КIэлэцIыкIухэм ацэхэм яIэзэрэ врачитIу Адыгеим икIыхи Херсон хэкум кIуагъэх. Врач-гуфакIохэм чэзыу-чэзыоу къэлэ гъэпсыкIэ зиIэ псэупIэу Нижние Серогозы дэт гупчэ район сымэджэщым тхьамэфитIум кIэлэцIыкIухэм япсауныгъэ изытет щауплъэкIущт. А уахътэм къыкIоцI кIэлэцIыкIуи 150-рэ фэдизмэ медицинэ IэпыIэгъу арагъэгъотыщт.

Медицинэ IофышIэхэм ягъусэу Херсон хэкум шIушIэ IэпыIэгъуи ащэ. ГуфакIохэм дзэ госпиталым къырахьылIагъэх чIэгъчIэлъхэр, футболкэхэр, лъэпэдхэр, пхъэ­шъхьэ-мышъхьэхэр, IэшIу-IушIухэр, къэб­зэныгъэмкIэ зэрахьылIэрэ пкъыгъо­хэр. Геническэ район сымэджэщым, Нижние Серогозы игупчэ район сымэ­джэщ яIофышIэхэми, ясымаджэхэми ахэр афагощыщтых. Адыгеим идзэ­къулыкъушIэ хэушъхьафыкIыгъэ дзэ операцием хэлэжьэрэ тидзэкIолIхэм IэшIу-IушIухэмрэ «Единэ Россием» ипартийнэ проектэу «ЛIэуж нахьыжъыр» зыфиIорэм хэлажьэхэрэм ахъыгъэ хъы­тыухэмрэ аритыжьыгъэх.

Медицинэ учреждениехэм, дзэкъулыкъушIэхэм щыгъынхэмрэ IэшIу-IушIухэмрэ къафэзыугъоигъэхэр партиеу «Единэ Россием» дезыгъаштэхэрэм яреспуб­ликэ штаб иIофышIэхэр, партийнэ проектэу «ЛIэуж нахьыжъыр» зыфиIорэм хэлажьэхэрэр, Адыгеим ыцIэкIэ сенаторхэр, Мыекъуапэ икъэлэ Совет идепутатхэр, ассоциациеу «Адыгэ Респуб­ликэм имуниципальнэ образованиехэм я Совет» хэтхэр, Хэгъэгум идзэкIолIхэм яунагъохэм я Комитет АдыгеимкIэ ишъолъыр штаб, гуфэкIо купхэм ахэтхэр ары.
«Непэрэ шIушIэ Iофтхьабзэр тидзэкIолIхэм, шъолъырыкIэхэм ащыпсэухэрэм IэпыIэгъу ягъэ­гъотыгъэнымкIэ Iофышхоу зэрахьэрэм изы Iахьэу щыт. ХэушъхьафыкIыгъэ дзэ операциер заублагъэм къыщегъэжьагъэу «Единэ Россиер» якIэща­кIоу шIушIэ IэпыIэгъу тонн мини 5,5-м ехъу къаугъоигъ ыкIи Херсон хэкум IэкIагъэ­хьагъ. ТипсэолъэшIхэм инфраструктурэм, гъэсэныгъэм, спортым, культурэм япсэолъипшI пчъагъэ Геническэ районым щагъэпсыгъ ыкIи щагъэцэкIэ­жьыгъ.
Общественникхэм, республикэм щыпсэухэрэм, предпринимательхэм «тхьашъуегъэпсэу» ясэIо мыщ фэдэ шIушIэ Iофтхьабзэм чанэу зэрэхэлажьэхэрэм фэшI! ЗэрэзэфэгумэкIыжьхэрэм, IэпыIэгъу зэрэзэфэхъужьхэрэм тихэгъэгу щыпсэухэрэр нахь пытэу зэрапхых ыкIи ащ ишIуагъэкIэ сыд фэдэрэ къиныгъуи зэгъусэхэу зэпачын алъэкIы», — аритхагъ КъумпIыл Мурат социальнэ хъытыухэм.