республикэм ифинанс инфраструктурэ нахьышIу шIыгъэнымкIэ, банкхэм нахьышIоу фэIо-фашIэхэр агъэцэкIэнхэмкIэ хэбзэ къулыкъухэм Сбербанкым зэдэлэжьэныгъэу дыряIэр тапэкIи нахь агъэпытэ зэрашIоигъор къыIуагъ.
АР-м и ЛIышъхьэ ипресс-къулыкъу къытырэ къэбархэмкIэ ЛIышэ Саныет.