КъокIыпIэ музеим и Темыр-Кавказ къутамэ «Искусствэхэм языкIыныгъэ — лъэпкъхэм акIуачI» зыфиIорэ къэгъэлъэгъоныр къыщызэIуахыгъ. Лъэпкъ зыкIыныгъэм и Илъэс къыдыхэлъытэгъэ Iофтхьабзэм искусствэ лъагэм идунай ухещэ.

Темыр Кавказым ыкIи Урысыем и Къыблэ шъолъыр ясурэтышIхэм яIоф­шIэнхэр къэгъэлъэгъоным хэхьагъэх. 1963-рэ илъэсым къыщыублагъэу сурэтышI 46-мэ яIофшIэгъи 120-рэ фэдиз Iофтхьабзэм хэлажьэ. Произведениехэр живописым, графикэм ыкIи декоративно-прикладной искусствэм, скульптурэм яшъуашэхэм арылъых. Музеим икъутамэ ипащэу ШъэуапцIэкъо Аминэт зэхахьэр къызэIуихыгъ.
— Лъэпкъхэм языкIыныгъэ джырэ уахътэм мэхьанэшхо иI. Дунаим тет цIыф лъэпкъхэр культурэм зэрепхых. Лъэпкъыбэ зэрыс Кавказым ахэм къа­хэкIыгъэхэр зэдырагъаштэу, мамырэу щэпсэух зыфэдэ къэмыхъугъэ яхабзэхэр, якультурэ къаухъумэхэзэ, ахэм хахъо афашIызэ. Къэгъэлъэгъон гъэшIэгъонэу къышъуфэдгъэхьазырыгъэм лъэпкъ пэпчъ инэшанэхэр пхырыщыгъэх, — къыIуагъ музеим ипащэ.
КъэгъэлъэгъуапIэм щыкIогъэ зэха­хьэм къыщыгущыIагъ АР-м исурэтышI­хэм я Союз итхьаматэу Елена Абакумовар.
— Непэрэ къэгъэлъэгъоным хэхьа­гъэр илъэсыбэм алэжьыгъэ IофшIагъэхэм яIахь цIыкIу ныIэп. ГукъэкI гъэшIэгъонхэр IэпэIасэхэм агъэфедэзэ, илъэсыбэм IэшIэгъабэ аIапэ къычIэкIыгъ, — къы­Iуагъ ащ.
— Тилъэпкъхэм языкIыныгъэ ыкIи язэкъошныгъэ гъэпытэгъэн­хэм Iофтхьабзэр тегъэпсы­хьагъ. Мамырныгъэ щыIакIэм ишап­хъэхэр, шэн-хабзэхэр, лъытэныгъэмрэ зэгурыIоныгъэмрэ якъы­зэтегъэ­нэн ыкIи яхэгъэ­хъон Адыгеим щылъыдгъэкIотэным пае тимузей мэлажьэ, — къыхигъэщыгъ музеим испециалист шъхьаIэу Елена Ильинам.
СурэтышIхэм щыIэныгъэм илъэныкъуабэ къызэлъаубытызэ, искусствэм ыбзэкIэ сурэтхэм акупкI къырагъэлъэгъу­кIыгъ. Искусствэм, шэн-хабзэхэм, Урысыем щыпсэурэ лъэпкъхэм ящыIэкIэ-псэукIэ яхьылIэгъэ сурэтхэр дахэх, лъэгъуп­хъэх, тарихъым иIотакIох. Паштэ Герман, Къат Теуцожь, ПIэтIыощэ Феликс, Ольга Бреславцевам, Хъуажъ Рэмэзан, нэмыкIхэм яIофшIагъэхэм искусствэм гъунапкъэ зэримыIэр джыри зэ къаушыхьатыгъ.
ИскусствэхэмкIэ колледжэу Тхьабысымэ Умарэ ыцIэ зыхьырэм истудентхэр зэхахьэм хэлэжьагъэх.
— Iофтхьабзэм къыщагъэлъэгъорэ IэшIагъэхэр лъэшэу гъэшIэгъоных. Анахьэу къыхэзгъэщыгъэ сурэтхэр «Сельская сходка» зыфиIоу Осетием исурэтышI цIэрыIо ышIыгъэр, МэщбэшIэ Исхьакъ исурэтэу Виталий Баркиным иIофшIагъэр, ЛэупэкIэ Нурбий иIэшIа­гъэу «ХьакIэщ» зыцIэр. Адыгеим щыпсэурэ лъэпкъхэр зэкIэ Урысыешхом хэпчынхэ умылъэкIынэу изы Iахьэу зэрэщытым IофшIагъэхэр ишыхьатых, — къыIуагъ Ульяна Волынка.
Iофтхьабзэм Адыгэ Республикэм ишIэ­ныгъэлэжьхэм ащыщхэр, сурэтышIхэр, АР-м культурэмкIэ и Министерствэ илIыкIохэр хэлэжьагъэх. Искусствэм идунай хьалэмэт ухэзыщэрэ къэгъэлъэ­гъоныр гъэтхапэм и 30-м нэс зэIухы­гъэщт.
Лъэпшъыкъо Фатим.