СамбэмкIэ Урысыем ипервенствэ Нижегородскэ хэкум щыкIуагъ. Къалэу Кстово щызэхащэгъэ зэнэкъокъум къэралыгъом исамбист анахь лъэшхэр хэлэжьагъэх, ахэм аныбжь илъэс 24-м ехъурэп. Адыгэ Республикэм испортсменхэм ухьазырыныгъэ дэгъу къагъэлъэгъуагъ, медали 7 къахьыгъ.

Тигъэзет къызэрэхиутыгъэу, Наш Расул текIоныгъэр къыдихыгъ. Хьакъуй Амир, Батмэн Амин, Кобл Рэмэзан хагъэунэфыкIырэ чIыпIэхэр къафагъэшъошагъэх. Килограмм 98-м ехъу къэзыщэчыхэрэм якуп зыщызыушэтыгъэ Тхьакъохъо Ратмир джэрз медаль къыхьыгъ. Джащ фэдэу Едыдж Разыет ящэнэрэ хъугъэ. Лъэныкъоу «боевое самбо» зыфиIорэм дэгъоу зыкъыщигъэлъэгъуагъ ыкIи джэрз медаль къыщихьыгъ республикэм илIыкIоу Хьакъуй Инвер.
Спортсменхэм ыкIи ахэм ятренерхэм тыгу къыддеIэу тафэгушIо, джыри нахь лъэгэпIэ инхэм анэсынхэу афэтэIо.