Шъолъырхэм азыфагу щызэ­хащэрэ сурэттеххэм язэнэкъокъу-къэгъэлъэгъонэу «Мой любимый край» зыфиIорэр КъокIыпIэ музеим и Темыр-Кавказ Къутамэу Мыекъуапэ дэтым къыщызэIуахыгъ.

Темыр Кавказ ыкIи Къыблэ Федеральнэ шъолъырхэм ахэхьэрэ чIыпIэ 11-мэ сурэттеххэр къарыкIыгъэх. Къэгъэлъэгъоным нэбгырэ 54-мэ яIофшIэгъэ 400 фэдиз къырахьылIагъ. Ахэм ащыщэу пчъагъэм щыщэу IофшIэгъи 170-р ары кIэух къэгъэлъэгъоным пхыры­кIыгъэр.
КъокIыпIэ музеим и Темыр-Кавказ Къутамэ ипащэу ШъэуапцIэкъо Аминэт зэхахьэр къызэIуихзэ, къыхигъэщыгъ:
— Тимузей непэ пшъэрылъышхо зэшIуехы, культурэм епхыгъэ Iофтхьэбзабэ щырекIокIы. Темыр Кавказ ыкIи Къы­блэ федеральнэ шъолъырхэм ахэ­хьэрэ чIыпIэхэм ячIыопс идэхагъэ, псэу­шъхьэхэр ыкIи къэкIыхэрэр къизыIотыкIырэ сурэтхэр непэрэ къэгъэлъэгъо­ным хэхьагъэх. Сурэттехмэ ятворчествэ гъунапкъэ зэримыIэм къатитIумэ апы­лъэгъэ IофшIэнхэм къаушыхьаты, — къыIуагъ музеим ипащэ.
— Нэплъэгъум къыубытыгъэ сурэтхэр хьалэмэтых. Зэнэкъокъум щытекIогъэ сурэттеххэм сафэгушIо. Адыгеим исурэттеххэм яклуб ипащэу Аркадий Кирнос мыщ фэдэ проектхэр зэрэпхырищырэмкIэ «тхьауегъэпсэу» есIо сшIоигъу, — къыIуагъ АР-м культурэмкIэ иминист­рэ игуадзэу Кушъу Светланэ.
Зэхахьэм хэлэжьагъэх Адыгеим куль­турэмкIэ изаслуженнэ IофышIэу Шэуджэн Бэлэ, Урысыем, Абхъазым яза­служеннэ артисткэу, Адыгеим инароднэ артисткэу Нэхэе Тэмарэ, Урысыем исурэттеххэм я Союз игъэIорышIапIэ исекретарэу Алексей Заморкиныр, общественнэ организациеу «Урыс гео­графическэ обществэр» зыфиIорэм ишъолъыр Къутамэ ипащэу Беданэкъо Мурат, АР-м культурэмкIэ изаслуженнэ IофышIэу Аркадий Кирнос.
АР-м и Къэралыгъо программэу «Культурэм хэхъоныгъэ ышIыным» зыфиIоу 2025 — 2027-рэ илъэсхэм ате­лъытагъэм къыдыхэлъытагъэу къэгъэ­лъэгъоныр рагъэкIокIы. Урысые географическэ обществэр зызэхащагъэр илъэ­си 180-рэ ыкIи КъокIыпIэ музеим и Темыр-Кавказ къутамэ загъэпсыгъэр илъэс 40 зэрэхъугъэхэм япхыгъэу зэнэ­къокъур зэхащагъ. Адыгэ Республикэм исурэттеххэм яклуб ипащэу, АР-м культурэмкIэ изаслуженнэ IофышIэу Аркадий Кирнос проектым кIэщакIо фэхъугъ.
— Зэнэкъокъум къырахьылIэгъэ сурэт­хэм дунаим идэхагъэ ахэолъагъо, ахэм гукIэ узыIэпащэ. ЦIыфхэм язэхашIэ сурэтхэмкIэ къызэрэбгъэлъэгъон плъэ­кIыщтыр непэрэ IофшIагъэхэм къаушы­хьатыгъ. Мы къэгъэлъэгъоным хэхьэрэ IофшIагъэ пэпчъ текIуагъэу сэлъытэ, арэу щытми, дэгъумэ анахь дэгъужьхэр къахэтхыгъэх, — къыIуагъ Аркадий Кирнос.
Мыекъуапэ щыщ сурэттеххэу Николай Абрамовым, Алексей Билиным, Александра Бычковам яIофшIагъэхэр къыха­гъэщыгъэх. Ахэм анэмыкIхэу сурэт дэгъу тезыхыгъэхэм ацIэхэри къыра­Iуагъ: Вадим Зюзиныр, Ксения Полянскаяр (къ. Ялта), Виктор Лутай ыкIи Александр Орнатскэр (къ. Мыекъуапэ), Анжела Гринченковар (къ. Новочеркасск), Екатерина Дмитриенкэр (къ. Севастополь), Виктор Владимировыр (къ. Элиста), Алена Рыжовар (къ. Астрахань). Ахэм лъэныкъо зэфэшъхьафхэмкIэ шIухьафтынхэр афагъэшъошагъ.
Зэхахьэм ыуж сурэттеххэр зыхэлэжьэгъэ Iэнэ хъурае зэхащагъ.
«Мой любимый край» зыфиIорэ къэгъэлъэгъоныр къихьащт илъэсым ищылэ мазэ нэс зэIухыгъэщт.
Лъэпшъыкъо Фатим.