Творческэ IофшIагъэхэм я Урысые зэнэкъокъоу «Памя­ти героев верны!» зыфиIорэм текIоныгъэ къыщыдэ­зы­хыгъэхэм Москва къащафэгушIуагъэх. Зэнэкъокъум кIэ­щакIо фэхъугъ къэралыгъо фондэу «Хэгъэгум иухъума­кIохэр». Ащ иIэпыIэгъугъэх кIэлэцIыкIухэм ыкIи ныбжьыкIэхэм я Урысые общественнэ-къэралыгъо движениеу «Апэрэхэм ядвижение» ыкIи «ТекIоныгъэм иволонтерхэр».

2025-рэ илъэсым мы зэнэкъокъум нэбгырэ мини 3-м ехъу хэлэжьагъ, ахэм аныбжь илъэси 7-м къыщегъэжьагъэу 96-м нэс. Iофтхьабзэр едзыгъуи 9 хъущтыгъ: хэушъхьафыкIыгъэ дзэ операцием ихъугъэ-шIагъэхэм ыкIи дзэ унагъо­хэм афэгъэхьыгъэ эссе, рассказхэр, усэхэр, орэдхэр, сурэттехыгъэхэр, су­рэтшIыгъэхэр.
— Лъэхъэнэ пстэуми тилIыхъужъхэм яшIэжь фэшъыпкъэнхэр, къыткIэхъухьэрэ лIэужхэр патриотхэу пIугъэнхэр ыкIи тичIыгогъухэм ялIыгъэ зэлъягъэшIэгъэныр — цIыфхэр зэкъот хъунхэмкIэ а шэнышIухэм анахь лъапIэ щыIэп. Зэнэ­къо­къум хэлэжьагъэхэм агу ихъыкIырэр дэгъоу ятворчествэкIэ къыраIотыкIын алъэкIыгъ. Авторхэм ягупсэ цIыфхэм ящыIэныгъэ итарихъ яIофшIагъэхэмкIэ къагъэлъэгъуагъ ыкIи яшIэжь къызэтырагъэнагъ. Пстэуми сызэрафэразэр къы­хэсэгъэщы, — къыIуагъ УФ-м зыкъэ­ухъумэжьынымкIэ иминистрэ игуадзэу, фондэу «Хэгъэгум иухъумакIохэр» зыфиIорэм ипащэу Анна Цивилевам.
ТекIоныгъэр ыкIи хагъэунэфыкIырэ чIыпIэхэр къыдэзыхыгъэ нэбгырэ 90-мэ мэфэкI шIыкIэм тетэу Москва ТекIоныгъэм и Музей щафэгушIуагъэх. Iэшэ зэIуупIэныгъэхэм яветеранхэр, дзэкъулыкъушIэхэр ыкIи хэушъхьафыкIыгъэ дзэ операцием хэкIодагъэхэм яунагъохэм арысхэр ащ хэлэжьагъэх.
Едзыгъоу «Авторская фотография» зыфиIорэм Адыгэ Республикэм щыщ Роксана Асмановам текIоныгъэр къыщыдихыгъ. Ар дзэ операцием хэкIодагъэм ыпхъу.
Ащ иIофшIагъэу «Сятэ ижъуагъу» зыфиIорэм мэхьэнэ куу кIоцIылъ, Роксанэ ышыпхъу нахьыкIэу илъэсищ зыныбжьыр ащ ит. Авторым зэрилъытэрмкIэ, пшъэшъэжъые цIыкIум ятэ иIуплъэ­хэр хэлъых.
Ятэ идзэ пшъэрылъхэр хэушъхьафыкIыгъэ дзэ операцием щигъэцакIэхэзэ ищыIэныгъэ ытыгъ. Ащ ЛIыхъужъныгъэм, Шыихъэу Георгий яорденхэр, нэмыкI къулыкъу тын лъапIэхэр къыфагъэшъошагъэх. Ятэ ипытагъэ, ыгъэцакIэщтыгъэ Iофым зэрэфэшъыпкъагъэр яунэгъо тарихъ изы Iахьэу егъашIэм хэтыщт.
— АпэрэмкIэ, мэхьанэ зиIэ зэнэкъо­къум изэхэщакIохэм «тхьашъуегъэпсэу» ясIомэ сшIоигъу. Сыгу ихъыкIырэр къис­IотыкIын зэрэслъэкIыгъэм имызакъоу, лIыхъужъыбэхэм ягугъу ашIынымкIэ мы Iофтхьабзэр зы амалышIу хъугъэ. Ягъэ­хъагъэхэр лъагэу аIэтыгъэх, зэлъарагъэ­шIагъэх. Ти Хэгъэгуи, тищыIэныгъи джыдэдэм къэзыухъумэхэрэм, ащ зыпсэ фэзытыгъэхэм яшIэжь тэгъэлъэпIэфэ ахэр псаоу къытхэтыщтых. СиIофшIагъэ сятэ ишIэжь фэзгъэхьыгъ, ар лIыхъужъ шъыпкъэу сэлъытэ, сырэгушхо. Къэ­кIощт илъэсми мыщ сыхэлэжьэнэу сэгугъэ, — къыIуагъ Роксанэ.
Илъэси 7 — 13 зыныбжьыхэм азыфагу щыкIогъэ едзыгъоу «Авторская фотография» зыфиIорэм УФ-м и ЛIыхъужъэу, майорэу Вадим Лемеш икIалэу Владимир ятIонэрэ чIыпIэр къы­щыдихыгъ. ХэушъхьафыкIыгъэ дзэ операцием идзэ пшъэрылъхэр щигъэцакIэхэзэ, 2022-рэ илъэсым Вадим хэкIодагъ.
Владимир ышIыгъэ сурэтым зэреджагъэр «Сятэ-ЛIыхъужъым сыготэу!». Къэлэ дэхьэгъум щыт пкъэоу ятэ исурэт зытетым янэрэ ышырэ готхэу иIофшIагъэ къыщигъэлъэгъуагъ. Ятэ ядэжь къызэ­рэкIожьырэр сурэт шIы­гъэу ышна­хьыкIэ ыIыгъэу, чIэнагъэу ашIы­гъэм илыуз, шIулъэгъоу тым фыряIэр ыкIи зэрэрыгушхохэрэр къыриIотыкIыгъ.
Москва зэрэкIуагъэр ВладимиркIэ хъугъэ-шIэгъэшху. МэфэкI шIыкIэм тетэу къазэрафэгушIуагъэхэр, ТекIоныгъэм и Музей къызэрэщыращэкIыгъэхэр, пстэури ыгу зэрэрихьыгъэр къыхигъэ­щыгъ. Джы ежьыррэ ышнахьыкIэу Максимрэ «ТекIоныгъэм ипцIыикъ» зыфиIорэ Iофтхьабзэм хэлэжьэнхэу загъэхьазыры.
Зэнэкъокъоу «Памяти героев верны!» зыфиIорэр фондэу «Хэгъэгум иухъумакIохэм» ящэнэрэу зэхещэ. 2023 — 2024-рэ илъэсхэм ащ хэлэжьагъэхэм къырахьылIэгъэ творческэ IофшIэнхэр зэхэугъоягъэхэу электроннэ шъуашэм илъэу къыдагъэкIыгъэх. Илъэсищым а Iофтхьабзэм нэбгырэ мини 10-м ехъу зэрипхыгъ.