Лъэпкъ культурэхэм я Гупчэу ПсышIуапэ дэтым щылэжьэрэ къэшъокIо ансамблэу «Адыгэ­хэр» зызэхащагъэр илъэс 25-рэ зэрэхъугъэр игъэкIотыгъэу хагъэунэфыкIыгъ.

ЛIэшIэгъу плIанэм къыкIоцI хореографэу Хъущт Фатимэ лIэуж пчъагъэ ыпIугъ, ыгъэсагъ. Ащ IэпыIэгъу къыфэхъу ШэхэкIэй цIыкIум щыщ балетмейстер ныбжьыкIэу Гъуашэ Юрэ. ЗэлъашIэрэ ансамблэм концертхэр къызщитырэ чIыпIэхэм заушъомбгъу. ИмэфэкIэу хигъэу­нэфыкIырэми фэхьазырэу ар къекIолIагъ.
БэмышIэу купыр Москва щыIагъ, мыщ щызэхащэгъэ мэфэкI зэхахьэм артистхэр хэлэжьагъэх.
— КъэшъокIо купэу «Solar dance» зыфиIорэр зызэхаща­гъэр илъэси 10 зэрэхъугъэмкIэ тафэгушIонэу Москва ты­кIо­гъагъ, — къеIуатэ творческэ купым ипащэу Хъущт Фатимэ.

«Адыгэхэм» япащэ къызэ­рэхигъэщыгъэмкIэ, творческэ купхэр зэхэтхэу концертхэр къа­тынхэр хабзэ афэхъугъ. Хы ШIуцIэ Iушъом щыпсэурэ ша­псыгъэхэм я Адыгэ Хасэрэ сатыушIэу Шъхьабэ Вячеслав-
рэ яIэпыIэгъухэу Москва кIо­гъагъэх, а дэкIыгъо къэшIыгъор ямэфэкI ихэгъэунэфыкIынкIэ ухьазырыныгъэ дэгъоу ансамб­лэм фэхъугъ.
— Гушхуагъэ тхэлъэу тимэфэкI хэтэгъэунэфыкIы, — къе­Iуатэ Хъущт Фатимэ. — КIэлэцIыкIу купхэр зэолIэрэ гумэкIыгъохэм тиансамблэ къаухьагъэп, тэри бэ пэрыохъоу тапэ къикIырэр, ау ащ пае къэмынэу хэхъоныгъэхэр тэшIых, те­кIоныгъэхэр къыдэтэхых. ЫпэкIэ улъыкIотэным фэшI ренэу уздэлэжьэжьын фае. Сабыйхэми, ны-тыхэми цыхьэ къызэ­рэтфашIырэм тегъэгушIо, непэ нэбгырэ 78-рэ тэгъасэ, илъэси 5-м къыщыублагъэу 16-м нэс ахэм аныбжь. Джащ фэдэу адыгэ къашъом дакIоу, шIоигъо­ныгъэ зиIэхэр кавказ шъонтырыпым теонхэу ятэгъашIэ.
«Адыгэхэр» зызэхащагъэр илъэс 25-рэ зэрэхъугъэхэм фэгъэхьыгъэ мэфэкI концертэу «Уигухэлъ факIу» зыфиIорэм изэхэщэнкIэ ахъщэ Iэпы­Iэгъу къафэхъугъэр шапсыгъэмэ яобщественнэ парламент ары, Пшызэ и Губернатор игрантэу къыдахыгъэм къыдыхэлъытагъэу Iофтхьабзэр зэшIуахыгъ. Лъэпкъ культурэхэм я Гупчэу ПсышIуапэ дэтым къеблэгъагъэх ансамблэм иныбджэгъу­шIухэр, хэушъхьафыкIыгъэ дзэ операцием хэлажьэхэрэм яуна­гъохэр, яIофшIэгъухэр. Залы­шхом цIыфыр чIизыгъ, тIысыпIэ нэкI иIагъэп.
«Адыгэхэр», «Удж», «ЗэфакIу», «ЛъэпэчIас», «ХьакIулащ», «Зыгъэлъат», «Абхъаз зэпэджэгу», «Лъэпэрыс», «Къу­шъхьэр», «Къамэ къашъор» зы­фиIохэрэр ыкIи нэмыкIхэр артистхэм къашIыгъэх. Творческэ купым изэхэщэн тарихъэу пылъыр зэхахьэм къыщаIотагъ, сурэтхэр, хъарзынэщ видео-техыгъэхэр къагъэлъэгъуагъэх. Ижъырэ адыгэ къашъохэм ябаиныгъэрэ ядэхагъэрэ къиIотыкIыгъэнымкIэ мэфэкI концертым мэхьанэшхо иIагъ.
«Адыгэхэм» афэгушIуагъэх илъэс пчъагъэхэм къакIоцI адэ­лажьэхэрэ шапсыгъэмэ яоб­щественнэ парламент хэтхэри. Хасэм ыцIэкIэ КIакIыхъу Мэ­джыдэрэ ащ игуадзэу Ныбэ Рустамрэ рэзэныгъэ тхылъхэр аратыжьыгъэх Хъущт Фатимэрэ балетмейстерэу Гъуашэ Юрэ­рэ, джащ фэдэу пчыхьэзэхахьэм ихьэкIэ гъэшIуагъэхэм.

— Мы мэфэкI зэхахьэм нафэ къышIыгъ ансамблэм ныбджэгъубэ зэриIэр, цIыфмэ шIу зэралъэгъурэр, — къыкIигъэт­хъыгъ организацием ипащэ. — Непэ залым чIэс цIыфхэр аныб­жькIи, лъэпкъэу къызхэкIыгъэхэмкIи зэфэшъхьафых, къа­лэу Шъачэ ыкIи ТIопсэ районым япсэу­пIэхэм ахэр ащыщых. Хъущт Фатимэрэ игупшысэгъу­хэмрэ ансамблэ шIагъо зэхащагъыкIи лIэшIэгъу плIанэм
къыкIоцI сэнаущыгъэ зыхэлъ ныбжьыкIэхэр зыщагъэсэхэрэ ыкIи зэлъашIэрэ творческэ купэу ар агъэпсышъугъ.
ШIуфэс псалъэхэр артистхэм къапагъохыгъэх Лъэпкъ культурэхэм я Гупчэу ПсышIуапэ дэтым игенеральнэ пащэ игуа­дзэу ЛIыф Заирэ, Дунэе Артийскэ комитетым ыкIи Лъэпкъ Артийскэ комитетым яполномочнэ лIыкIоу Урысыем ыкIи Краснодар краим ащыIэу, Гупчэу «Истоки» зыфиIорэм ихудожественнэ пащэу Алеся Замбатовам. Ащ Хъущт Фатимэ Дунэе дышъэ орденэу «Сыгу сабыймэ ясэты» зыфиIорэр къыфигъэшъошагъ, IэпэIэсэныгъэшхо зэриIэм кIэлэегъэджэ сэнаущыгъэшхо зэрэхэлъым ыкIи гуетыныгъэкIэ ныбжьыкIэхэмрэ сабыйхэмрэ зэригъа­сэхэрэм афэшI.
ЗэлъашIэгъэ купым имэфэкI зэхахьэ мэхьанэшхо зэриIагъэр Шъачэ иадминистрацие культурэмкIэ игъэIорышIапIэ щыхагъэунэфыкIыгъ.
— Илъэс 25-рэ хъугъэу гур къэзыIэтырэ къэшъокIо творческэ купыр мэлажьэ, а уахътэм ащ ипащэр Хъущт Фатим ары. Къалэм ыкIи краим ащызэ­хащэрэ зэхахьэмэ ансамблэр ча­нэу ахэлажьэ, — къыща­Iуагъ гъэIорышIапIэм.
МэфэкI пчыхьэзэхахьэм хэлэжьагъэх Адыгэ Республикэм илIыкIохэр. ХьакIэу къеблэгъагъэмэ алъэгъугъэх дахэу, зэкIужьэу IэпэIасэмэ ашIыгъэ упкIэ паIохэр, гъучIым, пхъэм, шэкIым ахашIыкIыгъэ художест­веннэ IэшIагъэхэр, лъэпкъ шъо­шэ дахэхэр ыкIи нэмыкIхэр. Костэкъо Рус­лъан, Абрэдж Го­­щэфыжь, Нэ­гъой Оксанэ, Шъао Ра­ситэ, Юсуп Заур, Блэгъожъ Зулифэ ыкIи нэмыкIхэм яIэшIагъэхэр къэзэрэугъоигъэхэм агъэ­шIагъо икъугъ.
Адыгэ Респуб­ликэм илъэпкъ культурэхэмкIэ и Гупчэ къызэ­рэщыхагъэщы­гъэмкIэ, нэбгырэ ­шъиплIым ехъу зэплъыгъэ къэ­гъэ­лъэгъоныр лъэпкъ Iэмэ-­псы­мэхэм, художественнэ IэшIа­гъэхэм цIыфхэр ащыгъэгъозэ­гъэнхэмкIэ мэ­хьа­нэшхо зиIэ чIыпIэ хъугъэ.
Ныбэ Анзор.