Урысыем лъэпкъ зэфыщытыкIэу илъыр гъэпытэгъэным зыщытегущыIэгъэхэ Iоф­тхьабзэ тыгъуасэ Адыгэ къэралыгъо университетым щыкIуагъ. Къэралыгъо ыкIи политическэ IофшIэкIошхоу, дипломатэу Рамазан Абдулатиповымрэ Урысы­ем IофшIэнымкIэ и ЛIыхъужъэу МэщбэшIэ Исхьакърэ ащ къырагъэблэгъагъэх.
Iофтхьабзэм ипэублэ Рамазан Абдулатиповым илъэс пчъагъэ хъугъэу зэринэIуасэр, литературнэ институтэу Москва дэтым зэрэщыдеджагъэр Мэщ­бэшIэ Исхьакъ къыIуагъ. Политикэм ылъэныкъокIэ ащ гъогу кIыхьэ къызэрикIугъэм дакIоу, литературэм хэхъоныгъэ ышIыным иIахьышIу зэрэхэлъыр, тхылъ пчъагъэ къызэрэдигъэкIыгъэр къыхигъэщыгъ.
— Рамазан Абдулатиповым итхылъэу «100 вершин Расула Гамзатова» зыфиIорэр гъэшIэгъоны. Ежь ышъхьэкIэ ышIэщтыгъэ поэтым, тхэкIо цIэрыIом зыщыщ лъэп­къыр зэригъэлъапIэщтыгъэм, лIэшIэгъухэм къахэхыгъэ лъэпкъ шIэныгъэр зэригъэфедэщтыгъэм Рамазан Абдулатиповыр къатегущыIагъ. Политикымрэ поэт цIэрыIомрэ зэIукIэхэу, Дагъыстан итарихъ нэкIубгъохэм атегущы­Iэхэу бэрэ къыхэкIыгъ. Рамазан Абдулатиповыр республикэм ипащэу зыщэт лъэхъаным Гамзатовыр зыкIэхъопсыщтыгъэ поэзием и Те­атрэу «Пушкиным щыублагъэу Гамзатовым нэс» зыцIэр къызэIуа­хыгъагъ. Москва ащ исаугъэтэу дагъэуцуагъэм ишIын иIахьышIу хи­лъхьагъ, ащ икъызэIухын УФ-м и Президент хэлэжьэгъагъ, — къы­Iуагъ МэщбэшIэ Исхьакъ.
Рамазан Абдулатиповыр философие шIэныгъэхэмкIэ доктор, тарихъ ыкIи лъэпкъ зэфыщытыкIэхэмкIэ специалист. КультурологиемкIэ Урысые Федерацием ишIухьафтын илауреат. Дагъыстан Рес­публикэм 2013-рэ илъэсым къыщегъэ­жьагъэу 2017-м нэс ипэщагъ.
Къэзэрэугъоигъэхэм адэгущыIэзэ лъэпкъ зэгурыIоныгъэм мэхьанэу иIэр ащ къыIотагъ. УФ-м и Президент иунашъокIэ лъэпкъыбзэхэм я Мафэ хагъэу­нэфыкIынэу зэраублагъэр, Расул Гамзатовыр къызыхъугъэ Iоныгъом и 8-м ар зэрэтырагъэфагъэм мэхьанэ зэрэритырэр къыIуагъ. Урысые Федерацием щыпсэурэ лъэпкъ зэфэшъхьафхэм абзэ къызэтегъэнэжьынымкIэ ащ шIуагъэ къызэритыщтыр, сыд фэдэрэ лъэпкъи литературэр, поэзиер имыIэу щыIэн зэримылъэкIыщтыр къыIуагъ. Лъэпкъ зэгурыIоныгъэм мэхьанэшхо зэриIэр, нэмыкI лъэпкъхэм шъхьэкIафэ афэпшIын зэрэфаер къыхигъэщыгъ.
КIэухым Адыгэ къэралыгъо университетым икIэлэегъаджэхэр ыкIи истудентхэр зыгъэгумэкIырэ упчIэхэр хьа­кIэхэм аратыгъэх, игъэкIотыгъэ джэуап­хэри агъотыжьыгъэх.
ДЕЛЭКЪО Анет.