АР-м и ЛIышъхьэу КъумпIыл Мурат пыим ыпкъ къикIэу АдыгеякIэм щыфыкъогъэ унэхэр зыпкъ зэрэрагъэуцожьыхэрэм ышъхьэкIэ гъунэ лъефы. Республикэм ипащэ тхьамыкIагъор къызщыхъугъэ чIыпIэм джыри тыгъуасэ щыIагъ.

Оперативнэ штабым иIофшIэн псэупIэ комплексым зыщыригъэушъомбгъугъ. Зичэзыу дэкIыгъо зэIукIэгъур мыщ щыкIуагъ. Ащ хэлэжьагъэх федеральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэ игуадзэу Виктор Орловыр, Урысыем ошIэ-дэмышIэ IофхэмкIэ и Министерствэ Адыгэ РеспубликэмкIэ игъэIорышIэпIэ ШъхьаIэ ипащэу Станислав Илющенкэр, АР-м иминистрэхэм я Кабинет хэтхэр, Тэхъутэмыкъое районым ипащэу Шъэо Аскэр, ресурсхэр аIэкIэзыгъэхьэрэ организациехэм япащэхэр.

Iофэу ашIагъэм фэгъэхьыгъэу Адыгеим и ЛIышъхьэ къыфаIотагъ, джащ фэдэу цIыфхэм IэпыIэгъу ягъэгъотыгъэнымкIэ апэрэ чэзыоу шIэгъэн фаехэр агъэнэфагъэх. Пшъэрылъ шъхьаIэхэм зэу ащыщ уIэгъэ пстэуми яIэзэгъэныр. АР-м псауныгъэр къэухъумэгъэнымкIэ иминистрэ къызэриIуагъэмкIэ, медицинэ учреждениехэм зафэзыгъэзагъэхэм ящыкIэгъэ IэпыIэгъур арагъэгъоты. Сымэджэщхэм ащагъэхэм япчъагъэ хэхъуагъэп. Нэбгыри 9-мэ уIагъэхэр атещагъэу IэзапIэхэм анагъэсыгъэх. Ахэм япсауныгъэ изытет нахьышIу хъугъэ. НэмыкIхэу зэрар зэрахыгъэхэм психологхэмрэ социальнэ IофышIэхэмрэ IэпыIэгъу арагъэгъоты.

Фэтэрэу агъэфыкъуагъэхэр респуб­ликэм ипсэолъэшIхэм акIуачIэкIэ зыпкъ рагъэуцожьыщтых. КъумпIыл Мурат пшъэрылъ зэрафишIыгъэм тетэу псэ­олъэшI компание заулэмэ якIочIэ шъхьа­Iэхэр АдыгеякIэм агъэкIуагъэх. Нахьыбэу зэрар зыхьыгъэ фэтэрхэр тхьамэфи 5-м къыкIоцI, нахь макIэу агъэфыкъуагъэхэр тхьамэфи 2-м къыкIоцI агъэцэкIэжьынхэу рахъухьэ.

ОшIэ-дэмышIэ тхьамыкIагъо къызщы­хъугъэ чIыпIэм техникабэ, псэолъэпхъэ материалхэр арагъэолIагъэх, специалистхэр жъугъэу ащ щэлажьэх. Зэпыу имыIэу техникэм Iоф ешIэ. Подряднэ, гъэIорышIэкIо организациехэм чIыпIэр агъэ­къабзэ – хэкIыр зэхадзы ыкIи Iуащы. А зы уахътэм псэолъэшIхэм агъэфыкъогъэ унэхэр зыпкъ рагъэуцожьэу рагъэжьагъ. ЧIэнагъэу ашIыгъэр гъэунэфыгъэным пае фэтэр пэпчъ ехьэх. Район администрациемрэ Следственнэ комитетымрэ яспециалистхэм тхылъхэр зыпкъ игъэуцожьыгъэнхэмкIэ ыкIи IэпыIэгъу къаратынымкIэ зэрэзекIон фаехэр къафызэхафы.

Шъэо Аскэр къызэриIуагъэмкIэ, гъэIорышIэкIо компаниехэм унэм щыпсэухэ­рэм, фэтэрэу агъэфыкъуагъэхэм яхьылIэгъэ къэбархэм нэфэгъэ икъу ахалъхьэ, фэтэр 30-мэ зэрар арахыгъэу агъэунэфыгъ. ЧIэнагъэ зэрахьыгъэмкIэ тхылъ 800-м ехъу а унэхэм арысхэм къаIэкIагъэхьагъ. Анахьэу ахэр къызыкIэлъэIухэ­рэр фэтэрхэм шъхьаныгъупчъэ апчхэр ахэлъхьажьыгъэнхэр ары. Унашъхьэхэр, унэхэр зэрэзэтеутыгъэ дэпкъхэр, шъхьаныгъупчъэ, пчъэ блыпкъхэр агъэфыкъуа­гъэх. ЧIылъэ унэхэм арысхэми ятхылъхэр къаIэкIэхьагъэх. ТхьамыкIагъор къы­зыщыхъугъэ чIыпIэм дэжь щыт унэр ары анахьэу чIэнэгъэ­шхо зышIыгъэр. Фэтэр 30-мэ яшъхьаныгъуп­чъэхэр, япчъэ­хэр хэутыгъэх, цIыфхэм ямылъку, ящыгъынхэр бгъэфедэжьынхэ умылъэкIынэу хъугъэ. Автомобиль уцупIэу унэм къыпэблагъэм дэтыгъэ машинэхэр зыщыщхэр къэмышIэжьынэу лъэшэу стыгъэх. АР-м и ЛIышъхьэ пшъэрылъ зэрафишIыгъэм тетэу автомобильхэр зиехэм IэпыIэгъу ягъэгъотыгъэнымкIэ комиссиехэм актхэр зэхагъэуцощтых.

КъумпIыл Мурат тхьамыкIагъо къызыщыхъугъэ чIыпIэр къызэпиплъыхьагъ, фэтэрхэм арыхьагъ, ахэм ащыпсэухэрэм аIукIагъ ыкIи яупчIэхэм джэуап къаритыжьыгъ. Анахьэу ахэр зыфэгъэхьыгъагъэхэр чIэнагъэу ашIыгъэр афигъэкъу­жьыгъэныр, ядокументхэр зыпкъ игъэуцожьыгъэнхэр ары.
«ШIокI имыIэу цIыфхэм IэпыIэгъу тафэхъущт, мылъкукIэ тадеIэщт, автомобильхэр ыкIи нэмыкI мылъкур зышIокIодыгъэхэм компенсациехэр яттыщтых. Пшъэрылъ шъхьаIэу щытыр фэтэрхэр псынкIэу зыпкъ игъэуцожьыгъэнхэр ары. ПсэолъэшI компаниехэм тырягъусэу унэхэр дгъэцэкIэжьынэу итхъухьагъ. Iоф­шIэныбэ къытпыщылъ. ЦIыфхэм IэпыIэгъу тафэхъунымкIэ ищыкIэгъэ амалхэр зетхьащтых», — къыIуагъ АР-м и ЛIышъхьэ.

Республикэм ипащэ цIыфхэм акIуачIэ зэдырахьылIэнэу, лъэныкъо пстэумкIи зэдеIэжьынхэу, къихьащт тхьамафэм фэтэрыбэу зэхэт унитIумэ ашъхьэхэм ягъэцэкIэжьын аухынэу, тхьамэфитIум къыкIоцI IофшIэн шъхьаIэхэр зэшIуа­­-хынхэу пшъэрылъ афишIыгъ. Агъэфы­къогъэ унэхэр псынкIэу зыпкъ игъэуцожьыгъэнхэм пае куп-купэу зэтыраутыгъэх, псэолъэшI организацие зэфэшъхьафхэм ахэр атырагощагъэх. IофшIэн пэпчъкIэ пшъэдэкIыжь зыхьыщтхэр агъэ­нэфагъэх. ГъэцэкIэжьынхэр зэрэкIо­рэм ахэм гъунэ лъафы. Апэрэ чэзыоу зыпылъхэр унэхэм ягъэфэбэнрэ унашъхьэхэм ягъэцэкIэжьынрэ ары. Яунэхэм къагъэзэжьынэу цIыфхэм Iизын аратыгъ. Ахэм къахимыубытагъэхэр пыим нахь лъэшэу зэрар зэрихыгъэ фэтэрхэр ары. Джыдэдэм специалистхэм ахэм язытет уасэ фашIы, ищыкIэгъэ экспертизэхэр зэхащэх.
КъумпIыл Мурат оперативнэ штабым хэтхэм пшъэрылъ афишIыгъ унэхэм ачIэс­хэм адэгущыIэнхэу, кол-гупчэм чэщи-мафи Iоф ышIэным гъунэ лъафынэу. Джащ фэдэу республикэм ипащэ цIыфхэм чIэнагъэу ашIыгъэр къалъытэ зыхъукIэ фетэуныгъэ къызхамыгъэфэнэу афигъэпытагъ. Зифэтэрхэр лъэшэу агъэфыкъогъэ цIыфхэр пIалъэ горэкIэ щыIэнхэу зыдащэгъэ чIыпIэм Iоф зэришIэрэми ренэу гъунэ лъафы.
ПсэолъэшI организациехэу, гуфакIохэу, нэмыкIхэу унэхэр зыпкъ игъэуцожьыгъэн­хэм, цIыфхэм IэпыIэгъу ягъэгъотыгъэным зиIахь ахэзышIыхьэрэ пстэуми АР-м и ЛIышъхьэ зэрафэразэр къыIуагъ. Муниципалитет зэфэшъхьафхэр зэрар зыхьыгъэ цIыфхэм IэпыIэгъу къафэхъух. Партиеу «Единэ Россием», Народнэ фронтым АР-мкIэ икъутамэ, республикэм иныбжьыкIэ организациехэм ялIыкIохэр, АР-м и Къэралыгъо Совет – Хасэм идепутатхэр, Адыгэкъалэ къикIыгъэ гуфакIохэр цIыфхэм, къэгъэнэжьакIохэм, псэолъэшI бригадэхэм IэпыIэгъу афэхъух пыим зэрар зэрихыгъэ фэтэрхэм ягъэкъэбзэнкIэ, лъэшэу зыфэныкъо товархэр цIыфхэм аIэкIагъахьэх.
«ЧIыпIэ зэжъу ифагъэхэм IэпыIэгъу афэхъурэ пстэуми, хымэ лыузыр зэхэзышIэхэрэм джыри зэ «тхьаегъэпсэушхо» ясэIо. Обществэр зэкъогъэуцогъэным, фэныкъохэм IэпыIэгъу ягъэгъотыгъэным непэкIэ мэхьанэшхо яI», — къыIуагъ КъумпIыл Мурат.
АР-м и ЛIышъхьэ ипресс-къулыкъу