Теннис цIыкIумкIэ Къыблэ федеральнэ шъолъырым ичемпионат Адыгэ Республикэм икъэлэ шъхьаIэ мэфиплIым къыкIоцI щыкIуагъ. Мыщ хъулъфыгъэхэр ыкIи бзылъфыгъэхэр хэлэжьагъэх.

Iофтхьабзэм иаужырэ мафэ унэе зэнэкъокъухэр рагъэкIокIыгъэх. Чемпионатым икIэу едзыгъоу зэхащэщтым хэлэжьэнхэмкIэ фитыныгъэ къыдэзыхыщт хъулъфыгъи 5-рэ, бзылъфыгъи 4-рэ мыщ къыщынэфэнхэу щытыгъ. Гукъау нахь мышIэми, зэфэхьысыжьхэм къызэрагъэлъэгъуагъэмкIэ, мыхэм республикэм илIыкIохэр ахэфагъэхэп.
Адыгеим итеннисистхэмкIэ къэгъэлъэгъон анахь дэгъу зиIэр Мые­къуапэ щыщ Санислав Леонович, ащ я 17-рэ чIыпIэр къыдихыгъ. Республикэм икомандэ хэтхэр ныбжьыкIэх, арышъ, ахэм тапэкIэ гъэхъэгъэшIухэр зэрашIыщтхэм щэч хэлъэп.

Анахь дэгъоу зыкъэзыгъэлъэгъогъэ хъулъфыгъэ нэбгыритфыр: Семен Шевниныр, Арсений Гусевыр, Руслан Черкес, Илья Исаковыр, Евгений Журавлевыр.
Бзылъфыгъэхэм язэнэкъокъу пэрытныгъэр щиубытыгъ Кристина Казанцевам, Арина Казанцевар ятIонэрэ хъугъэ. Ящэнэрэ чIыпIэр зэдагощыгъ Анастасия Шевчукрэ Карина Юсуповамрэ. Мы спорт­сменхэм чемпионатым иаужырэ едзыгъоу зэхащэщтым Къыблэ федеральнэ шъолъырыр къыщагъэлъэгъонэу фитыныгъэ къыда— хыгъ.