Адыгеим и ЛIышъхьэу КъумпIыл Муратрэ Тырку Республикэм и Генеральнэ консулэу къалэу Краснодар щыIэ Эмир Озбайрэ АР-м и Правительствэ зычIэт унэм зэIукIэгъу щызэдыряIагъ. 2025-рэ илъэсым шэкIогъум и 21-м а IэнатIэм ар Iуагъэхьагъ ыкIи республикэм нэIуасэ зыфишIынэу къэкIуагъ. Ащ игъусагъэх Тырку Республикэм сатыумкIэ илIыкIоу Мухаммет Кюлфетоглу ыкIи и Генеральнэ консул иIэпыIэгъоу къалэу Краснодар щыIэ Севиль Шейховар.

ЗэIукIэгъум илъэхъан Адыгеимрэ Тыркуемрэ яхэхъоныгъэ иIофыгъохэм атегущыIагъэх. Урыс-тырку зэфыщытыкIэхэм ягъэпытэн нахьыбэу къызщыуцугъэхэр. ЗэдэгущыIэгъухэм ахэлэжьагъэх АР-м и ЛIышъхьэ IэкIыб къэрал зэпхыныгъэхэмкIэ ыкIи инвестиционнэ политикэмкIэ иIэпыIэгъоу Хьакъунэ Бэллэ, УФ-м IэкIыб къэрал IофхэмкIэ и Министерствэ и ЛIыкIо IофшIапIэу Краснодар щыIэм иупчIэжьэгъоу Игорь Терзиян, экономикэ хэхъоныгъэмкIэ ыкIи сатымукIэ министрэм ипшъэрылъхэр зыгъэцэкIэрэ КIыкI Артур, Сатыу-­промышленнэ палатэм итхьаматэу Гъыщ Марат, Адыгэ Республикэмрэ Краснодар краимрэ ащыпсэурэ быслъымэнхэм я ДиндэлэжьапIэ ипащэу Къэрдэнэ Ас­кэрбый, Адыгэ къэралыгъо университетым иапэрэ проректорэу ЛIыхьэтыкъо Сусаннэ.

«Урысыемрэ Тыркуемрэ лъэныкъо пстэури къызэдэзыубытырэ зэпхыныгъэ пытэхэр азыфагу илъ хъугъэх. Пстэуми апэу ар типащэхэу Владимир Путинымрэ Реджеп ­Тайип Эрдоганрэ яшIушIагъ. Тихэгъэгухэм ярезедентхэм блэгъэныгъэ зэфыщытыкIэу азыфагу илъ хъугъэхэм шъолъыритIумэ язэгурыIоныгъэ, язэдэлэжьэныгъэ нахь хэхъонымкIэ яшIуагъэ къэкIо. Илъэ­сыбэхэм Адыгеимрэ Тыркуемрэ зэзыпхыхэрэ блэгъэныгъэ зэфыщытыкIэхэм осэшIу афэтэшIы. Адыгэ диаспорэ анахь инэу урысые-тырку зэдэлэжьэныгъэм игъэпытэн зиIа­хьышIу хэзышIыхьэрэр Тырку Рес­публикэм зэрисым ифэмэ-бжьыми а зэфыщытыкIэхэм къатырехьэ», — къыIуагъ КъумпIыл Мурат.

ЭкономикэмкIэ, культурэмкIэ, гуманитар ыкIи нэмыкI лъэныкъохэмкIэ тишъолъыр Тыркуем дыриIэ зэдэлэжьэныгъэр лъыгъэкIотэгъэным зэрэфэхьазырыр АР-м и ЛIышъхьэ къыхигъэщыгъ. Гъэсэныгъэмрэ шIэныгъэмрэ алъэны­къокIи зэдэлэжьэныгъэр лъэкIуатэ: уры­сыбзэмрэ адыгабзэмрэ ягъэшIэгъэн­хэмкIэ программэхэр агъэцакIэх, ащ къыхеубытэх Тыркуем иапшъэрэ еджапIэхэм атегъэпсыхьагъэу егъэджэн Iоф­тхьабзэхэр зыщызэрахьэхэрэр. Къалэхэу къошныгъэ зэдызиIэхэм атегъэпсы­хьагъэу лъэныкъуитIумэ язэдэлэжьэныгъи зеушъомбгъу. Мыекъуапэ ащ фэдэ зэфыщытыкIэхэр адыриIэх Газиантепрэ Анкара имуниципальнэ районэу Чанкайрэ, джащ фэдэу Тэхъутэмыкъое районым Тыркуем икъалэу Инегюль блэгъэныгъэ фыщытыкIэхэр дыриIэх. А къэралыгъом дэгъоу щызэлъашIэх рес­публикэм иансамблэ цIэрыIохэу «Налмэсымрэ» «Ислъамыемрэ». Тыркуем щы­кIорэ дунэе культурнэ Iофтхьэбзэ зэфэшъхьафхэм ахэлажьэх Адыгеим итворческэ купхэр.
ЗэдэгущыIэгъум илъэхъан АР-м и ЛIышъхьэ къыIотагъ Адыгеим амалэу иIэхэм, IэкIыб къэрал сатыу зэфы­щытыкIэхэм зягъэушъомбгъугъэнымкIэ гъэцэкIагъэ хъухэрэм афэгъэхьыгъэу. Мы лъэныкъомкIэ Тыркуер республикэм гъусэныгъэ зыдыриIэ хэгъэгу шъхьа­Iэхэм ащыщ. Адыгеим къыщыдагъэ­кIыхэрэр Тыркуем щыIугъэкIыгъэнхэм лъэшэу анаIэ тырагъэты. ЗэдэлэжьэныгъэмкIэ нахь шIогъэ ин къэзытын зы­лъэкIыщт лъэныкъо зэфэшъхьафхэм ахэплъэх. ГущыIэм пае, резидентхэм Iоф ашIэнымкIэ фэгъэкIотэныгъэ зыхэлъ амалхэр щарагъэгъотых промышленнэ шъолъыр инэу Адыгеим щызэхащагъэм. АР-м и ЛIышъхьэ къызэрэкIигъэтхъыгъэмкIэ, Тыркуемрэ Китаимрэ ащ фэдэ промышленнэ шъолъырэу яIэ­хэм IофшIэкIэшIоу аIэкIэлъым зыщигъэгъозагъ. Ащ нэфэшъхьафэу мэкъу-­мэщымкIэ, къыдэгъэкIыжьынымкIэ зэдызэхагъэуцогъэ проектхэр пхырыщыгъэ хъунхэм Адыгеир фэхьазыр. ЗекIонми нахь зиушъомбгъунымкIэ амалы­шхохэр щыIэх. Дунэе мэхьанэ зиIэ зыгъэпсэфыпIэхэм зягъэушъомбгъугъэнымкIэ тырку инвесторхэм IофшIэкIэшIоу аIэкIэлъ хъугъэм зыщагъэгъуазэмэ, ишIуагъэ къызэрэкIощтыр ащ къыIуагъ.
«Къыхэзгъэщынэу сыфай шIуагъэ къэзытыщт зэдэлэжьэныгъэм Адыгеир зэрэфэхьазырыр. Адыгеимрэ Тыркуемрэ азыфагу илъ зэ­пхыныгъэр нахь пытэнымкIэ ти­непэрэ зэIукIэгъуи ишIогъэшхо къы­зэрэкIощтым, урысые-тырку зэфыщытыкIэхэр тапэкIи нахь гъэпытэгъэнхэмкIэ амалышIу зэ­рэхъущтым сицыхьэ телъ», — ­къыкIигъэтхъыгъ КъумпIыл Мурат.
Тырку Республикэм и Генеральнэ консулэу Краснодар щыIэм бэмышIэу пыим АдыгеякIэм гумэкIыгъошхоу къыфихьыгъэр гукъао зэрэщыхъугъэр къы­Iуагъ. Эмир Озбай Тырку Республикэм и ЛIыкIоу Москва щыIэ Танжу Бильгич ыцIэкIэ шIуфэс гущыIэхэм къяджагъ.
«Лъытэныгъэ зыфэсшIырэ Мурат Къэралбый ыкъор, Тырку Рес­публикэм ыцIэкIэ Адыгеим сызэрэщыIэр сэркIэ гопэшху. ТапэкIи ти­хэгъэгухэм язэдэлэжьэныгъэ нахь пытэным амалэу тиIэр зэкIэ фэдгъэIорышIэщт. Диаспорэр Урысыемрэ Тыркуемрэ азыфагу илъ зэ­къошныгъэм илъэмыджэу тэлъытэ. Къэралыгъохэм азыфагу илъ лъэ­ныкъуитIу зэфыщытыкIэхэм нахь заушъомбгъунымкIэ, Ори къызэрэхэбгъэщыгъэу, къошныгъэ зэфыщытыкIэхэм мэхьанэшхо яI. Ти Генеральнэ консульствэ лъэныкъо зэфэшъхьафхэмкIэ а зэдэлэжьэныгъэр нахь пытэ хъуным ишIуагъэ ригъэкIыным фэхьазыр. ШIуагъэ къэзытыщт ыкIи псынкIэу хэхъоныгъэ зышIыщт зэфыщытыкIэхэу экономикэм ылъэныкъокIэ тазы­фагу илъыщтхэм IофшIэнымкIэ джыри нахь тызэхэхьан амал къатыным тыщэгугъы», — къыIуагъ Эмир Озбай.
ИкIэухым лъэныкъуитIуми къыхагъэщыгъ Урысыемрэ Тыркуемрэ яфедэ зыхэлъ зэдэлэжьэныгъэм тапэкIи зырагъэушъомбгъуным зэрэфэхьазырхэр.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.