Адыгэ Республикэм хэгъэгу кIоцI IофхэмкIэ и Министерствэ игъэIорышIапIэу наркотикхэр къызэрэрагъэкIокIырэм лъыплъэрэм иIофышIэхэм ыпэкIэ мызэу, мытIоу уголовнэ пшъэдэкIыжь зыхьыгъэу, бгъэфедэн узфимыт веществохэр зыщэхэу зэгуцэфэхэрэ илъэс 50 зыныбжь хъулъфыгъэр къыхагъэщыгъ ыкIи къаубытыгъ.

Охътэ гъэнэфагъэкIэ узэкIэIэбыжьымэ нафэ хъугъагъэ къаубытыгъэм къалэу Мыекъуапэ ихьэнэ-гъунэ щыпсэухэу наркотикхэр зыгъэфедэхэрэр къыхигъэщыхэзэ, ахэм вещество зэфэшъхьафхэр зэрарищэщтыгъэр.
— Игъом зэхэтщэгъэ уплъэкIун Iофхэм яшIуагъэкIэ тиоперативнэ IофышIэхэм агъэу­нэфын алъэкIыгъ мы хъулъфыгъэм Iушъхьэ хьаджыгъэ грамм 20-м ехъу зэрищагъэр, — къыфаIотагъ «Адыгэ макъэм» гъэIорышIапIэм иIофышIэхэм.
Нэужым хъулъфыгъэр зыщыпсэурэ чIыпIэри къалъыхъугъ ыкIи Iушъхьэ хьаджыгъэмрэ кIэпымрэ къырахыгъэх.
Полицием иэкспертхэм зэхащагъэ уплъэ­кIунхэм къызэрагъэлъэгъуагъэу, зэгуцафэ­хэ­рэм иунэ къырагъотагъэхэр наркотик зыхэлъ веществохэу къычIэкIыгъэх. Ахэм яонтэгъугъэ грамм 200 фэдиз хъущтыгъ.
Следствием иIофышIэхэм къызэраIуагъэмкIэ, Урысые Федерацием и Уголовнэ Кодекс ия 228.1-рэ статья ия 4-рэ Iахь ыкIи ия 30-рэ статья къызэрэдалъытэу уголовнэ Iоф къызэIуахыгъ. Хъулъфыгъэр изоляторым чIагъэтIысхьагъ.
Гъомлэшк Байзэт.