Къулыкъу зэфэшъхьафхэм яIофышIэ пэрытхэу къэралыгъо тынхэр къызыфагъэшъошагъэхэр республикэ филармонием зэрэщагъэшIуагъэхэм дакIоу Адыгеим и ЛIышъхьэу КъумпIыл Мурат республикэм икIэлэеджакIохэм ащыщхэм Урысые Федерацием ипаспорт мыщ щаритыжьыгъ.

Республикэм ипащэ зэрэхигъэунэфыкIыгъэмкIэ, Урысыем и Конституцие и Мафэ нахьыжъхэм яIоф лъызыгъэкIотэ­нэу щыт ныбжьыкIэхэм паспортыр ари­тыжьынэу зэрэхъугъэр лъэшэу игуап.
«ЗгъэлъэпIэрэ кIэлэеджакIохэр! Паспортыр — мэхьанэшхо зиIэ шъуиапэрэ тхылъ. Фитыныгъэхэр зэрэшъуиIэхэм имызакъоу, пшъэдэ­кIыжь зэрэшъухьырэри ащ къегъэлъагъо. Республикэми, хэгъэгуми янеущрэ мафэ зыфэдэщтыр зэлъытыгъэ гражданхэм шъузэращыщыр ащ къеушыхьаты», — къыIуагъ КъумпIыл Мурат.
Къэралыгъо тынхэр къызыфагъэшъошагъэхэм къатегущыIэзэ, республикэм и ЛIышъхьэ къыхигъэщыгъ Адыгеим иныбжьыкIэхэу паспорт зэратыгъэхэмкIэ ахэр щысэтехыпIэшIоу зэрэщытхэр.
Адыгеим и ЛIышъхьэ паспортхэр аритыжьыгъэх Адыгэкъалэ игурыт еджа­пIэу N 4-м икIэлэеджакIоу Бэрэтэрэ Софие, Адыгэ республикэ гимназием икIэ­лэеджакIоу Шъхьаплъэкъо Ильдар, Адыгэ республикэ еджэпIэ-интернатым икIэлэеджакIоу Владислав Чернышенкэм, Джэджэ рай­оным игурыт еджапIэу N 8-м икIэлэ­еджакIоу Максим Севрук, Кощхьэблэ районым игурыт еджапIэу N 1-м икIэлэ­еджакIоу ЕмыкI Амирэ, Красногвардейскэ районым игимназиеу N 1-м икIэлэ­еджакIоу Арсений Кархалиным, Мыекъопэ районымкIэ гъэсэныгъэ гупчэу N 4-м икIэлэеджа­кIоу Александра Плешаковам, Тэхъутэмы­къое рай­оным игурыт еджа­пIэу N 30-м икIэ­лэеджакIоу София Лапинам, Теуцожь районым игурыт еджапIэу N 6-м икIэлэеджакIоу СтIашъу Долэт, Шэуджэн районым игурыт еджапIэу N 1-м икIэлэеджакIоу Бгъошэ Камилэ.

КIэлэеджакIохэр муниципальнэ образованиехэм къарыкIыгъагъэх, олимпиадэхэм, спорт зэнэкъокъухэм ахэр аща­текIуагъэх, шIухьафтынхэр къащахьыгъэх, общественнэ щыIэныгъэм чанэу хэлажьэх. КъумпIыл Мурат псауныгъэ пытэ яIэнэу, шIоу щыIэр зэкIэ къадэхъу­нэу кIэлэеджакIохэм афэлъэIуагъ. ШIухьафтынэу планшет ахэм аратыгъ.
«Адыгеим инеущрэ мафэ зыфэдэ хъущтыр зэлъытыгъэхэри, ыпэкIэ ар лъызыгъэкIотэщтхэри шъоры. Республикэмрэ хэгъэгумрэ хэхъоныгъэшхо ашIыным пае еджэнми, Iоф­шIэнми гъэхъэгъэ инхэр ащы­шъушIынэу сышъуфэлъаIо», — къыIуагъ Адыгеим и ЛIышъхьэ.
Филармонием чIэсхэм зафигъазэзэ, республикэм ипащэ шъхьафэу къыхигъэ­щыгъ Урысыем и Президентэу Владимир Путиным къыгъэуцугъэ пшъэрылъхэм язэшIохынкIэ илъэсыкIэм Iофышхо ашIэ­нэу къызэряжэрэр. Зэгъусэхэу акIуачIэ зэдырахьылIэмэ ары ныIэп республикэм иэкономикэрэ исоциальнэ лъэныкъорэ хэхъоныгъэ арагъэшIын залъэкIыщтыр, къыхигъэщыгъ ащ.

АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.