МэфэкI шIыкIэм тетэу Мыекъуапэ и ИлъэсыкIэ чъыг шъхьаIэ тыгъуасэ къызэIуахыгъ. Къалэм итворческэ купхэр ащ хэлэжьагъэх. ИлъэсыкIэм итамыгъэхэу ЛIыжъ ЩтыргъукIымрэ Ос Пшъашъэмрэ кIэлэцIыкIухэм къапэгъокIыгъэх. Ахэм ягъусэхэу мэфэкIым къекIолIагъэхэм орэдхэр къаIуагъэх, къэшъуагъэх, джэгу­гъэх, чэфыгъэх, анахь чанхэм шIухьафтынхэр аратыгъэх. Джащ фэдэу, «IэпэIасэхэм якъал» зыфиIорэ къэгъэлъэгъонэу Iэпэщысэ зэфэшъхьафхэр зыщызэхэугъоягъэм Iоф ышIагъ. Мыекъуапэ и ИлъэсыкIэ чъыг шъхьаIэ Лениным ыцIэ зыхьырэ гупчэу агъэкIэжьыгъэм мыгъэ щагъэуцугъ. Шъугу къэдгъэкIыжьын, блэкIыгъэ илъэсым ащ гъэцэкIэжьынхэр зэрэщыкIощтыгъэхэм къыхэкIэу чъыг шъхьаIэр къэлэ гупчэ зыгъэпсэфыпIэм ахьыгъагъ. Ау джы мыгъэ ащ ичIыпIэ къыгъэзэжьыгъ. Ежь остыгъэе чъыгым къыщегъэжьагъэу зэкIэри кIэу щагъэпсыгъ. Арт-псэолъэ зэфэшъхьаф­хэр щагъэуцугъэх, ахэр чэщрэ дахэу къэнэфых. Гупчэм пшысэхэкI теплъэ шъыпкъэ иIэ хъугъэ. Къэлэдэсхэми хьакIэхэми ар лъэшэу агу рихьэу къыщакIухьэ, сурэтхэр зыщытырахых.

ИлъэсыкIэр къэблэгъэфэ ыкIи ащ къыдыхэлъытэгъэ зыгъэпсэфыгъо мафэхэр окIофэхэ гупчэм мэфэкI Iофтхьабзэхэр щызэхащэщтых. Къэлэдэсхэри хьакIэхэри ахэм ахэлэжьэнхэу ыкIи ИлъэсыкIэ чъыгым идэхагъэ зэрагъэлъэгъунэу рагъэб­лагъэх. МэфэкIэу къэблагъэрэм ижь ащ къыщекIухьэ.
Анцокъо Ирин.