Пшысэ цIэрыIоу «Золушка» зыфиIорэр АР-м и Театральнэ зэхахьэ къыгъэлъэгъоныр ыублагъ. Зэрэгугъэ­хэрэмкIэ, нэбгырэ 5500-рэ ащ еплъыщт. Тыгъэгъазэм и 24-м къыщыублагъэу и 29-м нэс къэ­гъэлъэгъонхэр кIощтых. Драматургэу, пшысэтхэу Шарль Перро ипшысэ техыгъэу Театральнэ зэхахьэм ихудожественнэ пащэу, режиссерэу Ацумыжъ Рустам ар ыгъэуцугъ.

ЯмышIыкIэ декорациехэр, сценэр къагъэлъагъорэм елъытыгъэу къызэрэнэфырэр, зэрэчэрэгъурэр, мэкъамэхэр зэрагъэфедэхэрэр, артистхэм ащыгъ шъуашэхэр зэрэшIыгъэхэр, пшысэм икъэгъэлъэгъон шIыкIэу къыфагъотыгъэр умыгъэшIэгъонхэ плъэкIырэп
— Илъэс пчъагъэм классическэ репертуарым Театральнэ зэхахьэм зыфегъазэ. «12 месяцев», «Морозко» зыфиIорэ пшысэхэр ыпэкIэ къэдгъэлъэгъуагъэх. Джы мы илъэсым пшысэ цIэрыIоу «Золушка» зыфиIорэр Урыс драматическэ ыкIи Лъэпкъ театрэхэр зэгъусэхэу дгъэуцугъэ. Зы мафэм спектакли 4 къэтэгъэлъагъо. КIэлэцIыкIу­хэм апае пшысэр гъэшIэгъонэу зэрэзэхэдгъэуцощтым тыпылъыгъ, ар пIуныгъэм фэIорышIэ. ШэпхъэшIухэм адиштэу тикъэгъэлъэгъонхэр Адыгеим имызакъоу, Краснодар краими къыщытэтых. Щылэ мазэм и 3 — 10-м мафэ къэс цIыфхэр театрэм къетэгъэблагъэх, — къыIуагъ Ацумыжъ Рустам.
Дэгъумрэ дэимрэ кIэлэцIыкIухэм зэрагъэпшэнхэ, янэ-ятэхэу спектаклэм еплъыхэрэр IэпыIэгъу къафэхъухэзэ зэфэхьысыжьхэр ашIынхэм зэхэщакIохэр щэгугъых. Спектаклэм еплъыгъэхэм ащыщхэр яеплъыкIэхэмкIэ къыддэгощагъэх.
— Къэгъэлъэгъонэу «Золушкэр» сикIэлэцIыкIу лъэшэу шIогъэшIэгъоныгъ. Артистхэм гурыIогъошIоу ягущыIэхэр зэрагъэпсыхэрэм ишIуагъэкIэ пшысэм купкIэу хэлъыр къагурыIуагъ. Джы къэкIощт илъэс­хэм адыгэ пшысэхэм тисабыйхэр ядгъэплъыхэ тшIоигъу. Нартмэ япщыналъэ къыхэхыгъэ пшысэхэр лъэшэу ашIогъэшIэгъон хъущтыгъэх, — къыIуагъ УдыкIэко Иринэ.
ИлъэсыкIэ шIушIэ Iофтхьабзэхэм язэхэщэн АдыгеимкIэ хэбзэшIу хъугъэ.
ЧIыпIэ къин ифэгъэ кIэлэцIыкIухэр, хэушъхьафыкIыгъэ дзэ операцием хэлажьэхэрэм ыкIи иветеранхэм яунагъохэм арыс сабыйхэр зыкIэхъо­псыхэрэр къадэхъунхэм Iофтхьабзэхэр фэлажьэх.
Лъэпшъыкъо Фатим.