КIэлэцIыкIу къэшъокIо ансамблэу «Шапсыгъэ нартхэр» зыфиIорэм изэфэхьысыжь концерт адыгэ лъэпкъ культурэр зикIасэхэмкIэ мэфэкI шъыпкъэ хъугъэ.

Лъэпкъ культурэхэм я Гупчэу ПсышIуапэ дэтым концерт къыщызытыгъэ ансамблэм илъэсипшIыкIэ узэкIэIэбэжьмэ пащэ фэхъугъэх хореографхэу Лые Артуррэ Аксанэрэ. А хъугъэ-шIагъэр мэфэкI концерткIэ ха­гъэунэфыкIыгъ. Залым тIысыпIэ нэкI иIагъэп, ижъырэ лъэпкъ къашъор зикIасэмэ ар зэлъаубытыгъагъ.
2015-рэ илъэсым творческэ купым итарихъ нэкIубгъуакIэ къызэIуихыгъ: «Нартхэр» зэхэзыщагъэу ыкIи илъэс заулэхэм ипэщэгъэ Хьамырзэкъо Джумалдин, ар ащ ыпэкIэ «Налмэсым» икъэшъокIо чанэу щытыгъ, иунэгъо Iофхэм апкъ къикIыкIэ Мые­къуапэ ыгъэзэжьыгъ, ежь ычIыпIэкIэ къыгъэнагъэх иIофшIэгъухэу Лые Артуррэ Аксанэрэ. Ахэм Iофыр зэрэлъагъэкIотэщтым ицы­хьэ пытэ телъыгъ, сыдигъокIи иIэ­пыIэгъугъэхэу, хэшIыкIышхо Iоф­шIэным фыряIэу щытыгъэхэти. Лыехэр Къэрэщэе-Черкес Рес­публикэм и Къэралыгъо театрэ икъэшъокIо ансамблэу «Меркурий» зыфиIорэм къыщышъощтыгъэх. IэпэIэсэныгъэшхо ахэлъ, сэ­нэхьатым фэшъыпкъэх, анахь проект хьылъэри лъэгапIэм нагъэсышъу. Джумалдин хэукъуа­гъэп, илъэсипшIым ансамблэм гъэхъагъэхэр ышIыгъэх, текIоныгъабэ къыдихыгъ.
— Илъэс пшIыкIущкIэ узэкIэIэбэжьмэ, чIыпIэ нэ­кIым кIэлэцIыкIу къэшъокIо ансамблэу «Шапсыгъэ нартхэр» зыщызэхэтэщэм, ис­кусствэм ылъэныкъокIэ зы гъэхъагъэ горэ тшIыным зи къыщыгугъыщтыгъэп, — ыгу къэкIыжьы Лые Артур. — Апэ гукъэкIэу щыIагъэр сэ­наущыгъэ зыхэлъ ныбжьыкIэхэр зэхэщэгъэнхэр, шъэо­жъыехэмрэ пшъэшъэжъыехэмрэ лъэпкъ культурэм хэщэгъэнхэр арыгъэ ныIэп. Ау уахътэм дакIоу пшъэрылъхэри къэуцугъэх, творческэ лъэгапIэри къаIэтыгъ. Зичэзыу пшъэрылъыр агъэцакIэ къэс, хэгъэгум икъэшъокIо анахь дэгъухэм ащыщ зэрэ­хъущтхэм артист ныбжьыкIэхэр егупшысэщтыгъэх. Лъэбэкъу-лъэбэкъоу ащ фа­кIощтыгъэх. Сыд фэдэрэ хэхъоныгъи уегъэгушIо, ау гъэхъэгъищ анахьэу «Нартхэр» зыгъэгушхорэр: Урысыем ичемпионат, лъэпкъ къа­шъохэмкIэ Урысыем и ЗэIу­хыгъэ Кубок ыкIи Къыблэ федеральнэ шъолъырым и Кубок текIоныгъэхэр къа­зэращыдахыгъэр.
— А гъэхъагъэхэм бэрэ та­фэкIуагъ, — къеIуатэ Лые Артур. — Iофыгъо шъхьаIэр къыддэхъугъ: «Шапсыгъэ нартхэр» хэгъэгум ит ансамблэ анахь дэгъухэм ащыщ хъугъэ. Урысыем ишъолъыр зэфэшъхьафхэм, икъалэхэм ыкIи IэкIыб хэгъэгухэм ныб­джэгъубэ къащытфэхъугъ, Грузием тыщыIагъ — а зэ­пстэуми мэхьанэ яI. Искусствэм илъэгапIэ унэсыным ыкIи ащ утетышъуным пае ренэу Iоф зыдэпшIэжьын фае. Къиныгъомэ тыкъагъащтэрэп, къыддэмыхъурэмэ нахь тагъэпытэ, кIуачIэ къы­таты зыкъэтшIэжьынэу, тицыхьэ зытелъыжьынэу ыкIи ыпэкIэ тылъыкIотэнэу!
Зэфэхьысыжь концерт пэпчъ пащэхэмкIи къэшъуакIохэмкIи ушэтын, пшъэдэкIыжьышхо зыпылъ Iоф. Шэхапэ щыпсэурэ шъэожъые ыкIи пшъэшъэжъые нэбгырэ тIо­кIищым ехъу ансамблэм къыщэшъох, ахэр лъэпкъ зэфэшъхьаф­хэм ащыщых, анахь номер дэ­гъоу агъэхьазырыгъэхэр, репертуар баир залым чIэсхэм къарагъэ­лъэгъугъ. Про­граммэм лъэпкъ къа­шъохэу ыкIи гъэу­цугъэ номерхэу пшIым ехъу хэтыгъ. Ахэм янахьыбэр зэнэ­къокъухэм ыкIи фестивальхэм къащатыгъахэхэу, осэшхо къы­зыфашIыгъэхэу щытых. Ныб­жьыкIэхэр гумэкIыщтыгъэх нахь мышIэми, дэгъу дэдэу къэшъуагъэх, цIыфэу къафекIолIагъэхэр агъэрэзагъэх.
Хабзэ зэрэхъугъэу, «Нартхэм» ямэфэкI концерт хэлэжьагъэх яныбджэгъухэр — зэлъашIэрэ пщынаоу, ШэхэкIэй щыщэу, ­Адыгэ Республикэм изаслуженнэ артистэу Гъуашэ Хъалид, Къэрэщэе-Черкес Республикэм изаслуженнэ артистэу, орэдыIоу, ша­псыгъэмэ дэгъоу ашIэрэ Пхъэшх Азамат. Лъэпкъ культурэхэм я Гупчэ ипащэу Ольга Комаровар, культурэм и Унэу Шэхапэ дэтым ипащэу Людмила Ткачен­кэр, «Кич­май» зыцIэ ТОС-м и Совет итхьаматэу ЛIыф Хъалид ыкIи ШэхэкIэй къоджэ псэупIэм иадминистрацие илIыкIохэр творческэ купым зэфэхьысыжь-мэфэкI концертымкIэ къыфэгушIуагъэх. Ансамблэм ипащэхэр, испонсорхэр ыкIи илъэс пчъагъэхэм яIэпыIэгъугъэхэр рэзэныгъэ тхылъхэмкIэ къыхагъэщыгъэх.
Ныбэ Анзор.