Теннис цIыкIумкIэ Къыблэ федеральнэ шъолъырым ичемпионат непэ Мыекъуапэ щызэфашIыжьыщт. Республикэм икъэлэ шъхьаIэ хъулъфыгъэхэм ыкIи бзылъфыгъэхэм зыщаушэты.

Чемпионатым иапэрэ мафэ командэхэр зэнэкъокъугъэх, ащ ыуж нэбгырэ тIурытIу хъурэ хъулъфыгъэ ыкIи бзылъфыгъэ командэхэмкIэ анахь лъэшхэр къэнэфагъэх. Краснодар краим илIыкIохэу Илья Исаковымрэ Семен Шевнинымрэ текIоныгъэр къыдахыгъ. Мы шъо­лъыр дэдэм испортсменхэм я 2-рэ ыкIи я 3-рэ чIыпIэхэр афагъэшъошагъэх. Бзылъфыгъэхэм язэнэкъокъуи Краснодар краир ащытекIуагъ, Кристина Казанцевамрэ Виктория Петровамрэ пэрытныгъэр аубытыгъ. Ахэр кIэух зэIукIэгъум Карина Юсуповамрэ Анастасия Шевчукрэ аIукIагъэх ыкIи 3:0-у къашIуахьыгъ.
Зэхэпхъэгъэ командэхэм ыкIи унэе зэнэкъокъухэм анахь ащылъэш­хэр непэ къэнэфэщтых. А 1 – 6-рэ чIыпIэхэр къыдэзыхыгъэ хъулъ­фыгъэхэм ыкIи а 1 – 4-рэ чIыпIэхэр къызфагъэшъошэгъэ бзылъфыгъэхэм чемпионатым иаужырэ едзыгъоу Москва щызэхащэщтым Къыблэ федеральнэ шъолъырыр къыщагъэлъэгъонэу фитыныгъэ аратыщт.