Адыгэкъалэ ия 3-рэ кIэлэцIыкIу IыгъыпIэу «Жъогъобын» зыцIэм иигъэкIотыгъэ гъэцэкIэжьын ыкIэм фэкIо.

Ежь псэуалъэм игъэкIэжьынкIэ Iоф­шIэнхэр аухыгъахэх, джы ащ къыпыщылъ чIыналъэм изэтегъэпсыхьан дэлажьэх. КIэлэцIыкIу IыгъыпIэр анахьы­жъэу къалэм дэтхэм ащыщ, загъэпсыгъэр илъэс 50 фэдиз мэхъу. Ащ къы­хэ­кIэу изытет дэй дэдагъ. Ау джы узе­п­лъыкIэ, арэу пшIэжьыщтэп, жъыр Iуахыжьи, ычIыпIэ унакIэ агъэуцугъэм фэд. Дэпкъ закъохэр къанэхэу зэкIэ зэ­блахъугъ. Лъэпкъ проектэу «Унагъом» къыдыхэлъытагъэу псэолъэшI Iоф­шIэнхэр агъэцэкIагъэх.
— Мыгъэ щылэ мазэм къыщегъэжьагъэу гъэцэкIэжьынхэр макIох. Лъэпкъ проектым къыдыхэлъытагъэу сомэ миллион 54-м ехъу къыфатIупщыгъ. Ахъщэр зытелъытагъэр псэолъэ закъор ары: ыкIоцIрэ унэ кIыбымрэ. Щагу IофшIэнхэр тэ ткIуачIэкIэ тэгъэцакIэх. ЧIыпIэ бюджетым къытыгъэ мылъкумкIэ макIох, сомэ миллион 14-рэ ныкъорэ тефэ, — къыIуагъ Адыгэкъалэ ипащэ социальнэ IофыгъохэмкIэ игуадзэу СтIашъу Къэп­лъан.

КIоцI IофшIэнхэр зэраухыгъэхэр щагум удэтэу къэошIэ. КIэлэцIыкIу IыгъыпIэм Iутхэм шъхьангъупчъэхэр атхьакIых. УзычIахьэкIэ кIамэу чIэтыр къыппэгъо­кIы. ТыдэкIи тхьакIэн, лъэкIэн, зэбгыры­гъэуцукI макъэхэр къеIукIых. Псэуалъэр зэрэщытэу зэрагъэцэкIэжьыгъэм дакIоу ыкIоцI итыщтхэри зэблахъугъэх: гъолъы­пIэхэр, Iанэхэр, пщэрыхьапIэр, зытхьа­кIыпIэхэр, гъэтIылъыпIэхэр. Ахэм апэ­Iухьэгъэ сомэ миллиониплIырэ ныкъорэр къэралыгъо бюджетым шъхьафэу къы­тIупщыгъ.
— Ау ахъщэр икъугъэп. Ащи чIыпIэ бюджетым щыщэу сомэ миллионрэ ныкъорэ хэдгъэхъуагъ, щыкIагъэр рытщэфыжьыгъ, — еIо СтIашъу Къэплъан.
КIэлэцIыкIу IыгъыпIэр нэбгырэ 70-мэ ателъытагъ. Сабыйхэр джырэкIэ нэ­мыкI IыгъыпIэхэм ахэгощагъэх. Ау илъэсыкIэм ехъулIэу ежь яем къагъэзэжьыщт. «Жъо­гъобыным» Iутхэри ясабыйхэм афэзэщыгъэх. ЛIымыщэкъо Ямэт кIэлэпIум иIэ­пыIэгъу. Мыщ зыщылажьэрэр илъэс 47-рэ хъугъэ, 1978-рэ илъэсым къызэрэIухьэгъагъ. Мыщ фэдэ игъэкIотыгъэ гъэцэкIэжьынхэр лэжьапIэм зэ­рэщилъэгъухэрэр апэр, арышъ, ымы­гъэшIэгъон ылъэкIырэп. ЗэхъокIыныгъэ­шIухэм агъэгушIозэ сабыйхэм ягъолъыпIэхэр афызэIуехы, яжэ.
— КIэлэцIыкIу IыгъыпIэр жъыгъэ, джы ар къэшIэжьыгъуай. Лъэшэу тыщэ­гу­шIукIы, IофшIэныр едгъэ­жьэжьыным тыдэгуIэ, — еIо ащ.
— НэфынэмкIи, фабэмкIи, джэха­шъохэмкIи джы тытхьаусыхэжьын тлъэ­кIыщтэп. Дэгъу дэдэу зэкIэ къытфашIыгъ. Тисабыйхэри къы­тэкIолIэжьхэу тызэрэгъотыжьмэ тыфэчэф дэдэу Iоф тшIэщт, — къыхегъахъо Ямэт игущы­Iэхэм кIэлэцIыкIу IыгъыпIэм иметодистэу Хэжъ Ларисэ.
КIэлэцIыкIу IыгъыпIэм къыпыщылъ чIыналъэм изэтегъэпсыхьанкIэ джырэкIэ IофшIэнхэм яжъотыпI. ДжэгупIэ чIыпIэхэм, жьаупIэхэм яшIын адэ­лажьэх, джащ фэдэу чIына­лъэр тырагъэ­чъыщт. IофшIэнхэр мы мазэм и 15-м къаухынхэ фае.