УФ-м икинематографистхэм я Союз иотделениеу Адыгеим щыIэм епхыгъэу Адыгэ Республикэм икинематографистхэм яныбжьыкIэ Гупчэ иIофшIэн ыублагъ.

Гупчэр анахьэу зыфэгъэзэгъэщтыр кинематографием ылъэныкъокIэ грантхэм якъы­хэхынкIэ, проектхэмкIэ Iэпы­Iэгъу афэхъугъэныр, лъэIу тхылъхэм ягъэхьазырын Iоф дэшIэгъэныр; IофышIэхэр къегъэблэгъэгъэнхэр; гъэсэныгъэ учреждениехэм зэдэлэжьэныгъэ адыряIэныр; кинопроект гукъэкIхэр пхырыщыгъэнхэр, нэмыкIхэри.

Гупчэм адыгэ кином щы­лэжьэщт специалистхэр ыгъэ­хьазырыщтых. Лъэныкъо пстэумкIи яIофшIэн зыээтеуцокIэ, кинематографист ныбжьыкIэхэр республикэм щыгъэхьазырыгъэ хъущт, чIыпIэ кинопроектхэм ядэгъугъи нахь зыкъы­Iэтыщт. Джырэ кинематогра­фием ыбзэкIэ республикэм итарихъ гъэшIэгъон къэIотагъэ хъущт. АКъУ-м имагистратурэ, шIэныгъэ гъэнэфагъэхэмрэ цифрэ технологиехэмрэкIэ Институтым хьисапымрэ информатикэмрэкIэ ифакультет ще­джэрэ Владислав Головиныр Гупчэм иIофшIэн зэхэщэгъэным фагъэзагъ.
АР-м ыкIи КъБР-м культу­рэмкIэ язаслуженнэ IофышIэу, режиссерэу, УФ-м икинематографистхэм я Союз иотделе­ниеу Адыгеим щыIэм ипащэу, кинокомпаниеу «Черкесия фильм» зыфиIорэм игенеральнэ пащэу Нэгъэплъэ Аскэрбый Гупчэм кIэщакIо фэхъугъ.
— Культурэм IэпыIэгъу етыгъэным пае бэ тиреспубликэ щызэшIуахырэр. Адыгеим кином хэхъоныгъэ щедгъэшIыныр, ныбжьыкIэхэр киноиндустрием хэтщэнхэр Гупчэм ипшъэрылъ шъхьаIэх. Лъэпкъ кинемато­графием къыпыщылъым тегъэгу­мэкIы, ащ гугъапIэу етпхыхэрэм зыкъагъэшъыпкъэжьынэу сэгугъэ. НыбжьыкIэхэм лъэпкъ нэшанэ зыпхырыщыгъэ фильмхэр тырахынхэу гъэсэ­гъэнхэ фае.
Республикэм икиноискусствэ лъэгэпIэшIу тещэгъэным тыфэлэжьэщт, — къыIуагъ Нэгъэп­лъэ Аскэрбый.
Шъолъырым кинотворчествэр къыщыIэтыгъэным тегъэ­псыхьэгъэ апэрэ Iофтхьабзэхэр кIэщакIом ыгъэнэфагъэх, ныбжьыкIэ купхэм заIуагъэкIагъ, къэбар жъугъэм иамалхэмкIэ Гупчэм икъэбар арагъэшIэным дэлажьэх.
— ШэкIогъум и 5-м кинематографистхэм яныбжьыкIэ Гупчэ иIофшIэн ыублагъ. Непэрэ ма­фэмкIэ нэбгыри 6 къыхэхьагъ, нэIуасэ тызэфэхъугъ, пшъэры­лъэу дгъэцэкIэщтхэр дгъэнэ­фагъэх. Уахътэм къыздихьырэ зэхъокIыныгъэхэм, технологиякIэхэм, амалыкIэхэм цифро­визацием адиштэу Iоф зэрэтшIэн фаем тытегущыIагъ. Апэрэ проектэу «Адыгея Анима» зыфиIорэм тыдэлэжьэщт ыкIи зэ­нэкъокъур шIэхэу тыублэщт, социальнэ хъытыум тинэкIубгъо­хэр къыщызэIутхыгъ. Ащ ишIуа­гъэкIэ цIыфхэр тикъэбархэм яджэн алъэкIыщт, — къыIуагъ Владислав Головиным.
Мэхьанэшхо зиIэ Iоф­тхьабзэм хэлэжьэнхэу Гупчэм къыра­гъэблагъэх ныб­жьыкIэхэу илъэс 18 — 35-рэ зыныбжьыхэр.
Лъэпшъыкъо Фатим.