Студент анахь дэгъух
Урысые Федерацием и Президент ыкIи и Правительствэ агъэнэфэгъэ стипендиер илъэс къэс тиапшъэрэ еджапIэхэм ястудент анахь дэгъухэм араты. 2025 — 2026-рэ еджэгъу илъэсым Адыгэ къэралыгъо университетым чIэс нэбгыри 5-мэ ыкIи Мыекъопэ къэралыгъо технологическэ университетым истудент 11-мэ ар къахьы.
Мы стипендиер аратыным шэпхъэ гъэнэфагъэхэр пылъых. Анахь шъхьаIэр академическэ чIыфэ ямыIэныр ары. ЕджафэхэкIэ оценкэу «щы» иIэ хъущтэп, джащ фэдэу оценкэхэм япроцент 50-р «тфын» фае. Стипендиер илъэсырэ аратыщт, Урысыем ит апшъэрэ еджапIэхэм очнэ шIыкIэм тетэу ащеджэхэрэм ащыщхэр ары къыхахыхэрэр.
УФ-м и Правительствэ истипендиеу сомэ мин 20-р мазэ къэс къараты лъэныкъо зэфэшъхьафхэмкIэ шIэныгъэ зэзыгъэгъотыхэу, ягъэхъагъэхэмкIэ нахь къахэщыхэрэм. Адыгэ къэралыгъо университетым гъэсэныгъэм ыкIи педагогикэ шIэныгъэхэм алъэныкъокIэ студентитIу къыхахыгъ, ахэр адыгэ филологиемрэ ыкIи культурэмрэкIэ факультетым истудентхэу Бэгъырэкъо Анастасиерэ Диана Муселимянрэ. Хьисап ыкIи естественнэ шIэныгъэхэм алъэныкъокIэ стипендиер раты естествознаниемкIэ факультетым истудентэу Ирина Байдалаковам. Джащ фэдэу ахэм ахэфагъэх юридическэ факультетым щеджэхэрэ Екатерина Стройковамрэ Чэтэо Азаматрэ.
Урысыем шIэныгъэ-технологие хэхъоныгъэхэм япхыгъэ сэнэхьатхэр ыкIи лъэныкъохэр къыхэзыхыгъэ студент анахь чанхэм УФ-м и Президент истипендиеу сомэ мин 30-р мазэ къэс араты. Инженернэ IофхэмкIэ, технологиемкIэ ыкIи техническэ шIэныгъэхэмкIэ хэхъоныгъэхэр зиIэхэр ары къыхахыхэрэр. Мыгъэ мыщ фэдэ стипендиер къылэжьыгъ гъэунэфыгъэ шIэныгъэхэмкIэ ыкIи цифрэ технологиехэмкIэ Институтым щеджэрэ Тимофей Бычковым.
Джащ фэдэу Бэгъырэкъо Анастасиерэ Тимофей Бычковымрэ хэушъхьафыкIыгъэ шIухьафтынхэр мэфэкI зэхахьэм къащафагъэшъошагъэх.
Мыекъопэ къэралыгъо технологическэ университетымкIэ лъэныкъуи 5-кIэ шIэныгъэ зэзыгъэгъотырэ студентхэм Урысые Федерацием и Президент ыкIи и Правительствэ агъэнэфэгъэ стипендиер араты: IэзэнымкIэ факультетым щеджэхэрэ УдыкIэко Даринэ, Алена Бахтинам, Мэрэтыкъо Беллэ, Итыу Салбый, Розалия Обмачевскаям. ЭкономикэмкIэ ыкIи гъэIорышIэнымкIэ факультетым имагистратурэ щеджэрэ Дарья Козловам, фармацевтикэмкIэ факультетым щеджэхэрэ Ангелина Меркуловам, Дарья Хорольцевам, педиатриемкIэ факультетым чIэс Виктория Плетюховам, экономикэмкIэ къэбарлъыгъэIэс системэмкIэ ыкIи юриспруденциемкIэ факультетым щеджэрэ Вероника Монисовам, стоматологиемкIэ факультетым чIэс Кобэщыч Аминэт.
Мы ныбжьыкIэхэм янахьыбэр Мыекъопэ къэралыгъо технологическэ университетым и Студент шIэныгъэ обществэ чанэу хэлажьэх, шIэныгъэ IофшIэнэу агъэцакIэхэрэм мыщ фэдэ гъэхъагъэхэр къакIэкIуагъ.
ДЕЛЭКЪО Анет.